Read Angami Naga Korintmiako Kenieu 13 Bible Online

Korintmiako Kenieu 13 - Angami Naga bible

Korintmiako Kenieu 13

¹A nieko ki vortuoükezhü hau va seute. “Mia kepejo kehoupuorei mia kenie morei se zhapu se morosuo.”

²A tsie mhodzü kephouma chükewako ki mu kekreiko pete rei tarhoshüwate, a nieko ki vorkecü va kenieu nu nie tarhoshüwate, derei a tsie nie ze ba mota rei pu lashüya; a la vor liro, miapuorei ngumezhielie lho,

³niekoe Khrista a geinu die puya mo mo shicü si nyü ba. Puo nie gei mhachükecü thachü monyü kuo se ba.

⁴Kekreilamonyü kuo kemo nunu puo gouwa, derei Ukepenuopfü kekuou nunu rhei tuote. Siro puo gei we hie kethachümia zo, derei nie kitsatie la zowe hie Ukepenuopfü kekuo la lhoushütuo.

⁵Nieko kepeleu nu lhou ba mo mo shiü nie thuo nie mehoshücie. Sidi puotou mo mo shi lecie. Khrista nie nou ba ükecü nieko si mo me? Mo üro nieü puotou moütatuo.

⁶Hie kekrüta mokecü nie thuo ngulieketuo a merüya.

⁷Derei hie nie bu kekrüta molieketuo la hie Ukepenuopfü ki cha baya, süu mia bu hie puotouu chüketuo ngutuo üdi monyü hie ngupie puotou chüyakezhamia mhie mo zoürei nie bu puotouu chülieketuo la zo.

⁸Kekreilamonyü hie ketho-u petsoukecü mhatho puorei chülie kenjü, derei hie ketho-u la rübei zotuo.

⁹Hie thachüketa kirei nieko kuo ba ro hie nei tuoya. Siro nie bu vi tseilieketuo la hie nie la rei cha baya.

¹⁰Süla a nie ze ba kemo ki mha hako thushü ho, a nie ki kevor ki a bu Niepuu ki nu ngukelie kekuou se nieko gei a die reta molieketuo, mu nieko biekhrükewau monyü nie chü pevishüketuo la zo.

¹¹Thela nu, a üpfüko mu siezedzürieko[10], vi balie.[11] Mha pete bu puotou nu balie, a nie ki pukeshüko rünyülie,[12] huoniehuo ze kenourhelie, kezevi di lhoulie; silie ro Ukepenuopfü kekhrieu mu nouneu nie ze balietuo.

¹²Kemesako kemebokezha zho se nieko huoniehuo kelushücie. Kemesako pete nie kelushü ho.

¹³Niepuu Jisu Khrista ki nu kepar ngukemezhieu, Ukepenuopfü kekhrieu mu kemesa Ruopfü krotho-u[13] bu nieko pete ze baliecie.