Read Angami Naga Galatiako 6 Bible Online

Galatiako 6 - Angami Naga bible

Galatiako 6

¹A zeko, huomia kekrüketa ngu ro, nie Ruopfüu themiako menuo di sikecümia chatha kemezhü laliecie. Nie rei dophi sikecü nu leta molieketuo la menuolie.

²Nieko kekhoyalie, di Khrista zho-u chü tseilie[23].

³Miapuonie mhathopuo mo zorei puo thuo puo le pevi ro, sümia u thuo u se penya tuoyakezha zo.

⁴Kehoupuorei u mhatho-u kesie meholie; silie ro kekreimia mhatho la monyü u thuo u mhatho-u la u neilietuo.

⁵Kehoupuorei u thuo u pieu pfü phre zotuo.

⁶Dieu pie u pethalieketa khe bu mha kevi pete se u pethakeshümia ze kezalie.

⁷Mia bu u sewa hiecie; Ukepenuopfü krewalie kenjü, puo thuo prukeshüu re la zotuo.

⁸No n chüüphou la tsia vashü ro, chüüphou geinu kekau re latuo; derei no Ruopfüu la tsia vashü ro, Ruopfü geinu kechachie kerhei re latuo.

⁹Süla mha kevi kechü u nyieta hie, kekreilamonyü we mezieta mo ro, puotei touki we re la zotuocü la.

¹⁰Süla, we chülie kevi tei ngukelie ki, kepeleu kikru la pekuo di mia pete gei mha kevi chülie khe.

¹¹Harie a leshükhu kezhazhai di a thuo a dziepie thushü ho.

¹²Huomia nieko kemvü chü nie bu nie zhüre tuoüyakezhako themia mhodzü kemelha nyüyacü la zo, sükoe Khrista krus la mia bu u pechü molieketuo leya.

¹³U zhürelieketako thuo rei thezho-u zeya mo, derei ukoe nie chüu la kemiako nyü di nie bu zhürelienuya.

¹⁴Siürei a la zo we u Niepuu Jisu Khrista krus la kemiakolie kevi zo, süu la a mhodzüki we kijüu pie krus geinu gouwate, mu a rei kijüu kitsa sita zo.

¹⁵Kekreilamonyü[24] u zhükere mu rekemo mhapuo mo, derei chü kesakelie-e puo bo zo.

¹⁶Nouneu mu ngukemezhieu bu thezho hau medzikezha khe, mu Ukepenuopfü themia Israelko ze tuolie.

¹⁷Tsie yawinu mia puo bu rei a keyhu sa hietacie; kekreilamonyü a mo gei a Khrista dieliemia ükecü zasi tuoketa la.

¹⁸A kezeko, u Niepuu Jisu Khrista ngukemezhieu bu nieko pete ze tuoliecie. Amen.