Read Angami Naga Korintmiako Kerieu 5 Bible Online

Korintmiako Kerieu 5 - Angami Naga bible

Korintmiako Kerieu 5

¹Siro nieko donu pierüü kechü dze pu tuote, mu pelekemomia donu rei chüya kemo nieko dze site; mia puo puo puo kimiapfü ze lhou bata üsi.

²Nieko kokhubou ba ze! Nieko süu la thekrü chü, nieko kro-u nunu haicümia whuokewa mese mo me?

³A tsie themo-u nieko ze ba mo zoürei, a nou we nieko ze ba zo; mu a nieko ze keba mhie di.

⁴U Niepuu Jisu Khrista za nu sikecü chüyakezhamia pejoshüwate. Nieko vo kehoukengukelie ki mu u Niepuu Jisu Khrista ze di a a nou we, nieko ze keba ki,

⁵nieko bu themia hau khapie Satan dzie nu shü di puo chüüphou pekawanuya, sidi u Niepuu zha nhie puo ruopfü kelalieketuo la.

⁶Nieko kemelha kebau mha kevi mo. Khrei keduonuoyo puo la niekhrüda date bu poulieyakezha nieko si mo me?

⁷Nieko khrei keweu chüwaliecie, sitse nie niekhrüda kesa tou chülietuo, nie khreiü shükemoko zocü la. Kekreilamonyü úko la ciekevonyi tekuonuou chü di Khrista pie ruosuo chüwate.

⁸Süla khrei keweu, kelhiekecü mu mha kesuo khreiu se monyü, khrei shükemo thenou kemezhüu mu ketho niekhrüda se di ciekevonyiu nyi khe.

⁹A thiedzü thupie nie kikeshü nieko bu pieü kechüko ze kekrotho hienushü,

¹⁰kijü hau nu pieümia, morei kemehoumia mu kerügumia, morei miarhi rüsuoyakezhamia ze kerüchü hienu zoshü mo, süu situo üro, niekoe kijü hau therhieta morosuotatuo.

¹¹Derei a tsie kepuu ro nie donu mia puo utuo uüpfü morei usiezedzüriemia üya[11] rei, pieü chü, moro mha mehou, moro miarhipie rüsuo, mia kechükede, meze morei rügutayakezhako ze krotho hienu thushüya. Themia sikecümia ze mhacü rei hie.

¹²A chazou ketuomia nyie kecü pie kedipuo chü ta? Nie thuo nie kro-u nu kebako nyiekecü zhü mo me?

¹³Ukepenuopfü thuo chazou ketuoko nyie pepituo. “Nie donu kesuo chüyakezha themiau chüwalie.”