Read Angami Naga Filipiko 2 Bible Online

Filipiko 2 - Angami Naga bible

Filipiko 2

¹Süla Khrista geinu chü kethepfukecü die huo, kekhrie geinu thenou va pemvükecü, Ruopfü nu mha vierhe kechü, noushünouzhie mu huoniehuo ngumezhiekecü huo ba üro,

²a keneiu bu tseiliecie: Nieko kenoumhielie, sidi kekhrieu khrielie, nieko kenourhelie di nou puo chülie.

³Nie thuo nie zhazhü kele mu komethuokecü nunu mhapuorei chü hie, derei nie chü kerünuolie di kekreimia üse nie ki vikuoü zoliecie.

⁴Siro nie kehoupuorei nie thuo nie keneiu rübei leta hie di kekreimia rüli rei rükralie.

⁵Khrista Jisu noule pie nieko nou shüse tuolie,

⁶puo, Ukepenuopfü rhiu zoshierei, Ukepenuopfü ze kethede üdi, puo thuo puo la mhapuorei chü mo,

⁷derei puo thuo puo chü pejülie, mia diemia rhi chüpfü, themia mevi di penuolie. Mu themia rhi chüpfü di,

⁸puo thuo puo chü kerünuolie sidi kesia ketso rei dieze chü zo tha, Krus se chü zo.

⁹Süla Ukepenuopfü puo chü pezha phishü mu theza peteko kirei rükriekecü, theza pie puo tsüwate,

¹⁰süla Jisu za nunu khoudza pete khoutou phretuo, teigei rei mu kijü rei mu kijü khro rei,

¹¹tsiu Ukepenuopfü u Puou bu zayie chüketuo la, themia meü pete rei Jisu Khristae Niepuu zo ücü phra phretuo.

¹²Süla, a khrieko nieko a dieze chü sei kevor tuoi, a kengu ki rübei monyü tsiewe a ngukemo ki pekuo di nie kelalieketuo la michie mu pe zo di nie rhiechülie;

¹³kekreilamonyü Ukepenuopfü nie geinu mhachü tuo zo, sidi puo nei puo medo kemhie chülieketuo la nie bu chü nyülie mu chülieketuo rei chüshüya.

¹⁴Panyapara mu kemeüta mo di mha kehoupuorei chücie,

¹⁵silie ro nie kijü hau nu kerüzhü mu mesakemoko donu mesa mu pejoliekelhomia chü di Ukepenuopfü nuonuo chü balietuo, sidi teigei khrüthemvü mhie zie balietuo.

¹⁶Nieko kerhei dieu thezetsa se bakelie geinu Khrista zha nhie a bu a neilietuo, kekreilamonyü a kemethuo puo la ta kewhuo tuo mo, puoca kejü puo nu mhachü kemezhie tuo moücü silietuo.

¹⁷Derei mhanuü a kelhou ha pie nie kepele ruosuo puo chü di a zie kengeshü morosuotatuoü rei a nei mu nieko pete ze a nei zotuo,

¹⁸mu sütuoi nieko rei nie nei mu a ze nieko neilie zhü.

¹⁹Telhe mo di Timothi ketsepie nieko ki shüketuo Niepuu nunu merü ba, a bu nieko pete dze sishü di a noumvülieketuo la.

²⁰Nieko zhazhü le di thenounyü kethoyakezha mhiekecü puorei ba mo zo.

²¹Kekreiko we Jisu Khrista la monyü u thuo u mevi la tuoya.

²²Derei nieko Timothi kevi kesuo si ba, puokrüpuonuo tuoi dieliekevi mhatho-u nu puo a ze kekhruohi vor.

²³Süla a dze kedipuo mhietie shi silie mumetha a puo ketseshüketuo le ba;

²⁴mu a Niepuu pelekecü a thuo zo rei pecha mo di nieko ki vorketuo merü ba.

²⁵Sizoürei, a siezeu, a ze di lietho chü mu Khrista chüpahi chükezha, nieko dielie se kevor[2] mu a tsopfhü ki a thekekezhau Epafrodita ketsepie nie ki shü morokesuo le ba;

²⁶puo rei nieko mengu ba, tsiu puo suokewa dze nieko bu sikewa la sa puo nou kemezhie ba.

²⁷Puo suowa ketho, mu sia reita nyünuo zo. Derei Ukepenuopfü puo ngumezhieshü, mu puo rübei monyü a bu a nou kesuo sie rei suo sa moketuo la a rei ngumezhieshü.

²⁸Mu a rei puo ketseshü nyü di pfhelie kelho chü bate, süusü nieko bu rei puo ngu lashü di nieko neilie mu a bu rei a nounyü petsalieketuo la.

²⁹Süla nieko Niepuu nunu nie neisiei di puo zeliecie, mu themia hakemhiemia rhushücie,

³⁰nieko a gei chü nyü di chülie lho kebau puoe chü tseishütuo üdi puo kelhou pie kemichie nu shü, mu sidi Khrista lietho-u la sia reita nyünuo zocü la.