Read Angami Naga Korintmiako Kenieu 6 Bible Online

Korintmiako Kenieu 6 - Angami Naga bible

Korintmiako Kenieu 6

¹Siro hie puo ze mhachü tuoyakezha tuoi, nie bu rei Ukepenuopfü ki nu kepar ngukemezhieu se kemethuo chüwa hienu pu bei tuoya.

²Kekreilamonyü puoe sie, “A puotei touki n die rünyüliete, mu kelakelie teisozha nhie a n khruohishüwate,” sishü. Harie, puotei kevi sü tsieki ha zo; harie, kelakelie teiso sü tsieki ha zo!

³Hie lietho-u nu miapuorei bu hie pejo nyüya mo süla hie mia puo chakha rei chüwaya ro,

⁴derei hie mha kehoupuonurei Ukepenuopfü kituomia ücü thashüya: sidi shügeshühie se di kemezhiekecü, zie sekecü nu rei, kepeka nu,

⁵hie tsie hie vücü nu, kedie kechü nu, mha kebvükeboucüko nu, mhachü rükhrerüyi, ze mo mu khe rei tuoya;

⁶siro kemesa kelhou nu, mhacamhala kesi, shügeshühiekecü, tseiüvikecü, ruopfü kemesa nunu rei, hie kekhrie ketho-u geinu,

⁷ketho-u pukecü nu, mu Ukepenuopfü kekuo dze kepu nu rei; hie zatsa rei hie vitsa rei kemiatho rünyie sekecü nu rei,

⁸therhukepfü mu zhasekepfüko nu rei, mia hie tshe mu hie thakecüko nu rei, mia hie üse ketijümia siya, sirei hie ketho-u puya.

⁹Mia hie si mo üya, sirei mia hie si pevi phi; hie siatatuoükezhü mhie, sirei harie, hie rhei tuo zo; mia hie pechüpenyü phi derei dukhrilie mo.

¹⁰Mia hie nou chü pesuo phi, derei hie nei sei tuoya; hieü kejümiaü, derei hie mia kekra chü penyishü; hieü mhapuorei bakemomiaü; derei mha pete hie vie zo.

¹¹Harie Korintmiako, hie nieko ki mha pu hie ketheta mo; hie nou khrü kemeyapie nieko tsü.

¹²Hie mia kekhrie nu hie ketheta mo, derei nieko we silie mote.

¹³Derei tsie u nuonuo ki mha pukecü tuoi mha puya, nie nou khrü kemeyashücie.

¹⁴Pelekemomia ze kethede di nie vocie kerhe hie. Kemiatho mu kerüzhü unie donu keze mhachülie kevi kedipuo ba ga? Morei kezie mu kezei unie kekrotholie kevi kedipuo ba ga?

¹⁵Kimhie di Khristae terhuokesuou ze kedierhelie vituo ga? Morei kepelemia puoe pelekemomia puo ze kedipuo kekrurhelie vituo ga?

¹⁶Sizomonyü Ukepenuopfü rüsuokiue terhuorhiko ze kedipuo kepupiezhü ga? Kekreilamonyü we rheituoyakezha Ukepenuopfü rüsuokiu zo; süla Ukepenuopfü thuo pukecü, “A uko donu lhou di uko ze tuotuo, mu a uko Kepenuopfü chütuo, mu uko a themia chütuo.

¹⁷Süla süko therhie parlie, sidi, uko kinu nie chükholiecie, Niepuu siya, sidi mesa kemo puorei nyü hie; silie liro a nieko zelietuo,

¹⁸mu a nieko puo chütuo, mu nieko pie a nuonuo thenu rei thepfu rei chülietuo, Kerükrietho Niepuu siya.”