Read Angami Naga Korintmiako Kenieu 4 Bible Online

Korintmiako Kenieu 4 - Angami Naga bible

Korintmiako Kenieu 4

¹Ukepenuopfü hie ngumezhie di hie bu lietho hau chünu di hie pethoshüte, süla hie dzükoutaya mo.

²Siro hie kepekhre kemenga mhathoko pete khawate; hie kethedo morei Ukepenuopfü dieu pu kecürüwaya mo; sikecüumonyü hie ketho-u chü kemeyiemeluo mu Ukepenuopfü mhodzü hie thuo hie khapie kehoupuo bu rei u nou puotouu nu tuolieketuo petha tuoya.

³Derei hie dieliekeviu keviewa üro, süu katakezhüko kinu keviekewa zo.

⁴Sidi pele mvüketako la we kijü hanu rhuou bu uko nou chü pezeiwaketa la zo, süko bu dieliekeviu nunu kevor kezieu, zayie chü zokecüu Khristae Ukepenuopfü rhiukecü ngulie kelho chüwaya.

⁵Kekreilamonyü hie thuo hie zhapu chü monyü Jisu Khristae Niepuu zo ücü zhapu chü mu Jisu za la hie nie diemia mhiete.

⁶Ukepenuopfü thuo pukecü, “Kezieu bu kezeiu va pezietuo” ikeshü, süu Ukepenuopfü zayie kechüu mu mhasiu hie nou va pezielie di Jisu Khrista zie geinu thashüwate.

⁷Derei kekuo kezha süu hie geinu monyü Ukepenuopfü geinu kepar zokecü mia bu silieketuo la mhama kere süu rünyo üse kechü hie kelhou nu tuo zo.

⁸Mhacha pete nu hie kemezhielie, derei hie penyüwa mo; hie nou kehoukeruo chütaya, derei hie zie kejü chüta mo;

⁹mia hie pese phi, derei hie bu hie rübeita mo; hie vüpie zhüwaya, derei hie pekawa mo;

¹⁰Kehoukipuorei hie mo hau geinu Jisu seu toupfü seituoya, di mia bu hie mo geinu Jisu rhi tuoketa ngulieketuo la.

¹¹Kekreilamonyü hie rhei keba ki rei, Jisu zau la hie kesiatsa tuo seiya, mia bu hie chü hie phou geinu Jisu rheiketuo silieketuo la.

¹²Süla hie kelhou nu mhachütuo zo, derei nie gei zowe kerheiu mhachü tuote.

¹³Derei we ketholeshüu medzi di kepele dzetsa u ruopfü kerhetacü la, “A pelete, süla a puya” icü mhiei, we pelete, mu süla we pu reiya,

¹⁴sidi Niepuu Jisu chü perheikelieu thuo Jisu sa di u chü perheilietuo, mu nie sa di nie ze vo puo mhodzünu thaketuo hie si bata zo.

¹⁵Uzo, mha pete nieko la chüketuo zo, derei themia kekra bu ngukemezhie ngulie di süu chü pekrapie mia bu zayie kechü Ukepenuopfü tshe kechü salieketuo la.

¹⁶Süla hie dzükoutaya mo. Siro hie chü hie mo-u thachü miemietazhü zorei teisonhie hie ruopfü miau chü kesazhü zo.

¹⁷Kekreilamonyü zopuoki la hie kemezhie zorei, süue kechachie baketuo zayieu la hie bu dojüpfükelie zo,

¹⁸hie mha nguyakezhako monyü nguyakemoko meho tuoketa la; kengu vieko zowe dopuoki la rübei, derei ngu kemo vieko we kechachie baya.