Read Angami Naga Korintmiako Kerieu 7 Bible Online

Korintmiako Kerieu 7 - Angami Naga bible

Korintmiako Kerieu 7

¹Tsie hakinu niekoe leshü thupie ketsokeshü dze kelashüzhie: “Thepfumia bu thenumia nyü mo zorei puotou.”

²Derei pieü chüketa keprei la, thepfumia bu puo kimia nyi phrelie, mu thenumia bu rei puo nupfunuo nyi phrelie.

³Mia nupfunuo bu puo kimia gei chü kezhüu chü tseishülie, mu sütuoi mia nupfünuo bu rei puo nupfuu gei sükemhie chülie.

⁴Kekreilamonyü mia nupfünuo kechümia puo thuo monyü puo nupfu puo mo gei niepu chüte; mu sütuoi mia nupfunuo kechümia rei puo thuo monyü puo kimiae puo mo gei niepu chüte.

⁵Thenuthepfunie kediezhü di puotei huoyo kecha chüketuo la zo kemosie ketherhieta hie. Nie nie kethelie mo di Satan dophi nu leta rei silie kelho la.

⁶A kepuu hau chü beicie ikecü la mo, derei siro viwe icü kepu zo.

⁷Themia pete bu a mhiekelie we a medo. Derei mia puopuokecü Ukepenuopfü ki nu ngukelie, mia puo mhaphruo puo mu kekreiu mhaphruo kekrei puo ba phre.

⁸Siro kiyakemomia mu thenu samimia bu we a mhie keba puotou zocü a puya.

⁹Derei uko u kethekerelie lhotuo liro uko bu kiyalie. Kekreilamonyü u kethekerelie lho di meyhumezhie kebau kirei kiyakelieu we vikuo.

¹⁰Derei kiyaketako la zowe a thuo zomonyü Niepuu thuo hau pushü zo, mia nupfünuo bu puo nupfu khawa suo;

¹¹(derei puo puo nupfu khawata ro, puo bu puo rübei batalie moro puo nupfu ze kemezhü chü lalie) mu mia nupfunuo rei puo kimia vawa suo.

¹²Kekreiko ki ro, hau Niepuu ki nu mo, derei a die zo, mhanuü kepelemia puoe puo kimia pelekemopfü, mu süpfüe puo ze lhou ba zoketuo puo medota ro, puo bu süpfü khawa hie.

¹³Tsiu kepelemia pfü puoe puo nupfu pelekemomia rei puo nupfu puo ze lhou ba zoketuo puo medota ro, puo bu puo nupfu khawa hie.

¹⁴Kekreilamonyü pelekemo nupfuue puo kimiapfü la mesaliete, mu pelekemopfü rei puo nupfu la mesalieta zo. Sikemo we unie nuonuoko mesa motatuoweü, tsiewe uko rei mesate.

¹⁵Unie pelekemo-u thuo puo khawa nyüta ro, sü chülie vi zo; mu haikecüko nu u zeu morei u zepfü phakecü tuo mo. Ukepenuopfüe kezekevi nu nie kiekelie zo.

¹⁶Siro mia nupfünuoko, nie pete si ba, nie-e nupfu kelalie rei si mo. Mia nupfunuoko, nie pete si ba, nie-e nupfünuoko kelalie rei si mo.

¹⁷Themia kehoupuo bu rei Niepu-ue khapie u ketsüu se di Ukepenuopfüe puo kiekelie ki mhiei lhou zoliecie. Kehou pete la a zho-u sü hau zo.

¹⁸Mia huo u zhürepfü tuo di kielie me? Sümia bu zhürekemomia chü la hie. Huomia süteiki u zhürekemo nu tuo di kielie me? Sümia bu u zhüreketuo le hie.

¹⁹Zhükere rei mhapuo mo, mu zhürekemo rei mhapuo mo; derei Ukepenuopfü diekhakeshüko zekelieu mha pete zo.

²⁰Kehoupuo bu rei puo kiekelie ki kedipuo mhie tuo di kielie shiü puo bu süu nu tuo zolie.

²¹Thiedzü n kiekelie ki no mia die chütuo me? Süu la n nou mezhie hie. No sünu tuo sa motalie vita zorei, tsie n thau se mhachülie kevide chülie.[12]

²²Kekreilamonyü kehoupuorei thiedzü mia die chütuo di puo kiepie Niepuu kitsa shükelieu, themia süu Niepuu kitsa puo kekha kejümiata zo, sütuoi kehoupuorei mia die chü mo tuo di puo kiekelieu, puo Khrista die chüta zo.

²³Puo ma chü di nie khrülieketa la nieko themia die chü lata hiecie.

²⁴A zenuoko, nie kehoupuorei kedipuo chü tuo di nie kielie shiü süu nu Ukepenuopfü ze tuo zolie.

²⁵Siro phousemia dze la ro, a Niepuu ki nu khakeshü die puo rei ngulie mo, derei a rei Niepuu ki nu ngukemezhie ngukeliemia puocü la a keleu thushüya mu peleliekesü die zo.

²⁶Siro nieko tsie kemezhie kebatsa le sie ro, mia puoe kimhie ba shi puo bu süu nu ba zorei vituo nhie iba zo.

²⁷No n kimia bate me? Siüro kevaketuo le hie. No kiya moluo me? Kiyaketuo le hie.

²⁸Derei no kiyalie zoshierei, süu la phoumata mo, mu rüü phousepfü nyhüta zoshierei süu la phoumata mo. Derei kiyakeliemia kelhou[13] hau nu kemezhie zotuo, süla a nie bu süu therhielie ro a nei zotuo.

²⁹A üpfüko mu siezedzürieko[14], a die ro hauha, puotei rhiekeshüu ba kra mote; süla tsieyawinu kiyalieketamiako bu rei kiyakemoko mhie batalie,

³⁰mu krayakezhako bu rei kra kemoko mhie batalie, mu u neiyakezhako bu rei u neiyakemo mhie batalie, mha khrüyakezhako bu rei u vie kejümia mhie batalie.

³¹Kijü hau la mereiyakezhako bu rei merei moketako mhie batalie. Kekreilamonyü kijü nu tsiedo rüliko jütatuoüzhücü la.

³²A nieko bu nie nou rüü bakecü a nei. Kiyakemomia puoe Niepuu kitsa mhatho-u le puo nounyü baya, puoe kimhie ro Niepuu nei chülietuo shicü leya.

³³Derei kiyaketamia puoe kijü nu rüliko le kenounyü bataya, puoe kimhie ro puo kimia nei chülietie shicü leya;

³⁴Sidi puo lutsahatsa letaya. Siro kiya kemopfü mu phousepfü puoe Niepuu mhatho-u la puo nounyüya, sidi puoe puo mo-u mu puo ruopfü kitsa rei mesatuolieketuo la; derei kiyaketapfüe kijü nu rüliko le kenounyüya, puo kimhie ro puo nupfu nei chülietie shicü leya.

³⁵A die hau pukecü nieko kemevi la kepu zo, a nieko kekha tsawaketuo la pu mo, derei nieko bu lhou puotou chü mu nie kenyha mo zo di nie kha tseipie Niepuu tsülieketuo la zo.

³⁶Mia puoe puo zepfü[15] gei kemengu la puo thuo puo zho puo rüli puotou motaü le ro, mu puo mengu rethorta, si morosuota, siliro puo bu thenupfü lielie, süu kephouma mo. Unie bu keritalie.

³⁷Derei mia puoe puo pepikelie nu metei thalie, puo menguko kekhalie, di süpfü bu puo zepfü[16] chü ba zotuoü di pepilieta üro, puo vi zo.

³⁸Siro mia puoe rüüpfü lielie rei vi zo, derei kiya mo ro mhachü vikuotuo.

³⁹Mia nupfünuokoe puo nupfu rhei kebachie puo phase bate. Derei puo nupfu siata ro, süsie puo thuo puo medo-u ki nyi lalie vite, derei Niepuu ki nu zo morosuo.

⁴⁰Derei a keleu ro, puo nyhü mo ba ro thejapfükuo tuo. Mu a Ukepenuopfü Ruopfüu a nou bakecü leya.