Read Angami Naga Korintmiako Kenieu 2 Bible Online

Korintmiako Kenieu 2 - Angami Naga bible

Korintmiako Kenieu 2

¹Süla, a nieko ki vor nieko thepesuo la moketuo leliete.

²Kekreilamonyü a nieko thepesuowata üro supuo bu a nou thupeluo ta? A thuo u thepesuokewako zo moü me?

³Süla a thushükewa hau thushüya, sitse a vorkecü ki a mia la a neilieyakezhako bu a thepesuo molieketuo la; kekreilamonyü a nieko gei a kethepfu ba, mu a keneiu bu nieko pete keneiu rei chülieketuo la.

⁴A a nou kemezhie, a nou suo mu kra zo di leshü thupie nieko ki shü ho; süu nieko bu nieko nou suotaketuo la mo derei nieko bu a nieko khrie phiyakecü silieketuo la.

⁵Derei miapuonie mia huo thepesuowa ümharo, süu a thepesuokecü zomonyü nieko pete thepesuo zo, süu vatshevaziekecü die mo.

⁶Nieko miakrau siazha pie puo tsüwaketa ci zorei vite.

⁷Si sakecüu monyü themia süu bu puo nou suothor di puo cha mezie tsei zota molieketuo la; puo kejo vapie puo tsüwalie mu puo chü kethepfushülie.

⁸Süla a nie bu puo khrie kethocü thashünu nie hüya.

⁹A mha ca puo la thushüya: nie dojüshüketuo mu nieko mha pete nu dieze chüya mo mo shikecü sitoulietuo üdi.

¹⁰Nieko themia kehoupuorei mia kejo vashüwata ro, a rei sümia kejo vashüwata zo; siro a mha kehoupuorei vashüwata ro, a mia kejo vakeshü süu nie dzevi la Khrista mhodzünu nu süu vashüya.

¹¹Mha hau Satan bu u ki vikuota moketuo la chüya; kekreilamonyü we puo doko si bacü la.

¹²Khrista dze dieliekeviu pie pethashütuo üdi a vor Troa tsokelie ki Niepuu thuo kikha puo khrüshüta zocü ngulie;

¹³derei a nou rüülie mota, kekreilamonyü a u zeu Tita ngulie moketa la. Süla uko bu keviu chü balienushüwa di Makedonia nu vote.

¹⁴Derei Ukepenuopfü peziewe, Khrista geinu puo u mhodzü rie di hie bu kuokelie rüsieu nu tuo vozhüyacü la, sidi hie geinu puo sikelie re kethengu se kehourapuorei kezashülieya.

¹⁵Kekreilamonyü kelalieketako dzetsa rei mu katakezhüko dzetsa rei hie bu khapie Ukepenuopfü tsükeshü Khrista rekethengu chüta zo;

¹⁶süko huo la zowe süu kesia nunu kesia nu kevo re puo, derei kekreiko la zowe kerhei nunu kerhei nu kevo re puo. Siüro supuonie mhatho süu chülie sü ga?

¹⁷Hie zowe kekreimia kekra kemhie Ukepenuopfü dieu pie thelhi kechü mhie tuo mo zo; derei Ukepenuopfü thuo hie ketsekeshümia chü, Khrista kituomia mu Ukepenuopfü mhodzünu tha di ketherachie mo di süu puya.