Read Angami Naga Korintmiako Kerieu 3 Bible Online

Korintmiako Kerieu 3 - Angami Naga bible

Korintmiako Kerieu 3

¹Harie a tuo a üpfü mu siezedzürieko[7], a nie üse ruopfü themia mhie mha pulie suote, derei nieko üse Khrista kitsa nuoranuomia tuoi chüüphou themiako mhie di mha pu morosuote.

²A nudzü se nieko vachü vor, kecüca kemetei se mo, kecüca kemetei cülie suokecü la. Nieko tsierei dojüse ba mo,

³nieko nie chüüphou kitsa ba zocü la. Nieko huoniehuo ngu nie ro mu huoniehuo ze kegei ba zocü, nieko chüüphou kitsa, mu themia zhorüli se lhou baya zo mo me?

⁴Nieko huomianie sie, “A Paul kitsa,” mu kekreimia sie “A Apola kitsa,” idi puketa ha nieko kijüunumia zo mo me?

⁵Ka, Apolo supuo ga? Paul supuo ga? Mia kituomia zo, di nie bu unie geinu pelekelie zo, süusü Niepuu thuo pelekeshü mhatho-u kechü zo.

⁶A leishü, Apolo dzü pie petseshü, derei Ukepenuopfü thuo memiekelie chüshü.

⁷Süla leikeshüu rei mu dzüpie petsekeshüu rei mha puo mo, derei memiekelie chükeshü Ukepenuopfü zo.

⁸Leikeshüu mu dzü pie petsekeshüu unie mhatho puo zo, mu kehoupuorei mha chükeshüu geinu zhakhra chüpie tsütuo.

⁹Kekreilamonyü we Ukepenuopfü kituomia, kedziese di mhachüya; nieko Ukepenuopfü lieu zo, Ukepenuopfü kiu zo.

¹⁰Ukepenuopfü ngukemezhie kha a ketsüe ki chükesimia mhiei, di a puo mvüdzeshü, mu kekreimia puo süu geinu ki chüya. Derei kehoupuorei kimhie di puo kiu chüya shi menuoliecie.

¹¹Kekreilamonyü puo mvü dzepie zhüwaketau zo kemosie miapuorei puo mvü dze pekrei lalie kenjü; puo mvüdzeu sü Jisu Khrista zo.

¹²Kehoupuorei puo mvüdze süu geinu suna, rakachü, ketsie puoma kereko, sei, zoga mu rügupie puo ki chüya ro,

¹³ki kechümia kehoupuo mhatho rei thashütuo, teisozha thelanhie süu hielashütuo, süu mi nunu thashüketuo la, mu mi süu thuo kehoupuo mhatho rei kedipuo mhie shicü kevikesuo thashütuo.

¹⁴Kitho kehoupuorei mvüdze süu geinu krukelieko, puo zhakhra ngulietuo.

¹⁵Mhakinu mhatho-u thewata ro, ki kechüu ka phituo; derei ki kechüu zowe kelalietuo, sirei mi nu kevo mhie zotuo.

¹⁶Nieko Ukepenuopfü rüsuoki puo mu Ukepenuopfü ruopfüu nie nou bakecü si mo zo me?

¹⁷Kehoupuorei Ukepenuopfü rüsuokiu pekawa ro, Ukepenuopfü rei süu pekawatuo. Kekreilamonyü Ukepenuopfü rüsuokiu mesa, mu niekoe puo rüsuokiu zo.

¹⁸Nie thuo nie sewa hiecie. Mhanuü kijü hau nu nie thuo nieü mhasiüya ro, puo bu mhakesimia chülieketuo la kenyamia chüliecie.

¹⁹Kijü hau nu mhasi le sie ro Ukepenuopfü mhodzünu kenyamia zocü la. Süu dze hakemhie thupiezhü, “Puoe mhakesiko kedodakesie ki uko telieya”

²⁰Süsie rei, “Niepuue mhakesiko noule kemethuo zo ükecü silieya” si.

²¹Süla kehoupuo bu rei themia krüta se kemelha hiecie. Kekreilamonyü mha pete rei nie vie zo.

²²Paul rei, Apola morei Kefa shierei, kijüu rei, kerhei mu kesia rei, tsiedo mu thiesie shierei nie vie zo,

²³mu nie Khrista vie, mu Khrista Ukepenuopfü vie zo.