Read Angami Naga Efesako 3 Bible Online

Efesako 3 - Angami Naga bible

Efesako 3

¹Hau la a Paul, nieko Judakemoko la Jisu Khrista die chü tuote.

²Süu dze nieko la Ukepenuopfü ngukemezhie lietho kha a tsüwaketa nieko rei si batuo,

³mu kimhie di keviepie ketuou thapie a pesipengushü shicü, khinyhü die huoyo thukeshü rei si bata mecie,

⁴mu nieko süko phrülie liro a Khrista dze keviepieketuo die kesou situoketa nieko lelietuo.

⁵Thiedzü phou-u nu we keviepieketuo die kesou hau dze pie themia ki pu mo, derei tsiewe puo Ruopfü geinu süu pie puo apostel kemesako mu siedzekesiko pesipengushüwate.

⁶Süu Judakemoko bu rei kayieu ngulie, sidi themo-u gei keze puo chülie, mu dieliekeviu geinu Jisu Khristae pupiekezhüu nu u ya kenyimia chülieketa zo.

⁷Ukepenuopfü mhaphruo pie a tsü di a bu dieliekevi lietho mia puo chükelie hau puo kekuo üse chüshükecü zo.

⁸Kemesako donu kecütho-u zoürei, ngukemezhie hau khapie a tsü di a bu dieliekeviu pie Judakemoko ki, si vo tsolie kelho Khrista kinyiko dze pu,

⁹mu themia pete bu mha pete chükeshüu Ukepenuopfü thiedzü teicie kekra keviepieketuo die kesouu kedipuo shicü silie kevi chüshüketuo la;

¹⁰sidi teigei ketuo kezhako mu kekuoko bu kehou geinu Ukepenuopfü mhasi puo rhi kekreikecü neiüko silieketuo la.

¹¹Puoe kechachie ketuo puo mharhü hau u Niepuu Khrista Jisu geinu chü tseishü.

¹²puo geinu we thepfu di Ukepenuopfü ki volie vite mu puo kepele geinu thepfulie vite.

¹³Süla a nie bu a nieko la kemezhieketuo hau lepie nie dzükouta hienuya; süko nieko zayie la zo.

¹⁴Hau la a khoutoupfü di u Puou[4],

¹⁵puo kinu teigei rei kijü rei setheyie[5] zatho kehoupuorei thopfükelieu, ki cha baya.

¹⁶Ukepenuopfü bu zayie kechü kinyiu nu puo Ruopfü kekuo khapie nieko tsü di nie nouketuo miau chü kemeteishünu chaya;

¹⁷mu kepeleu la Khrista bu nie nou balienu mu nie mie bu krele kekhrie nu balienu chaya.

¹⁸Siro nieko mu kemesako pete buwe si vo tsolie kelho, puocha puozha, puo rükrie mu puo kesou silie kevi kekuo ngulie,

¹⁹mu Ukepenuopfü kekhrie si vo tsokelie mhasi silie, sidi Ukepenuopfü bu nie ketshu chülieketuo la chaya.

²⁰Siro u nou nu mhachütuoyakezha kekuou lanu we cha morei lelie kevi kezie chüshülie keviu,

²¹puo bu kehouu nu mu Khrista Jisu geinu thephou pete gei tsiu kechachie mu kechachie zapuzayie chücie. Amen.