Read Angami Naga Korintmiako Kenieu 10 Bible Online

Korintmiako Kenieu 10 - Angami Naga bible

Korintmiako Kenieu 10

¹A Paul, Khrista zho kevi mu puo nou menekecü nieko ki puya, mhotsou nie ze kesekelie ki a rünuoya, derei nie ze ba moketa ki nie gei a die kuo phitaya!

²A bu nie ki kevor kiwe a die reta hienu chaya, mia hieü themia noule se mhachüya üdi puyakezhako gei zowe a die re selie vi bakecü la.

³Hie themia chü lhou ba ketho, derei hie themia kelekemedo se mia ze keperhieya mo;

⁴kekreilamonyü hie terhü rünyieko themia rünyie mo, derei dahou kemeteiko zorei pekawalie kevi rünyie zo. Hie süko se mia prülikecü dieko,

⁵mu kemiako di Ukepenuopfü mhasiu petsouyakezha pete ti pejüwaya, mu hie süu se mia noule tepie Khrista die chülieya.

⁶Nieko pie dieze nu shü tseikelie sie, diezechüyakemo khe siazha khashüketuo la hie dojüpfütuo zo.

⁷Nie mhodzünu kezhüko meholiecie. Nie Khrista vieta ücü thepfuya liro, nie thuo hau le lashücie, nie Khrista vie chüketa tuoi, hie rei zoükecü le lashücie.

⁸Mu a tsie Niepuu pie hie tsüwaketa kekuou pu kemelha za sieta zoürei, a mengatalie lho, kekuo süu se nie chü peviketuou sie nie bie khrüwatuoü di mocü la.

⁹A leshü thupie nie ketsüu thededie ücü leta hie.

¹⁰Kekreilamonyü mia huo pukecü, “Puo leshüko puo die re mu kuo phiya, derei puo vor u ze ba ro thachü, mu puo dieko rei mha puo phiya mo” siya.

¹¹Sikecü puyakezhamia bu hau siliecie, hie leshü nu thukeshüko, hie vor rei chü zotuo.

¹²Hie thuo hie khapie themia u thuo u tshe phi tuoyakezhamia ze puo chü morei kemejülie lho zo. Süko u thuo huoniehuo mejü mu huoniehuo ki viü tuoya, sirei sügeinu mha kevi puorei parlieya mo.

¹³Derei hie la zowe kemiakokecü puo thela puo nyi mu süu Ukepenuopfü thuo mejüpie hie tsükeshü hie bu nie rei tsonu di lietho pie hie yachükeshü mho khotaya mo.

¹⁴Kekreilamonyü hie Khrista dieliekeviu se vor nie tsoshü mu hie se vor nie tsokeshü ki therie cie prata mo zo.

¹⁵Hie zha kezie, puoca, mia kekreimia mhatho se kemiako tuo mo; derei hie kemerüu sü nie kepele bu vilie ro, hie pelekeshü mhatho-u rei nie donu nu zhakuolieketuo la zo,

¹⁶sidi hie dieliekeviu pie nieko zokemo ketsekethou nu rei zhapu chütuo, mu kekreimia mhatho geinu kemelha lho zo.

¹⁷“Kehoupuorei kemelhakezhau Niepuu la kemelhaliecie!”

¹⁸U thuo u tshekecüu kirei Niepuu bu u tshekecü we puotou kuokecü la.