Read Angami Naga Efesako 5 Bible Online

Efesako 5 - Angami Naga bible

Efesako 5

¹Niekoe nuokhrienuo chüketa tuoi, Ukepenuopfü dorielieliecie,

²Khrista u khrie di u la puo phou khapie mhare kethengu thekeshü chü di mu ruosuo chüpie Ukepenuopfü tsükeshü tuoi nieko rei kekhrie nu lhouliecie.

³Derei pieü mu mesa kemo neiüko, mu kemehou hako nieko donu kepu rei zhü mo, kemesamia we si zhü mo zo.

⁴morei nieko menga kemo, mha va perhukecü, morei kethedakecü dieko kepu zhü mo zo, sikecüumonyü kethezie di lhoulie.

⁵Siro pieümia mesakemomia morei mha kemehoumia, (süu terhuorhi kerüsuo) Khrista mu Ukepenuopfü kedi nu u ya jü zoücü si touliecie.

⁶Kehoupuorei bu kemethuokemeruo dieko se nieko sewa hie. Sükemhieko la Ukepenuopfü noupfhü mia diezeya kemo nuonuoko gei vorya.

⁷Süla sükemhieko ze mhapuorei chü hie.

⁸Nieko thiedzü we zei ru, tsiewe nie Niepuu la ziete. Kezieu nuonuoko chü di lhoulie,

⁹kekreilamonyü kevi mu kemezhü tsiu ketho pete nu kezieu ngulieyacü la.

¹⁰Niepuu neiko pfhülie.

¹¹Nieko kezeiu mhatho puo si vülieya kemoko ze mhapuorei chü hie, sikecüumonyü süko hiela se parshülie.

¹²Kekreilamonyü themia süko pekhre di chü tuoyakecüko pu rei menga zo;

¹³derei mha pete rei kezie bu va peziekeshü ki süko ngumeyiemeluo partaya,

¹⁴kekreilamonyü mha kehoupuorei ngu meyiemeluokelie khe sü kezie zo. Süla pukecü, “No zeyakezhau, colie! Kesia nunu sierliecie, sitse Khrista n va pezieshütuo” siya.

¹⁵Süla nieko kimhie di lhou tuoya shiü menuoliecie. Mhasikemomia mhie mo di mhakesimia mhielie,

¹⁶thewe kiko u rhie chülie, tsiedo ki ha vi mocü la.

¹⁷Süla nieko melo bata hie, derei Niepuu nie bu kedipuo chü nyüya shi siliecie.

¹⁸Zu krie meze bata hie, süu u chü penyawayakezha la; derei Ruopfüu bu nie ketshu chülie,

¹⁹nie ketshe tsali, ketho tsali, mu kemesa tsali chü huoniehuo rüchülie, nie nounu ketho tsaliko mu ketshe tsaliko keli di Niepuu tshe tuo zolie,

²⁰u Niepuu Jisu za nunu mha pete la puotei pete nu kethezie khapie Ukepenuopfü u Puou tsülie.

²¹Khrista kerhu nunu nie khapie huoniehuo khrükhro shülie.

²²Mia nupfünuoko, nie khapie Niepuu ketsü tuoi nie nupfunuo khrükhro balie.

²³Kekreilamonyü Khristae kehouu tsü kechü tuoi mia nupfunuo rei puo kimia tsüu zo, sizomonyü puoe themo-u Kelakelieu rei chü sa.

²⁴Süla kehouu puo khapie Khrista khrükhro keba tuoi, mia nupfünuoko rei mha pete nu u khapie u nupfunuoko khrükhro balie.

²⁵Mia nupfunuoko, Khristae kehouu khrie di süu la puo phou khakeshü tuoi nie nupfünuoko khrieliecie,

²⁶süusü kekreilamonyü puo die pie dzü tuoi kehouu khrü kemesawaya,

²⁷sidi puo thuo puo la kehouu bu zivi, rürhü morei kerhu da mo di mesa mu vitseilie kenyü la zo.

²⁸Süsü tuoi, mia nupfunuoko rei u nupfünuo khriepie u thuo u kekhrie mhielie zhü mu u nupfünuo khrieyakezhamia u thuo u khrieya.

²⁹Miapuorei puo thuo puo chüüphou ngumecüya mo, sikecüumonyü Khristae kehouu vachü mu thekerorieyakezha tuoi, puo süu vachü mu thekerorieya,

³⁰we puo mo-u gei tsüphrümia phre zokecü la.[8]

³¹“Hau la mia puoe puo puo mu puo zuo khawa di puo kimia ze lhoutatuo; sidi unie chü puo chütatuo” isi.

³²Hau die kesou puo, mu a süu se Khrista mu kehouu dze puya.

³³Siürei nie kehoupuorei nie nupfünuo khriepie nie thuo nie khriekezha mhielie; mu mia nupfünuo kechümia rei puo thuo puo nupfunuo rhuliecie.