Read Angami Naga Korintmiako Kenieu 3 Bible Online

Korintmiako Kenieu 3 - Angami Naga bible

Korintmiako Kenieu 3

¹Hie thuo hie zhapuya me? Huomia chüyakezha tuoi mia bu hie la zhapuleshü thupie nie kishü morei nieko bu hie zhapu leshü thu morei vi die?

²Nieko ha hie melou nu thupie tuoketa, themia pete bu silie viketa mu phrülie viketa leshükota zo;

³mu niekoe hie bu thukeshü Khrista leshü puota zo, süusü kethudzü se thu monyü rheituoyakezha Ukepenuopfü Ruopfüu se thuliete, ketsie geinu monyü themia melou geinu thulieta zo.

⁴Siro Khrista la Ukepenuopfü kitsa hie kethepfu nyite.

⁵Hie hie thuo par di chülie sü ükecü pulieketuo ba puorei tuo mo; hie chülie kesüu Ukepenuopfü kinu zo,

⁶puo hie bu dietseidiekhokelie kesau liethomia chülie kevi kekuo kha hie tsüshüte, süu leshükhu nunu monyü ruopfü nunu zo; kekreilamonyü leshükhue mha chü pesiawaya, derei Ruopfü we kerhei khashüya.

⁷Derei ketsie geinu thukelie kesia lietho-u thuo rei puo zayie nyi, tsiewe zayie süu se sa mote, Mosa zie kezie süu la Israel nuonuoko bu puo zie meholie suota ro,

⁸Ruopfü lietho zayieu we sü kirei kide zhakuotuo shi!

⁹Siro pejowayakezha lietho süu zorei zayie süde chü ro, u chü kemiatholiekezha lietho-u we kiderei zayie chükuotie shi!

¹⁰Ketho, tsie ziekuokecü zayie kechüu baketa la thiedzü kezie zayie kechüu jüte;

¹¹Siro jütazhükecüu thuo rei zayie nyi liro, ba seiketuo zayieu we kidepuorei zhakuotuo shi!

¹²Siro hie kemerü hau baketa la hie thepfu phi di mhachüya,

¹³thiedzü Israelko bu, puo ratsa jütaketuo mu ngu motaketuo kezieu meho terü zo tha puo thela tso molieketuo la Mosa bu mhapie puo zie yakelie tuoi monyü, hie we sükemhie chüya mo.

¹⁴Sirei süko nou chü perewate. Ketho, thie ketso rei uko dietseidiekho keweu leshüko phrükesie metsei puo keya pie uko yapfütuoya zo, mu Khrista geinu rübei süu lhewalie kevi zo.

¹⁵Ketho zo, thie haketso rei uko Mosa dieko phrükesie metsei puo keya süu pie uko nou yalietaya;

¹⁶derei themia kehoupuorei rürei la Niepuu ki vorkelie khe, puo geinu puo keyau lhewaya.

¹⁷Siro Niepuu sü Ruopfü zo, mu Niepuu Ruopfüu kebara, u kekha jütaya.

¹⁸Mu uko pete rei, u zie keya süu sa mo di, khrüva nunu mha nguyakezha tuoi, Niepuu zayieu meho di, Niepuu Ruopfü süu nunu u chü kedipie zayie puo nunu zayie kekreiu nu shü di puo rhi mhie miemie parlieya.