Read Angami Naga Korintmiako Kenieu 12 Bible Online

Korintmiako Kenieu 12 - Angami Naga bible

Korintmiako Kenieu 12

¹Kemelhakecü mhapuorei kepra jü zoürei a kemelha morosuote, derei a Niepuu ziemhoko mu pesikeshüko putuo zotuo.

²Teicie keredia voketa ki a Khrista kitsatieketuomia puo ze tei lha seu nu khokecü si, themo sa mo mo shi, a si mo, Ukepenuopfü thuo kesi zo.

³Mu a mia dze kesi, puo mo sa mo, mo di kho shi a si mo; Ukepenuopfü thuo kesi zo,

⁴süu ze kerüüchü nu vota, mu süki mia ki pu suokecü pfhesi mu mia puo bu rei pu la suokecü si.

⁵A süu sou nu kemelhatuo, derei a thuo a thachütsa zo kemosie, a thuo a la we kemelhalie lho.

⁶Derei a kemelha nyü sie zorei, a kenyamia tuoi zo lho, kekreilamonyü a ketho-u pu zotuo. Derei a mia puo bu rei a ngu di mu a die si di a le kerükrieta molieketuo la a ketheliete,

⁷mu mha thapie a kiekeshüko nu rei menuolie morokesuo la. Süla a bu kemholieta molieketuo la, a chü a mo gei zohu puo khashüwate, sidi a bu kemholie molieketuo la süu bu Satan dielieu chü di a vüshüshütuoya.

⁸A mha hau la va se Niepuu bu süu chüwanu cha,

⁹derei puo sie, “A n ngukemezhie sü n la tsei zo, kekreilamonyü mia kuo kemo nunu a kekuo si tseilieya” si. Süla Khrista kekuou bu a gei balieketuo la, a thachüko nu rei kemelhaketuo a nei kuote.

¹⁰Süla a Khrista zau la, a thachü nu rei, mia a kengakecüko nu rei, kemezhiekelieko nu rei, mia a pechücüko nu rei, mu ketsopfhü dzükelieko nu rei a neikuote; kekreilamonyü a thachü keba ki a kuo bayacü la.

¹¹A nyate! Nieko la a bu si morosuote. A nieko ki nu thetshepfü rei zhü zo, kekreilamonyü a mhathopuo mo zoürei, nieko mia kro puo üse apostel kevitho üyakezhako ki a thachü mo zo.

¹²A shügeshühiekelie, zasiko, ungothoko, mu mha kezha nie donu nu chükeshükoe a Apostel ketho ücü zasi zo.

¹³Nieko kehou kekreiko ki mha kikecü puonu thachükuota ga? A nieko nou va penyü kemo-u me? Hau la a kejo vashücie!

¹⁴A va seu nieko ki vorketuo dojüliete. Derei a nie nou penyülie lho, a nieko vie monyü nie lie nyü ba; mia nuonuo bu mhapie u krünuo tsü monyü mia krünuo mha khapie u nuonuo tsüyacü la.

¹⁵A a neisiei di mha pevoshütuo mu nie la a thuo a khashütuo. A nie khriekuokecü la, nie a khrie petsata rei viü ba me?

¹⁶A nie nou va penyü mokecü nie rei le batuo. Sirei (huomia sie) aü nie kedo di nie selie üya.

¹⁷A ketsepie nieko kikeshü huomia geinu a nie gei a do viliete me?

¹⁸A Tita bu vonu pushü, mu u zemia kekrei puo sa puo ze ketseshü, Tita nie gei puo do vilie mo zo, puo silie üba me? Hienie ruopfü kemhie di mhachü mo me? Hienie phizho puo nu zho tuo mo me?

¹⁹Hie mha hako kepu la nie hieü nie mhodzünu hie thuo hie zhapu chüta üba me? Hie Ukepenuopfü mhodzünu Khrista la mha puya. Kezeko, hie mha kehoupuo kechü nu rei nieko chü peviketuo la chüyakezha zo.

²⁰A nie ki vorkecü ki nieko a ngupie nie medo mo mu a rei nieko ngupie a medo moketa prei ba; sita ro kegeikecü, huoniehuo ngu u rokecü, noupfhünouyie, u thuo u zhazhükepfü, huoniehuo kebekecü, komethuokecü, mu mha kebvükecü hako sierketa prei ba.

²¹A nie ki la kevor ki, nieko themia kekra kephouma mu kejokemou chü di mesa kemo, pieü mu kethenga chüketuo nunu rüdilie kemo la, Ukepenuopfü a bu nie mhodzünu menga di a nou suo phikecü prei ba.