Read Angami Naga Efesako 4 Bible Online

Efesako 4 - Angami Naga bible

Efesako 4

¹Süla a Niepuu la kedie chüketuou, nieko bu kielieketa phreikie süu nu lhoukesü kelhou lhoulienu nieko ki chaya,

²nie rünuo, mene mu shügeshühielie, tsiu nie nou cha di kekhrieu se huoniehuo gei nie nou shükhrelie,

³Ruopfüu nunu u pha kesa se balieyakezha kezekeviu se keze puo chü balieketuo nie rhieshülie.

⁴Themo puo mu Ruopfü rei puo zo, sütuoi nie kekieu rei kemerü puo rübei la nie kiekelie zo,

⁵Niepu puo, kepele puo, dzülukepfü rei puo,

⁶Ukepenuopfü puo, pete Puou, puo pete mho mu puo geinu mha pete par mu mha pete nu ketuou.

⁷Derei Khrista mhaphruo mejükeshü de, süde ngukemezhie khashü u kehoupuorei tsü phrewate.

⁸Süla pupiekezhü: “Puo kerükrietho gei khoketa ki mia die kechü tezete; puo mhaphruoko pie puo themiako tsü.”

⁹(Siro pukecü, “Puo kerükrie gei khote” idi kepu cau, puoe kijü kerünuo nu rei tsuwata[6] zo imoü me?

¹⁰Puo kerünuo nu tsuwaketau teiko mho rei khowata zo, sidi mha pete ketshu chü tuote.)

¹¹Puo mhaphruo khapie huomia bu apostel chü, huomia bu siedzekesimia chü, huomia bu prosar chü, huomia bu Pastor chü mu kepetha chü,

¹²di kemesako kesepie lietho-u chülieketuo mu Khrista mo-u chü se sielieketuo la zo.

¹³Mu si zo tha di u pete bu keze puokechü nu u kepele mu Ukepenuopfü Nuou silieketau nu rei keze puo chülie, mu phichülieketamia chü tseiütsokecü Khrista phichü de phichülieketuo la zo.

¹⁴We nhicumia chü sa mote, u ketsi pesuoyakezhako kepetha die mu themia thuo pfhükelie doko bu hepie lutsahatsa vawayakezha dzü rüpfhü mhiei tuolie lhote.

¹⁵Derei kekhrie nou se ketho-u pulie, di mha kehoupuonurei vi kechüpie puo tsüu, Khrista kitsa va morosuote,

¹⁶puo geinu themo puo gei zatho kekreikecü pete rei kekhepfü ba, mu themo peteu rei süu geinu kekuo ngulie di kekhekerhüpfü ba, sidi themo-u gei zatho puoe chü kezhüu chüshükelie geinu, tsiu kekhrie nunu themo peteu memie sielie mu kruolieya.

¹⁷Süla a Niepuu nunu pu beiyakecüu sü: Judakemoko kemethuo nouleko se tuoyakezhako mhie lhou sa tuo hie.

¹⁸Uko nouleko chü pezeiwate; Ukepenuopfü khakeshü kelhou nu uko ya jü, kekreilamonyü uko mha lelie mo mu uko nou rete.

¹⁹Uko kemenga si chie mo di u thuo u khapie kerüyo nu shü, mu mesa kemo neiüko kechü nu rei u kethe tuo mote.

²⁰Khrista dze kesi we sümhie mo!

²¹Nieko puo dze silie di puo geinu pethapfü reiliete, süu Jisu gei keba ketho-u.

²²Süla thie nie zhorüli, themia keweu, menguko u ketsi pesuo mu u pekawayakezhako rhuowalienu

²³tsiu nie nou ruopfüu chü kesa lalie;

²⁴sidi themia kesau, süu Ukepenuopfü rhi kemhie nunu chükelie kemiatho mu mesakecü dzielienu pethapfüliete.

²⁵Süla tijükecüu khawalie, kehoupuorei u siezanuomia ki ketho-u pu phrelie, kekreilamonyü u pete rei huoniehuo tsüphrü phre zo.

²⁶Nie nouyie bu nie chüpie kephouma chüta hie, nie nei mo ba niaki pele hie.

²⁷Siro u ngumvüdo-u ba perieshü hie.

²⁸Kerüguu bu puo rügu khawalie, sikecüu monyü puo bu mhachülie, mu puo dzie se dietho di kralie, siliro puo mhapie ketsopfhümia khruohilietuo.

²⁹Die kesuo puorei bu nie tie nunu par hie, derei kerünyümiako chü pevilieketuo[7] die rübei pulie di pukezhü ki die kevi pulie.

³⁰Ukepenuopfü Ruopfü kemesau the pesuo hie, süue nie rhalieketuo teisozhau la nie gei mohor vükeshüu zo.

³¹Nieko huoniehuo gei nie nei kemo noupfhünouyie, u nei mo khuboukecü, kegeikecü, mia thakecü dieko mu nie nou nu mia ngukemecü pete khawalie.

³²Sidi huoniehuo gei tseiüvi, thenou mene mu Ukepenuopfüe Khrista geinu vapie nie tsüwaketa tuoi huoniehuo kejo vapie ketsülie.