Read Angami Naga Galatiako 2 Bible Online

Galatiako 2 - Angami Naga bible

Galatiako 2

¹Süsie cie keredia sienu a Barnaba ze di Jerusalem nu la kho, mu Tita rei sa ze tuo.

²A bu sünu vo morosuo üdi pesikeshü la. Sidi a uko mhodzünu (kehou krütako ze kese kreikecü tei puo zorei) a dieliekeviu pie Judakemoko pethakeshüu pie pushü, a mhatho chükelieko mu chü saketuoko bu kemethuo puo chüta nyü kemo la.

³A zeketuou Tita, Grikmia zorei puo kemvü chüpie puo zhüretuoücü chü mo.

⁴Derei kepele khrava di huomia hie Jisu Khrista ze puo chüketa la hie kekha jüketa dze si nyü di hie kro-u nu hie rücie vor, sidi ukoe hie bu u diemia chütuoü sie,

⁵derei dieliekevi ketho-u bu nie ze balieketuo la, hie puotei yopuo rei pie uko tsüwa mo.

⁶Mu krütamia üketuoko ki nu (uko thuo mhaütuo zorei, a la mhapuorei krei mo; Ukepenuopfü mia puorei rhu pekreiya mo) a la zowe mhapuorei chüshü mo.

⁷Sikecüumonyü uko Pitor bu dieliekeviu pie zhükereko pethanu puo pelekeshü tuoi a bu dieliekeviu pie zhürekemoko pethaketuo a peleshüketa ngulie,

⁸(kekreilamonyü Pitor bu zhükereko la apostel puo chüketaue, zhürekemoko la a bu apostel chüte).

⁹Mu uko donu thekrütho chü keba Jakob, Kefa mu Johan ukoe ngukemezhie hau pie a tsüshüwaketa silie tse, uko u dzie u zatsa pie Barnaba hienie ze kedzie teshüshü, hienie bu Judakemoko mu uko zhükereko donu lietho chüketuo kepfhekholie.

¹⁰Uko hienie bu kejüketsopfhüko vaphinu di kepu rübeisie mhapuorei cha mo, süu a chü nyü tuoyakecü puo zo.

¹¹Derei Pitor Antiok nu kevor ki a mhotsou puo petsouta zo, puo kekrü touketa la;

¹²kekreilamonyü Jakob kinu mia kro puo kevor mhodzü we puo Judakemoko ze mhacü baya zo. Derei uko vor tse, zhükereko prei di puo kerei kreilie di süko ze kepekro mota.

¹³Mu Judamia kekreiko rei puo mhie ketherata, sidi süko bu Barnaba rei sewa di puo bu rei ketherata.

¹⁴Derei uko dieliekevi ketho-u nu tuo seilie moketa a nguta tse, a uko pete mhodzünu Kefa ki, “No Judamia di Judakemomia mhie di lhou liro kedipuo mhie di no Judakemoko kemvü chüpie Judamia mhie di lhoulienuya ga” ishü.

¹⁵We sietsenu nu Judamia, mu Judakemomia kephoumamia mo;

¹⁶Sirei we sikelie, mia puoe thezho-u chüüze di miatholieya mo derei Jisu Khrista pelekelie rübei geinu zo. Mu we rei miatholieketuo la Jisu Khrista peleliete, mu süu kepele pie Khrista gei bakelieu geinu zo. Thezho-u chüüzekelie geinu mo zo, miapuorei thezho chüüzekelie la miatholie kenjü zocü la.

¹⁷We u mhatho geinu Khrista kitsa miatholieketuo le üro, we rei kephoumamiata zo, di siro Khrista kephouma kituou üme? Si moto zo.

¹⁸Derei a bierhuokewako a thuo chü lata ro, a thezho kevarhuomia puo ükecü thashüte.

¹⁹Thezho-u geinu thezho-u kitsa siata zo, Ukepenuopfü rheilieketuo la. Khrista ze a gouwate,

²⁰mu tsie rhei tuoketa a monyü a nou keba Khristau zo. Mu tsie chüüzie nu lhou keba kelhou hau, Ukepenuopfü nuou gei kepele nunu zo, puo a khrie di a la puo phou khashü.

²¹A Ukepenuopfü ngukemezhieu kezhü pejüwalie kenjü, kekreilamonyü thezho geinu mezhükelie[5] vorya üro, Khrista bu kemethuo nunu siate.