Read Angami Naga Efesako 1 Bible Online

Efesako 1 - Angami Naga bible

Efesako 1

¹Ukepenuopfü medo la, Jisu Khrista apostel chükelie Paul-e thupie Efesa nu kemesako mu Jisu Khrista nu dietho kebako ki keshü:

²Ukepenuopfü u Puou Niepuu Jisu Khrista bu ngukemezhieu mu nouneu khapie nieko tsücie.

³Khrista nunu teigei ruopfü theja neiüko pie u ketsüu Ukepenuopfü u Niepu Jisu Khristanuo puo bu theja pfükelieu chüliecie,

⁴puoe u khrie di u bu puo mhodzü ki mesa mu kejo jülieketuo la kijü hau chükelie mhodzü Khrista nunu u kedaliete.

⁵Puo thuo puo medo kevi kize Jisu Khrista geinu u peviepie puo nuo nuothonuo chüliete,

⁶puo u ngukemezhie kezha la, therhu se puo Khrieu methuo kha u ketsüu tsülie khe.

⁷Puo u ngumezhiethorkecüu nunu puo zie pie u rhalie di u kejokemouko vashü,

⁸sidi süu pie u ketshukelhuo chüshüte. Siro mhasi mu kesikele neiüko geinu,

⁹puo mharhü keviepieketuoko thashü u kie, sidi Khrista geinu puo nei puo medo keviko thashü u kie,

¹⁰süusü puo tei tsokelie ki chütuoü di rhüpie ketuo, puo geinu mha pete teigei ketuo rei mu kijü ketuoko rei teshü kesapie puo chülieketuo la zo;

¹¹Khrista geinu we theka rei ngulie, sietsenu nu rhüpie ketuo tuoi puo thuo puo mharhü mu keleu medzi di mha pete chü tseishü.

¹²Sidi we, Khrista gei kemerü baketa keriemiako bu, puo zayieu tshe di lhou tuolieketuo la.

¹³Süla nie rei puo geinu, nie kethodieu rünyülieketako, süu nie kelakelie dieliekeviu mu pelelieketako pupie kezhü Kemesa Ruopfüu nie geinu mohor vüliete;

¹⁴süusü u rhapie Ukepenuopfü themia chükelie lhiteu zo, puo zayieu tshekelie chüliecie.

¹⁵Jisu Khrista gei nie kepele bakecü mu nieko kemesako pete khrieyakecü a sishüte, mu hau la

¹⁶a kechako nu nieko rükrakelie metsei a nieko la kethezie khashü motaya mo.

¹⁷Nie puo sikelie ze di u Niepuu Jisu Khrista Puou, zapuzayie kechü Puou bu mhasi mu sikelie ruopfü kha nie tsükelieu sü a kechau zo,

¹⁸sitse nie melou mhiko chü pezielietuo, sidi nieko bu nie kiekelie kemerüu, puo kayie vi zapuzayie kechü kezha kemesako donu keba kikecüpuo shicü silietuo,

¹⁹mu we puo pelekecüko gei puo kekuo kidepuo zha di mhachü baya shikecü silietuo.

²⁰Ukepenuopfü kekuo hau se kesia nunu Khrista chü perhei lalie di puo bu teigei puo zatsa bate,

²¹sidi puo bu mhakekhayakezha pete mu kekuo kenyi tsiu kekuo mu mia mho bakecü pete ki kuo, mu theza peteko mho zhakuokecü theza puo se tsiedo kelhouko rübei zomonyü thiesie kelhou teiu nu rei zhakuote.

²²Siro puo mha pete pie puo phi khroshüwate mu puo bu kehou la mha pete mho bate,

²³süu puo mo-u chü, mha pete nu tshu tuoyakezhau thuo puo tshupfü bate.