Read Angami Naga Korintmiako Kerieu 4 Bible Online

Korintmiako Kerieu 4 - Angami Naga bible

Korintmiako Kerieu 4

¹Süla nieko hie üse Khrista kituomiaü mu Ukepenuopfü dze kesouko liethomia ükecü leliecie.

²Sizomonyü liethomiae mia bu puo pelelie kesümia morosuo.

³Siro nieko morei mechü kehoue a lepie kiü baya shikecüu we a la mha kecü puo zo. A a thuo zorei a dze puya mo.

⁴A mhapuorei lepie a nou a pejokecü jü, derei süla üdi a mezhütaü ba mo. A ketsoyakezhau sü Niepuu thuotuo.

⁵Süla puotei kemo nu, Niepuu vor kemo nu mhapuorei kelata hie, süze puo kezei nunu mha kepekhreko mu themia nou nu keviese ketuo nouleko hielapie kezieu nu shütuo. Süzenu kehoupuorei Ukepenuopfü ki nu puoe ngulie kezhü zhapu keviu ngulietuo.

⁶Siro a üpfüko mu kezeko[8], nieko zhazhü le di mha hako pete pie a mu Apolo hienie gei rei shüshü, sidi nieko bu hienie geinu dievi, “Thupie kezhü zie mo” ikecüu silie di nie donu mia puo bu rei kekreiu ki vikuokecü leta molieketuo la.

⁷No kreikecü supuoe ngu ga?[9] No methuo ngulie kemo kedipuo ba ga? No süu methuo ngulie üro kidi methuo ngulie kemo puo mhiei kemelhaya ga?

⁸Nie nie ketshukelhuo chü bate! Nie mhanyiliete! Hie sa mo di nie kedi chüte! Ketho, nieko kedimia chülietacü we a rei a nei zotuo, silie ro hie rei nie ze kedimia chütatie.

⁹Kekreilamonyü, a nou kele ki Ukepenuopfüe thela nu hie chüpie apostelmia chükecü, kijüu mhodzünu, teigeidieliemia mu themia mhodzünu kesia siazha pie tsükewamia mhie di hie pie zasizapra chüshüta zo.

¹⁰Khrista la hie kenyamia chüte, derei nieko we Khrista geinu mhakesimia chüliete: Hie we thachüte, derei nie we kekuomia chüte. Nieko we therhupfüte, derei hie we miathapfüte.

¹¹Siro hieko vor tsieketso terhü merü di tuo zo, pfheneikrako se mu mia bu hie vüwa mu thuselieketuo chü rei jü,

¹²tsiu hie thuo hie dziepie mhachü di kemezhie ba zo. Mia hie rüsekecü ki hie japie mia tsüya, mia hie pechü rei hie shügeshühie;

¹³mia hie pu pesuo rei hie die kevi puya. Hie tsieketso rei kijü hau nu nyopfhü kemhie mha pete kirei kerhutho puo chü ba.

¹⁴A mha hako thupie nie ki keshü nieko kengashüketuo la mo, derei nieko ü a nuo a khrieko kemhie di nieko tarhoshü kenyü la zo.

¹⁵Khrista kitsa nie kemeho mia nyie ker ba shierei nie krünuo kemhie we kekra ba mo. Ketho zo, Jisu Khrista geinu dieliekeviu la a nieko puou chüliete.

¹⁶Süla a nieko bu a dorielielienu di nieko hüshüzhie.

¹⁷Hau la a Timothi ketsepie[10] nieko ki shü, puoe Khrista geinu a nuo a khrieu mu pelelie kesüuta zo, puo kehou kehoupuonurei a se petha tuoyakezha Jisu Khrista geinu a medzi tuoyakezha dzeko pu di nieko bu rükra lalietuo.

¹⁸Siro nieko huomia a üse nieko ki vor lho nhiecü le di khubou tuote.

¹⁹Derei Niepuu medo ro, a pezi nieko ki vortuo, mu süze die pu khubou tuoyakezhako zomonyü uko kekuo kedipuo shicü a thuo silietuo.

²⁰Kekreilamonyü Ukepenuopfü kedi we dieu mo, derei kekuo nunu zo.

²¹Nieko kiu nie nei ta? A bu seiro se nie ki vortieya mo kekhrie nunu menekecü ruopfüu tuo ga?