Read Angami Naga Korintmiako Kenieu 1 Bible Online

Korintmiako Kenieu 1 - Angami Naga bible

Korintmiako Kenieu 1

¹Paul, Ukepenuopfü medo nunu Khrista Jisu apostel chükelie, mu u siezeu Timothi kinu, Thupie Korint nu Ukepenuopfü kehouu mu Akaya nu ketuo kemesako pete ki keshü.

²Ukepenuopfü u Puou mu Niepuu Jisu Khrista bu ngukemezhie mu noune pie nieko tsükelieu chücie.

³Ukepenuopfü u Niepuu Jisu Khristanuo Puou, mia ngukemezhie Puou mu puo ki nu thenoukeluo pete voryakezha Ukepenuopfü tshelie khe,

⁴puo u mezhie pete nu u nou thupeluoshüya, sidi u bu kemezhie kebamia nou thupeluolieketuo la.

⁵We Khrista kemezhiekelieu u kelhuo ngulie kevi tuoi, Khrista geinu we rei Ukepenuopfü kinu thukepeluo u kelhuo ngulie vite.

⁶Siro hie kemezhiekelieu ro, nie bu nie nouluolie mu nie kelalieketuo la; hie thenou keluo ngulie ro, süu nie bu rei nie nouluolieketuo la zo, mu süu nieko hie mezhie metha di kemezhiekelie nunu ngulieya.

⁷Nie gei hie kemerüu shükeniewalie lho; nie hie kemezhiekecüko nu hie ze kemezhielie, siro hie nou luokelieu nu nie hie ze kezalieketuo hie si tou ba zocü la.

⁸Siro a üpfüko mu siezedzürieko[1], hie Asia nu kemezhiekelie nie bu si mo ba nyü mo; kekreilamonyü süu va hie pie mesipie hie krada zopie hielie kenjüta, mu hie rheikelie rei le pevi mota zo.

⁹Ketho zo, hie nou zowe siata meciekecü leta zo, sidi hie thuo hie peleta monyü Ukepenuopfü, kesiamia chü perheilieyakezhau, rübei peleta.

¹⁰Hie siatalie kevi kemichie sikecü nunu Puo hie kelashüwata zo, mu hie kelashüya; mu hasie puo hie kelashüketuo hie kemerü puo gei bate,

¹¹nieko rei hie la cha di hie khruohishüya, sidi themia kekra lanu ngukemezhie süu kha hie ketsü la hie lanu themia kekra bu Ukepenuopfü tshetuo.

¹²Ketho zo, hie kemiakokecü hauha zo, mu hie nou rei süu dzetsa zhapu chüya. Süu hie kijü hau nu kethera chie mo, mu hie nou hie tho chü di lhoushü zo, ba hurei lhoupie nieko tsükecütsa, mu süu kijü nu mhasi se di mbe, derei Ukepenuopfü ki nu kepar ngukemezhie geinu zo.

¹³Kekreilamonyü hie thupie nieko ki keshüko nu nie bu phrü di puoca silie keviko sie puo cha kekrei ba mo; mu süu si vo thela tsolieketuo a merüya,

¹⁴nie tsiewe hie si zalieta zeru, süu u Niepuu Jisu zhanhie hie nie pie hie mhoshuo chütuo, nie rei hie pie nie mhoshuo chütuo.

¹⁵A mha hau si toukecü la, a nieko ki vor riekecü rhü sie, sidi nieko bu nie nei rükrü zoketuo le sie;

¹⁶a Makedonia nu kevo ki nie ki vor mu lakecü kirei nie ki vorketuo le sie, sidi nie bu a ketsepie Judia nu voketuo lekecü la.

¹⁷A haikecü la nie a üse nouchünounyü üba me? A mha rhükesie ki themia chüüphou rhi nunu, “U, u” ishü mu “Mo, mo” mha latayaü ba me?

¹⁸Ukepenuopfü dietho touyacü tuoi, a nie ki pukeshü dieko “U üshü di Moü” lata mo zo.

¹⁹Kekreilamonyü, Silvana, Timothi hieko Ukepenuopfü Nuou Jisu Khrista dzepie nie pethashüketau, “Uü-Moü” kezhau mo zo. Puo gei zowe “Uü” kecüu rübei zo.

²⁰Kekreilamonyü puo Ukepenuopfü phrakeshüko, “Uü” di chükeshüu zokecü la. Hau la we puo geinu Ukepenuopfü zayieu kitsa “Amen” chülieya.

²¹Siro Ukepenuopfü thuo rei hie bu Khrista kitsa nie ze puo chülie mu u kenhelieta zo,

²²süu puo hie gei mohor rei vüliete, mu lhite kemhie Ruopfüu pie u nou shüwate.

²³Derei a Ukepenuopfü bu a petsou di sakhi chünuya: A nieko ngumezhieketa la tsieuva Korint nu la vor mote.

²⁴Süu nie kepele kitsa hie nie mho niepu chüya üdi mo zo; sikecüumonyü nie kepeleu nu metei ketha la nie kenei chü pekrashüketuo la nie ze kedziese di mhachüyakezha zo.