Read Angami Naga Efesako 6 Bible Online

Efesako 6 - Angami Naga bible

Efesako 6

¹Nhicuko, Niepuu nunu nie krünuoko die zelie, hau puotou zocü la.

²“Nie puo nie zuo rhulie” ikeshü hauha phrapie kezhü sa di die khashü kerieu zo:

³“Silie liro nie vilietuo, mu nie kijü nu rei rhei chalietuo” isi.

⁴Siro mia puonuoko, nie nuonuo nou va kerüda hie, sikecüumonyü Niepuu thatha mu tahitarhokecüu nu u theke se siershülie.

⁵Mia diemiako, nie Khrista diezeya kezha tuoi michie mu pe zo di nie nou nietho chü kijü nu nie niepumia die zeliecie.

⁶Mia mhingu ki rübei mia nei chülieketuo le hie, derei Khrista diemia chü di nie nou pete se Ukepenuopfü nei chüliecie.

⁷Themia lie zomonyü Niepuu lie chü ba zocü le di nie neisiei di nie rhie chüliecie,

⁸Niepu-ue mia diemia rei, kemomia rei mhatho kevi kechü geinu zhakhra pie tsütuo.

⁹Siro niepumiako, nieko rei uko gei sükemhie chülie. Uko kechükede hie, kekreilamonyü nnie kenienie rei teigei keba Niepu puo vie zo, mu puo puo nei si kreiya mo.

¹⁰Thela nu, Niepuu mu puo kekuo kezha geinu metei thalie.

¹¹Kesuou do kesuoko ze keperhie thalieketuo la Ukepenuopfü ki nu ngukelie rünyieko pete se phreliecie.

¹²Kekreilamonyü we chüüzie ze keperhie monyü, mha kekhayakezhako, kekuo keseko, tsiedo kezei nu ketuo kekuoko mu teikijünie nu ketuo kesuo ruopfü kekuoko ze keperhieya.

¹³Süla Ukepenuopfü rünyieko pete chü pfülie, silie ro teisozha kesuou kevor nhie nie ngumvüu ze keperhie thalie kevi chülietuo; mu se phrelie liro tha metei zolie.

¹⁴Sidi tha zolie, ketho-u se nie chieca nu phapfülie, mu kemiatho thacüu kelielie.

¹⁵Mu kevi chükewa Dieliekeviu pushüketuo la mha kehoupuorei pie nie phikou chülie.

¹⁶Hako selie,[9] di kepele zhüu chü pfülie, süu se nie terhuo kesuou theütsie tu kevorko pemhewalie kevi chülietuo.

¹⁷Kelakelie tsüreu chü pfülie, mu Ruopfü zhiechau, süu Ukepenuopfü dieu pielie.

¹⁸Siro kehoukipuorei Ruopfüu nunu nie mezhiemelo mu cha balie. Sidi kemesako pete la nie terü chü mu khawa mo di cha balie.

¹⁹A la rei cha bacie, sidi a bu Ukepenuopfü dielie pie a ketsüu putuoü kesie ki thepfu di keviepieketuo die kesou dieliekeviu pushülieketuo la,

²⁰a tsie süu dieliemia puo chü di thegiro se a phapfü tuo. A bu thepfu di dieliekevi pu kezhüu pushüketuo la, a la cha bacie.

²¹Siro nieko bu a rüliko, a kedipuo mhie ba shi mu chü ba shicü, Tukika thuo mha pete nieko ki pushütuo. Puo Niepuu nu a siezeu mu dietho di lietho chüyakezha puo.

²²A puo ketsekeshü, puo bu hie dzeko pushü mu nieko chü kethepfulieketuo la zo.

²³Ukepenuopfü u Puou mu Niepuu Jisu Khrista bu nouneu mu kepele geinu kekhrie sa pie u kezeko[10] pete tsüliecie.

²⁴Ngukemezhie mu jütaya kemo kekhrieu bu u Niepu Jisu Khrista khrieyakezha peteko ze tuokelieu chüliecie.[11]