Read Angami Naga Korintmiako Kenieu 11 Bible Online

Korintmiako Kenieu 11 - Angami Naga bible

Korintmiako Kenieu 11

¹A kenyamia mhie diepushü zorei a die rünyüshücie. Nieko nou seta hie!

²A teigeimia tuoi nieko mehouya, a nieko penyhüpie mia puo ki shütuoü shü, phouse kemesapfü puo chü di pie Khrista ki shütuoü di.

³Derei thiedzü tinyhü puo do suo se di Iv sekewa tuoi nieko Khrista kitsatie nie nou mesamezhü tseiketuou chü perhukewa prei ba.

⁴Kekreilamonyü huomia nieko ki vor di hie thiedzü pupie nie petha kemo Jisu kekrei puo dze pu petha morei nie ruopfü ngulieketau kemo ruopfü kekrei ngulienu; morei nie dieliekevi lielieketau kemo kekrei puo lielienu ketuou, nie pie süu zelietatuo pekruo.

⁵A lekecü a rei niekoe pu pezhakuoyakezha apostelko ki cü ütuoya mo!

⁶A diepu si phi molie vi, derei mhasitsa we si mo; hie puotei pete nu mu mha neiüko nunu thashü nie kiewate.

⁷A nieko chü pezhashüketuo la a thuo a chü kerünuolie, mu puoma chü mo di Ukepenuopfü dieliekeviu se nieko pethakeshü ki a kephouma puo chüwaü me?

⁸A nieko lie kechü la kehou kekreiko bu a khruohikewa ha uko vie secükelie puote.

⁹Siro a nieko ze keba ki tsopfhüta zorei, a mia puorei nou va penyüwa mo, u kezemia[7] Makedonia nunu kevorko thuo a tsopfhü vaphishü zocü la. Sidi a kethelie mu hasie zorei mha kehoupuonurei a nieko nou va penyüwalie lho zo.

¹⁰Khrista geinu kepar ketho-u a nou tuokecü la, a kemelhakeshü hau Akaya kijü nunu neketewalie lho.

¹¹Kiüdi ga? A nieko khrie mo me? Nieko khriekecü Ukepenuopfü thuo si ba!

¹²Mu a tsie chükezhüko thiesie rei chü zotuo, sidi mia hie ze kemhie üdi kemelhaketuoko khalieketuo la.

¹³Kemelhaketuo süko apostel ketijü kro puo zo, lietho ketijü kro puo, Khrista apostelko meviva tuoyakezha zo.

¹⁴Mu süu mha u ngo puo mo! Satan thuo zorei puo rhi chü pekreipie kezieu dieliemia mhielie zo.

¹⁵Süla puo liethoko thuo kemiatho liethoko mevivalie rei u ngo mo: uko thelau uko mhathoko kheki chütuo.

¹⁶A kepusie pu laya; miapuorei bu aü kenyamiaü hiecie; derei nie aü siya ro, a pie kenyamiaüliecie, sitse a rei kemelha zashütuo.

¹⁷A kemelha di hau pukecüe, a Niepuu kekuo nunu hau pu mo, derei kenyamia mhie di kepu zo,

¹⁸mia kekra themia noule se kemelha tuoyakezha tuoi a rei si zoshütuo.

¹⁹Nieko mhakesimia zo di kenyamia rei ze nie nei di a dielo chülieyakecü la!

²⁰Siro miapuonie nie chüpie u diemia chüwa morei nie peseta, morei nie gei kedovita, morei u thuo u le pevita, morei dziezhü shüpie nie dzo vü zorei nieko süu gei rei a dielo chülieya.

²¹Hie thachü la hiewe silieya mo, süla mengaya ho! Derei kehoupuorei mha puo la kemelhaya ro; a kenyamia mhie di die putuo, mu a süu la thepfu di kemelhatuo.

²²Uko Ibrimia me? A rei ze. Uko Israelmia me? A rei ze. Uko Abraham yiemia me? A rei ze.

²³Uko Khrista liethomia me? A kenyamia mhie di die pute, a süko ki vikuo: süko ki mhachü krakuo, kedie rei chü kra, mia bu a vü rei krakuo, mu tsiekenuo siatanuonuo tuoya.

²⁴Judako bu va hiediapemothepfü a vüvükecü va pengou.

²⁵Va se mia bu sei pie a vü. Va puo ketsiepie a va. Rou suolie di a bu va se kemezhie selie, teizeizha puo mu teisozha puo dzükezha nu tuo;

²⁶a tsiemelie rüvekecü nu, kerüko nu rei kemichie dzü, sekecümia dzie nu rei kemichie dzü, a thuo a themia kinu, Judako ki nu, rüna nu rei kemichie dzü, rayha nu rei kemichie dzü, dzükezha nu rei kemichie dzü, ketho kemo khriethomia[8] ki nu rei kemichie dzülie,

²⁷rükhrerüyi di mhachü, teizeizha kekra zekelie tei jü, terhümerü, tsiemelie kecükekrie jü, sei mu methuo di tuoya.

²⁸Mu süko zo kemo, a teisonhie kehouko pete dze le a noukenyü chü tuoya.

²⁹Supuo thachüketuo ki a puo mhie mota ga? Supuo mia puo biekhrükeshü ki a a nou kemezhie mota ga?

³⁰A kemelha zhü üro a thachü dzeko pu kemelhatuo.

³¹Ukepenuopfü mu u Niepu Jisu Khrista Puou, a tijü mo ücü si ba. (Puo bu kechachie thetshepfükelieu chücie!)

³²A Damaska nu keba ki, kediu Areta khro keba kezhau[9] a telietuo üdi rükhoumia pie nadiu careko pfhe phre bata,

³³derei mia a khapie merha puo nu shülie di dahou kecie puo nunu a ketsipie chazoushü di a bu puo dzie nu takelie zo.