Read Angami Naga Galatiako 5 Bible Online

Galatiako 5 - Angami Naga bible

Galatiako 5

¹Kekreilamonyü u bu mia die chü motuoü di Khrista u phaphreishüwate. Süla metei thalie mu nie kha lapie kedie vocie nu shü hie.

²Harie, a Paul puya, nie chüpie nie zhüre üro, Khrista nie la kemevi jü.

³Siro a tsierei pu laya, kehoupuorei u zhüre la ro thezho-u pete chüüze morosuo.

⁴Süla nie thezho-u ze di miatholie nyüyakezhako Khrista nunu nie chükho kreiwate; nieko ngukemezhie nu thalie mote.

⁵Kekreilamonyü Ruopfü geinu kepele se di miathokelie kemerüu pfhe kelho tuo zo.

⁶Kekreilamonyü Khrista Jisu kitsa we zhükere mu zhürekemo ha mhapuorei kekrei mo; derei kepele üse[20] kekhrie nunu mhachükezhau zo.

⁷Nieko ta tou vozhü ru, supuo nieko bu ketho-u dieze hienu nieko khawa ga?

⁸Nie kechükeshü hau nie kiekelieu kinu vor mo zo.

⁹Khrei keduo yopuo pie thou pete valieya.

¹⁰Nieko mha le kekrüta kelho Niepuu nunu nie gei a kethepfu ba zo. Derei nie kebvükeboukezhamia kehoupuorei siazha ngulie zotuo.

¹¹Derei a kezeko[21], a tsierei zhükere se pethaya üro, kiüdi a pechüpenyüya ga? Siü liro Krus la mia nei kemo kechüu chüwate.

¹²Nie kebvüyakezhako bu u thuo u pecüwa tse a neikuotuo.

¹³A zenuoko, mia die chü motuoücü la nie kieliete; derei u medo kechü hau se di chüüphou mengu nu vota hie, sikecüumonyü kekhrieu se di nie huoniehuo lie chüliecie.

¹⁴Kekreilamonyü thezho peteu dieca puo nu tseilie, “N zanuomia khriepie n thuo n kekhrie mhieliecie” isi zo.

¹⁵Nieko kemeki ketecü ba di nieko huoniehuo pekawa molieketuo la menuoliecie.

¹⁶A kepuu ro, Ruopfüu geinu lhoulie, mu chüüphou menguko chüta hie.

¹⁷Chüüphou mengukoe Ruopfüu petsouya, mu Ruopfüu menguko chüüphou menguko ze kepetsouya; hanieha kepetsouya, sidi nie bu nie menguu chüta molietuo.

¹⁸Derei Ruopfüu bu nie chathalieta ro, nie thezho-u die chü tuo mote.

¹⁹Siro chüüphou mhathoko meyiemeluopfü ba. Sükosü pieü, mesakemo, kerüyokecü,

²⁰miarhi kerüsuo, themoukecü, kengukemvü, kegeikecü, mia ngu u rokecü, noupfhünouyie, kemeükecü, kediekrei, u rülakreikecü,

²¹Mha kemehou[22], mezemelukecü, meze di kethenga sikemo, mu sükemhie kekrei rei sa. A thiedzü nieko ki pukeshü mhie pu lashüya: kehoupuorei sikecü chüyakezhamia Ukepenuopfü kedi wekelie jü.

²²Derei Ruopfü si ro kekhrie, u neikecü, kezekevi, shügeshühiekecü, mia ngukemezhie, vikecü, kedietho,

²³menekecü mu u kethekerekecü. Thezho puorei mha hako kepetsou jü.

²⁴Tsiu kehoupuorei Jisu vie chüketako chüüphou mu süu rüya menguko sapie krus geinu gouwate.

²⁵We Ruopfüu la rhei tuoya liro, Ruopfüu chatha nu tuolie khe.

²⁶We komethuo di huoniehuo nei kemo chü, mia bu u ki vi nyü mo idi huoniehuo ngu u ro molie khe.