Read Angami Naga Korintmiako Kenieu 5 Bible Online

Korintmiako Kenieu 5 - Angami Naga bible

Korintmiako Kenieu 5

¹Kijü hau nu hie mo pfhekiu bie pesuowata zorei, thedzie üse chü kemo kechachie baketuo ki puo, Ukepenuopfü thuo hie bu lhouketuo chü puo chüpie baketa hie si bate.

²Siro teigei nu lhouketuo ki süu pie hie whelieketuo mengu kelho di hie tsiedo hie mo pfheki hau nunu meheimelo tuoya,

³siro tsiedo hie mo pfheki hau lhewata zorei, hie methuotuo motatuo.

⁴Hie mo pfheki hau nu lhou keba ki, hie pie kemesiko toupfü meheimelo baya; süu hie hau rhuowa nyü monyü, hie wheliekezhüu pie hie whelie kenjücü la mo, derei hie ngulieketuou chüpfü nyücü la zo, sidi kerhei bu siaüjülie kevi mo hau kerhei bu mezulieketuo la.

⁵Siro hie la süu chüshüketuou sü Ukepenuopfü zo; mu puo lhite puo kemhie di Ruopfü pie hie tsüwate.

⁶Süla hie nou thepfu seituoya; hie chüüphou hau nu kebachie Niepuu ze kepecie tuokecü si ba zoürei,

⁷hie ngu di monyü pele di lhou tuoya zocü la.

⁸Derei, hie nou thepfu tuokecü, hie mo hau nu ba nyü monyü vo Niepuu kiu nu puo ze ba nyükuo zo.

⁹Hie thuo hie mo ki hau nu morei luu nu ba rei, hie puo nei chü nyü tuoya.

¹⁰Kekreilamonyü u pete rei Khristae mia ketsoketuo bau mhodzü tha phre zotuo, sidi we chüüphou nu keba ki kevi rei kesuo shierei chükewako zhakhra ngu phrelie zotuo.

¹¹Süla hie Niepuu khrü prei morokesuo si di süu se mia hütuoya; derei Ukepenuopfü hie si tsei ba, mu a kemerü nie rei nie nou nu hie si baketuo pele.

¹²Hau nie mhodzünu hie thuo hie tsheshüzhü mo, sikecüumonyü, nie bu hie la kemiako tuolieketuo, sidi nie bu thenoutsa nu monyü chazoutsa nu kemiako tuoyakezhako die kelalieketuo la zo.

¹³Siro hie kenyamia mhieta zorei, süu Ukepenuopfü la zo, morei hie mecie tuo rei, süu nie la zo.

¹⁴Kekreilamonyü Khrista kekhrieu thuo hie hüse tuote; mia puoe pete la siawaketa hie pelete; süla mia pete rei siata zo.

¹⁵Mu puo mia pete la siashükewa la kehoupuorei rhei tuoyakezhako u thuo u la rhei tuo monyü u la siashü di rheiketuo zo.

¹⁶Süla hie tsieyawinu themia noule[2] geinu miapuorei rhu pekrei mote; hie thiedzü themia noule se Khrista dze le, derei tsiewe hie si mote.

¹⁷Süla themia kehoupuorei Khrista kitsa bata ro, puo themia kesa chüte, mha keweko jüte, mu harie mha pete rei kesa phrete.

¹⁸Derei hie chüpie hie bu Khrista la puo ze vi laketa mu kezekevi lietho kha hie ketsü Ukepenuopfü ki nu mha pete vor zo;

¹⁹mu süusü Ukepenuopfü Khrista geinu kijüu bu puo ze kezevilalie, sidi mia kejokemouko se mia pejo sa mote, mu kezevi lakelie lietho-u pie hie pelewate.

²⁰Süla hie Khrista soukechümia, Ukepenuopfü hie geinu mha puyacü la; siro hie Khrista sounu nie bu Ukepenuopfü ze kezevi lalienu puya.

²¹U lanu kephouma si motokecüu chüpie kephouma chüwa, sidi u bu puo geinu Ukepenuopfü kemiatho-u nu u ya nyilie.