Read Angami Naga Korintmiako Kerieu 8 Bible Online

Korintmiako Kerieu 8 - Angami Naga bible

Korintmiako Kerieu 8

¹Siro mhapie terhuorhi rüsuokewako dze pushütuo: mia puyakezha, “Uko pete rei mhasi ba phre” iya. Sirei mhasi-e komethuo tuoya, derei kekhrie-e mhachü pevishüya.

²Kehoupuorei puo thuo puoü mhasiüta ro, puo si kezhüko silie mo zoluo;

³derei kehoupuorei Ukepenuopfü khrieyakezhau puo bu puo silieya.

⁴Süla pie terhuorhiko rüsuowaketa kecücako kecü dze we, “Kijü nu terhuorhi-e ketho puo rei jü;” mu “Ukepenuopfü puo rübei sie kekrei jü” zocü we si ba zo.

⁵Siro terhuomia üdi puyakezha teigei morei kijü gei tuo ürei, mu terhuomiako mu niepuko idi puyakezha kekra tuo ürei,

⁶úko la zowe Ukepenuopfü, u Puou rübei zo, puo geinu mha pete par mu we rhei tuoyakezha zo, mu Niepu sü puo rübei, süu Jisu Khrista, puo geinu mha pete chülie mu we puo la rhei tuoyakezha zo.

⁷Siro mia pete rei mhasi hau nyi phre mo. Huomia vor thie ha ketso rei terhuorhi dze le u zho chü vorketa kize, mhapie terhuo rüsuowaketa kecücako kecü ki uko süko üse terhuorhiu vie nhiecü le baya; ukoe u kele thachü ba zoluo, süla süu üse rhute nhie itaya.

⁸“Kecücae u ze Ukepenuopfü penuo shülie kenjü.” Siro we süu cü mo zorei mhapuorei kataya mo, mu we süu cü zorei mhapuorei vi kreilieya mo.

⁹Derei nie thuo nie medo chülie kevi süu pie kepele kitsa meteikemoko chü pesuowa molieketuo la nie terüchü tuoliecie.

¹⁰Mhanuü, puo kepele kethachü puoe no mhasi nyita üdi vo terhuorhi rüsuokiu nunu mhacü keba ngu ro; süu chü kethepfupie puo bu mhapie terhuorhi rüsuowaketa cako rei cüta lho üme?

¹¹Süla n mhasiu la puo kepele kethachüu, Khristae puo la siakeshü n siezeu bu katatuo.

¹²Sidi no u kepele kethachü nie siezeko chü pesuo di nie phoumakeshü geinu Khrista geirei phoumatatuo.

¹³Süla kecüca puo la a siezeu bu tetsutatuoü ro, a siezeu bu tetsuta molieketuo la, a mhakipuorei themuo rei cülie lhote.