Read Angami Naga Galatiako 4 Bible Online

Galatiako 4 - Angami Naga bible

Galatiako 4

¹A pu kenyüu sü hau: kayieu nhicu kebachie, puo mha pete mho niepu zoürei, puo mia diemia ze kekreiya mo,

²sidi puo puoe puotei puo chieshü kemochie puo thekemia mu kemeho-u khro baya.

³Sümhie di we rei thiedzü u nhicu ki, kijü hau nu ruopfüko[14] die chü tuo.

⁴Derei puotei tou-u vorlie tse, Ukepenuopfü puo Nuou ketseshü di, thenumiapfü puo geinu lhou vor, thezho-u khrükhro nu penuolie,

⁵thezho-u khro ketuoko rhalie di u bu Ukepenuopfü nuonuo chülieketuo la.

⁶Mu nie puo nuonuo chüketa la Ukepenuopfüe puo Nuou Ruopfü ketsepie u nou shü, süla we “Abba[15]! A Puo!” idi kielieya.

⁷Süla nie kituomia monyü nuothonuo chüte, mu nuothonuota ro, Ukepenuopfü geinu kayieu rei ta zo.

⁸Thiedzü nieko Ukepenuopfü si kemo ki terhuo kethokemo kro puo die chü tuo.

⁹Derei tsiewe nieko Ukepenuopfü siliete, sizomonyü Ukepenuopfü bu nie siliete, kiüdi nieko rürei la kethachü mu kemezhiekecü ruopfüko[16] ki votieya ga? Kiüdi nieko süko die chü la nyüya ga?

¹⁰Niekoe teisozha mu thekhrü mu puotei kekreikreicü mu teicieko kenyüya

¹¹A nieko la mhachü kevorko kemethuo chükewa prei bate.

¹²Kezeko[17], a nie ki chaya, a mhieliecie, a rei nieko mhielietacü la. Nieko a gei kesuo puorei chü mo.

¹³A dieliekeviu pie nieko petha kerietho-u va, a shürho ba kemo ki puo ükecü rükra batuo,

¹⁴süla a rüliu nieko medophikecü puo chü zoürei, nieko a thi morei a melie reiwa mo, sicüumonyü Ukepenuopfü dieliemia puo tuoi, tsiu Jisu Khrista zekelie tuoi a zelie.

¹⁵Thiedzü nie nei kebau kiüta ga? Süki we a ngukecü nie chülie vituo ücü sie we nie mhi rei kerülapie a tsüwa vi thenyü siei sie zo.

¹⁶A tsie ketho-u nie ki pukeshü la nieko ngumvümia chüte me?

¹⁷Mia kro puo puoca kevi nunu mo di nie la u nounyü phicü mhie tuoya; ukoe nie kekhawa di nie bu uko gei nie nounyü parta nyü.

¹⁸Puoca kevi puokecü sie huoniehuo la puotei pete nu thenou nyücü vi zo, mu hau a nieko ze keba ki rübei zo suo.

¹⁹A nuonuoko, Khrista bu nieko nou ba toulie kemochie, a nieko la a nuonuovachü chü bate,

²⁰A bu tsie nieko ze ba di, a pfheü kreita ro a neitieciü, nieko la a mekeso chüpfü baketa la.

²¹Nieko thezho-u khrükhro tuo nyüyakezhako a ki pushücie, nie thezho-u rünyüshü lho me?

²²Kekreilamonyü süu thukeshü Abraham puo nuo kenie nyi, puo mia diepfü geinu mu kekreiu mia diekemopfü geinu.

²³Mia diepfü geinu penuokelieu we chüüphoutsa nu zo, derei mia diekemopfü geinu penuokelieu we phrapie kezhüu geinu zo.

²⁴Hau pie dievi nu shüshü: thenunie pie dietseidiekho kenie thashü ba. Puoe Sinai kijüthou geinu mia die kechü nunu penuolie, süpfüe Hagar.

²⁵Hagarpfü pie Arabia nu keba Sinai kijüthou mu tsiedo keba Jerusalem meseu chü, hapfüe puo nuo ze di mia diemia chücü la.

²⁶Derei kekreipfüe pie pesogei keba Jerusalem meseu chü, süpfü mia die chü mo mu süpfüe u zuopfü zo.

²⁷Kekreilamonyü süu dze thukeshü; “N neiliecie nuojüpfü, nuo penuo kemopfü, keneipfü kelilie mu shieshülie, no nuonuovachü si mo zocüpfü; puo rübei kebapfü nuonuokoe puo nupfu ze lhou kebapfü nuonuoko ki krakuo zocü la.”

²⁸Süla kezenuoko[18], niekoe Isak kemhie phrapie kezhü nuonuokota zo.

²⁹Derei thiedzü chüüphou nunu penuokelieu, ruopfü nunu penuokelie nuou pese zo, mu tsierei sümhie ba zo.

³⁰Derei ketholeshü nu kedipuo pu ga? “Kediepfü mu puo nuo whuowalie; kekreilamonyü kediepfü nuou bu kediekemopfü nuou ze kekarhelie kelho la” si zo.

³¹Süla a kezeko[19], we kediepfü nuonuo mo, derei kediekemopfü nuonuoko zo.