Read Angami Naga Efesako 2 Bible Online

Efesako 2 - Angami Naga bible

Efesako 2

¹Thiedzü nieko kejokemouko mu kephoumako la siatuo,

²sükisü nieko kijü hau zho se lhou, tei kijü nie donu di tuoyakezha medo ze, mia diezeya kemo kekha seketuo ruopfüko dieze chü vor.

³U pete rei va puo chüüphou menguko chü di süko donu lhou, sidi chüüphou menguko mu keleko chü, mu kekreimia tuoi noupfhüu u gei baketa nuonuoko chü lhou.

⁴Derei Ukepenuopfü ngukemezhie nyi se di puo u khriele khriethorshü zo.

⁵sidi we thiedzü kejokemou la sia tuota zorei puo u chü perheipie Khrista saliete, ngukemezhie la nieko kelakelie zo,

⁶sidi puoe u kesoupie puo salie di Jisu Khrista nunu u bu puo ze teigei baliete,

⁷sidi Jisu Khrista geinu u ngumezhiekecü puo zho vile vithorkecü thiesie kelhoumia bu rei silieketuo la.

⁸Siro niekoe kepele la ngukemezhie nunu kelakelie zo, süusü nie kevikekuo la mo zo, süu Ukepenuopfü thuo methuo khakeshü zo,

⁹nie mhathomhachü la rei mo, nie mia puo bu rei kemiako nyü kemo la.

¹⁰Kekreilamonyü we sü puo mhatho kro puo zo, mha kevi chünu di Jisu Khrista nunu u chüshü zo, Ukepenuopfü u bu kelhou süu se lhou tuonu di pedzüperie kese setuote.

¹¹Nieko thiedzü chüüphou nu Judakemomia chü di penuolie[1], süla thiedzie üse chüüphou geinu zhürekelie la u thuo u üse zhürekelieko üyakezhako bu nie üse zhüre kemoko üdi kie vorkecü leshücie,

¹²süteiki nieko Khrista sa mo di tuo, seyie kekreimia chü di Israelmia ze puo chü vor mo, mu pupie kezhü dietseidiekhoko nu rei nie ya jü, sidi kemerü jü mu kijü hau nu rei Ukepenuopfü sa mo di lhou vor.

¹³Derei tsiewe nieko Jisu Khrista geinu, thiedzü pecie tuo rei Khrista zieu la nieko ze puo penuo vorte.

¹⁴Kekreilamonyü puo u vitho-u zo; puo thuo puo phou pie puo kro kekrei ketuonie chüpie puo chüwa, mu u chükho kekrei seketuo sozhau, süusü u donu kengukemvüu bierhuowate.

¹⁵Puo thezho-u, u bu chünukeshü mu medzi nukeshüko pejüwate, sidi puo thuo puo geinu sünie bu kenienie monyü themia kesa puo chüliete, di vitho-u chüshü,

¹⁶sidi puo kengukemvü chü pejüwa di krus-u la sünie chü kesapie mo puo[2] chü Ukepenuopfü ze kezevikelie chüshü.

¹⁷Süla puoe vor nie kepetse nu ketuoko ki rei vitho-u pu mu kepenuo nu ketuoko ki rei vitho-u pushü;

¹⁸sidi puo la u kehoupuo bu rei Ruopfü puo geinu Puou ki volie kevi chüshü.

¹⁹Süla nie chazoumia morei solhimia mote, derei kemesako ze khenumia chü mu Ukepenuopfü kikru nu tsüphrümia chüte.

²⁰Süu nieko apostelko mu siedzekesiko puomvü dzepie kezhü, süu Jisu Khrista puo thuo puoke nu tsieu[3] chükecüu geinu chüliete.

²¹Puo geinu u ki kechü tsie kheko kere toutou vo Niepuu nu kemesa rüsuoki puo chü sietazhie;

²²nieko rei ruopfü kitsatie keze puo chü di Ukepenuopfü bu baketuo ki puo chüliete.