Read Angami Naga Korintmiako Kerieu 9 Bible Online

Korintmiako Kerieu 9 - Angami Naga bible

Korintmiako Kerieu 9

¹Mhapuorei a kekha jüta mo üme? A apostelmia puo mo üme? A u Niepuu Jisu ngu mo üme?

²Kekreimia kitsa we a apostel mo ürei nieko la we a apostel puo tou zo; nieko ha Niepuu nunu a apostelketa puo ükecü zasi zocü la.

³A ketsokezhako ki puketuo a die hauha zo.

⁴Hie mhacümhakrieketuo hie mezhü ba mo üme?

⁵hie rei apostel kekreiko tsiu Niepuu siezeko mu Pitor mhiei hie kimia kepelemiapfü lielie di ze rüve tuolie kevi mezhü ba mo üme?

⁶Morei lhou balieketuo la Barnaba hienie rübei mhachü molie kenjü bei zoü memu?

⁷Supuonie chüpahi chü chakhrie puo thuo puo va pfhü satuoya ga? Lieciemia puo puo khubelieu nu khubesi cü motaya me? Morei kuopfhemia puo puo kuoko nudzü thekrie motaya me?

⁸A themia kekuo se hau pu me? Thezho-u nu zorei mha hako pu mo me?

⁹Kekreilamonyü Mosa zho-u nu rei thupiekezhü, “No mithu puo ze lie nyükecü ki mha pie puo tie peralie lho” isi zo. Ukepenuopfü mithu rüli leyakezha zo me?

¹⁰Morei puo pukeshü süu úko sounu pu moü me? U, süu úko la thupiezhü zo, kekreilamonyü liecieyakezhamia kehoupuorei mha ngukelie merü di ciezhü, mu lie nyükezhamia kehoupuorei u ya ngukelie le di nyüzhü zo.

¹¹Hie ruopfü tsiau pie nie donu prushü üro hie rei nie kinu kijü nu se morokesuo re lacü sie hie üse keyiethortaütuo me?

¹²Kekreimiako nie ki hau merüya üro, hie we sü kirei merükuo zhü mo me? Sirei, hie hie mezhü hau le tuoya mo, derei hie Khrista dze dieliekeviu chakha chüwa nyü mo di mha kehoupuonurei shükhrepfü tuoya.

¹³Nie rüsuokiu nu chalie chüyakezhako rüsuoki kecüca nguliekezha mu ruosuo kechü ba gei chalie chüyakezhako rei ruosuo kechü geinu u ya ngulieyakezha siya mo me?

¹⁴Sütuoi dieliekeviu pethayakezhako bu rei dieliekeviu mhatho geinu u va ngucü zhü ükecü Niepu-ue pushü zo.

¹⁵Derei a we a mezhü keba hako puorei seya mo, morei a thuo a zha pu di süu ngulieketuo la hau thu rei shü mo. Mia bu a hi di a nei tuokecü bie pejükewau ki a siaketa we vikuo!

¹⁶A dieliekeviu pethaya ükecü la a kemiakolieketuo cha ba mo, kekreilamonyü süu chü morokesuo khapie a gei shüwate, mu a dieliekeviu pie petha mo liro a we ce chülietie!

¹⁷Mhanuü mhatho hau a thuo a medo nunu kedakelie puo liro a zhakhra ba; derei a medo la mo zoürei mhatho hau pie a peleshüwata zo.

¹⁸Siliro a zhakhra kedipuo ngulie ta? A dieliekevi pupie mia kieketuo süu la a zha lie cü rei vi, rei lie cü mo di dieliekeviu pupie mia kieshüketuo la zo.

¹⁹A mia puo die rei chüketuomia mo, derei themia kekra ze Ukepenuopfü ki vorlieketuo la a a thuo a khapie themia peteko die chü tuote.

²⁰Sidi Judamia ze vorlieketuo la a Judamia donu Judamia mhietaya. Siro a thezho-u khrükhro ketuoko rei ze vorlieketuo la (a thezho-u khrükhro tuo mo zoürei) a thuo a khapie thezho-u khrükhro ketuomia mhiete.

²¹Sütuoi thezho kejüko rei ze vorlieketuo la (a we Ukepenuopfü kitsa thezho kejümia monyü Khrista khrükhro nu puo zho zeya) thezho kejüko donu thezho kejümia puo mhiete.

²²Kethachüko ze vorlieketuo la a kethachümia mhiete. Sidi a huomia kelalieketuo la themia peteko zhazhü le di a zho a rüli chüpie doneiü chüte.

²³A dieliekeviu la mha süko pete chüya, sidi a rei thejako kezalieketuo la.

²⁴Ta kemetsakecü nu mia kekra ta tuoya, derei mia puo rübei zhakhra ngulieyakezha nie si mo me? Sütuoi nie rei süu ngulieketuo la tazhü zoliecie.

²⁵Rüzhümia kehoupuorei mha pete nu u kethekereya; uko süu chükecü suotayakezha tsüre ngulieketuo la zo, sirei úko we suotalie kelhopfü pfhüya zo.

²⁶Süla a we si tou mo di tatuo mo, morei a kemethuo puo ze kevütuo mo;

²⁷a mia pethatuo di kenuotsa a khawa kelho la a a mo bu siazha chü di kedie chü tuoya.