Read Angami Naga Filipiko 1 Bible Online

Filipiko 1 - Angami Naga bible

Filipiko 1

¹Khrista Jisu kituo chüketuo, Paul mu Timothi unie kinu: Khapie Khrista Jisu nu ketuo Filipi nu keba kemesako, tsiu kehou kepfheko mu dikonko ki keshü:

²Ukepenuopfü u Puou mu Niepuu Jisu Khrista ki nu ngukemezhie mu noune bu nie ze baliecie.

³A nieko rükrakelie metsei Ukepenuopfü thezie sei baya,

⁴nieko pete la a kecha metsei a neisiei di chaya,

⁵tsenu nu vor tsie ketso dieliekevi mhatho nu nieko kekhoya tha zocü la.

⁶Siro nie donu nu mhatho kevi chü sedekeshüu chü zo tha Jisu Khrista zha nhie tseishütuoücü a pele tou ba.

⁷A nieko dze sükemhie di lekecü puotou zo, kekreilamonyü nieko a nou ki tuo zo, nieko a kedie kechü kirei tsiu dieliekeviu rüguokecü mu zhapu kechü pete nu nieko a ze kere di Ukepenuopfü ki nu kevor ngukemezhieu kezakecümia phrecü la.

⁸Siro a Jisu Khrista kekhrieu se kiderei nieko menguya shi, Ukepenuopfü thuo a zhapu chülie vi.

⁹Siro a kemenguu sü mhasi mu mha pete le kho kekreikelie geinu nieko kekhrieu bu krakechü miemielie.

¹⁰Sidi nieko bu mha kevitho-u si toulie, siro mesa mu pejolie kelhomia chü ba di Khrista zhau tsolieketuo la,

¹¹tsiu Jisu Khrista geinu voryakezha kemiatho siu bu nie tshulie di Ukepenuopfü bu thetshe mu zayie chülieketuo la.

¹²A khrieko, hadzü a gei mhachüketako geinu dieliekeviu pu keyie pevi salie zo ükecü nieko bu silie nyü,

¹³sügeinu kedikiu kepfheko[1] tsiu kekreimia pete rei kedie kechü hau Khrista lanu zo ükecü si kemecie tsuoilieta zo;

¹⁴mu kedie kechü hau la u zemia kro puo bu Niepuu nu meteikuolie di thepfukuo mu michie mo di Ukepenuopfü dieu pulieta zo.

¹⁵Themia huo mia ngu u ro mu mia petsoukecü nou se Khrista pu petha tuoya, derei kekreiko we u noule kemezhü nunu siya.

¹⁶Themia hakoe kekhrie nunu Khrista pu pethaya, mu ukoe a dieliekeviu yapiekezha la a khapie hanu shükewa si ba;

¹⁷kekreiko we u thuo u zhazhü le di Khrista pu pethaya, u nou u tho chü di monyü a kedie chü keba mhonu a nou chü kemezhie sashütuo ükecü medoya.

¹⁸Süu kedipuo mu? Puo thuo kehoupuo zho nu rei, ketho nu rei puo meviva rei Khristau pu pethalieta zo, mu süu la a nei zo. Uzo, a a nei tuo zotuo,

¹⁹kekreilamonyü nieko kecha la mu Jisu Khrista Ruopfüu khruohikeshü geinu hau a shüphralieketuo puo ükecü a si ba.

²⁰A merü mu mengu kebau sü a mhakipuorei thenga chütalie lho, derei thepfu se di zhapu chükeshü geinu Khrista bu a mo hau geinu zayie chü petuo zotuo.

²¹Kekreilamonyü a we rhei tuo rei Khrista la zo mu siatatuo rei mevikuocü zo.

²²A bu chüüphou haunu lhou za sa phituo üro süuwe puo si nguketuo mhatho chü saketuo la zo; mu kiu kedatie shi a si mote.

²³A teshükecü kenie donu thate; tuota di vo Khrista ze baketa mengu, süue vikuo zo.

²⁴derei nieko la a mo hanu ba sa morosuokuo.

²⁵Süla süu morosuo toukecü a si baketa la, puotei huo nieko ze ba di nieko bu kepele nu vikehielie mu nieko neilieketuo si bata zo,

²⁶sidi a nieko ki la kevor ki a bu rei nie Jisu Khrista geinu nie nei phalie kelho chü kebau nu nieko ze a neilieketuo la.

²⁷Nie kelhou zho bu Khrista dieliekeviu ze kevazhü di lhou zolie, sidi a bu vor nieko ngu shierei morei vor mo di nie dze kesi zota rei, nieko keze puo chü tsiu nie kele rei puo chü di nieko rhie chü dieliekevi kepeleu whuo vokezhü a bu siliecie,

²⁸mu mhapuonurei nie kepetsoumia bu nie kedewa hie. Süko la we hauha uko pekawaketuo zasi puo zo, derei nie la we kelakelie zasi puo. Mu hauha Ukepenuopfü mhatho puo zo.

²⁹Kekreilamonyü puoe nie ngumezhie di nie bu Khrista pelekelie rübei monyü puo la kemezhie reilie kevi kekuo kha nie tsüwate,

³⁰nieko rei a thiedzü keperhie ketuou kenguu mu tsierei si zhü zokecü si kebau nu mia ze keperhie tuota zeru.