Read Angami Naga Galatiako 3 Bible Online

Galatiako 3 - Angami Naga bible

Galatiako 3

¹Harie mhale kemo Galatiako! Supuo bu nieko kemouwata ga? Nieko nie mhingu nu Jisu Khrista gouwaketa tha kemeyiemeluoshü zo!

²A nieko ki nu hau rübei si nyüya: Ka nie Ruopfüu ngukelie thezho-u nu chünukeshüko chükelie la mo nie rünyükelieko pelekelie la ga?

³Nieko melo hi zo me? Ruopfüu nunu sede di themia medo nu puo thela chütuo me?

⁴Nie mezhieko kemethuo puo chüte me? Süu kemethuo puo tou zo üro,

⁵Siü liro Ukepenuopfüe Ruopfü pie nie tsü mu nieko donu u ngo mhatho chükeshüko ha nie thezho-u mhathoko chükelie la mo, rünyükelieko pelekelie la ga?

⁶Abraham-e “Ukepenuopfü pelelie, süla puo üse miathoülie.”

⁷Süla kehoupuorei miathokeliemia Abraham yiemia ücü leliecie.

⁸Mu kepele geinu Ukepenuopfüe Judakemomia bu rei miatholieketuo ketholeshüe pedzüperie pushü, sidi pedzüperie dieliekeviu pie Abraham ki pukecü, “Judakemoko pete n geinu theja pfütuo” ishü

⁹Haha la, Abraham pelekelie mhie kepelemia pete rei puo ze theja ngulieya.

¹⁰Thezho-u mhatho merükezha pete rüse puo khrükhro bate, kekreilamonyü süu dze thupiekezhü, “Kehoupuorei thezho leshüdau nu thupieketuo pete chüüzelie kemo khe rüse pfütuo” isi zo.

¹¹Süla miapuorei thezho-u la Ukepenuopfü mhodzünu mezhülieya mocü mecü zo; kekreilamonyü “Kemiathomia kepele geinu rheilietuo[6]” isi.

¹²Derei thezho-u kepele nunu mo; sikecüumonyü “Kehoupuorei thezho-u nu chü morokesuoko chülie ro süko la rheilietuo” isi.

¹³U la rüse puo chü di Khristae thezho-u rüse nunu u rhaliete, süu thupie kezhü, “Kehoupuorei sei geinu goukewa khe rüsepfüketamia zo” isi,

¹⁴süusü Jisu Khrista geinu Abraham theja-u Judakemoko gei vorlieketuo la, sidi u bu kepele geinu phrapiekezhü Ruopfüu ngulieketuo la.

¹⁵A üpfüko mu siezedzürieko,[7] a thie thie kelhou nunu thakie puo khashütuo: mia puoe puo[8] kayiedie phrüshüwata ro, miapuorei süu pe morei rhü reiwaya mo.

¹⁶Phrapie kezhüko Abraham mu puo yieu[9] la zo; süu “Mu n yieko[10]” idi mia kekra la pu mo; derei süu pucü, “Mu n yieu[11]” idi mia puo la zo, süu Khrista la zo.

¹⁷A kepuu ro hau: Ukepenuopfü pedzüperie dietseidiekho chüpie kezhüu sie, cie krie dia di ser zenu ngukelie thezho-ue phrapie kezhü die süu pie thedo chüwalie kenjü.

¹⁸Mhanuü kayieu thezho-u kinu vor üro, süu phrapie kezhüu kinu vor mote; derei Ukepenuopfüe phrapie kezhüu geinu süu pie Abraham tsüshü.

¹⁹Siro thezho-u kedipuo la ga? Süu khakeshüe joketa la, phrapie kezhü puo yieu[12] vor kemochie ba zo votuocü la zo; mu süu teigeidielieko bu se vor thedo nu dielie kechüu dzie nu shü.

²⁰Thedonu dielie kechüu we lutsahatsa la; mu Ukepenuopfü we puo zo.

²¹Siüro thezho-u Ukepenuopfüe phrapiekezhüko petsoute me? Si mo zo! Kekreilamonyü thezho khakeshüu kerhei khashülie vi üro, thezho-u geinu miathokelie vor zotuo.

²²Ketholeshüe mha pete pie kephouma khro shüwate, sidi Jisu Khrista kepele geinu phrapiekezhüu pie pelekelieko tsüketuo la.

²³Kepele kevor mhodzü, kepeleu pekieshü kemochie thezho-u diechü mu u khapfü tuote.

²⁴Sidi kepele geinu u bu miatholieketuo la, Khrista kevor mhodzü thezho-u bu u kepethau chü vor.

²⁵Derei tsiewe kepeleu vorte, mu we u pethashüyakecüu khro ba sa mote,

²⁶kepele geinu nie pete Ukepenuopfü nuonuo chütakecü la.

²⁷Nie Khrista nunu baptaiz chülieketa khe Khrista chü dzieliete.

²⁸Judamia morei Grikmia üketuoko, kediemia morei kediekemomia, thenumia mu thepfumia icüko kekreilie lho; pete Jisu Khrista geinu puo chüketa la.

²⁹Mu nie Khrista vieta üro, nie Abraham yiemiate[13], mu phrapie kezhü kayieko rei ta zo.