Read Angami Naga Filipiko 4 Bible Online

Filipiko 4 - Angami Naga bible

Filipiko 4

¹Süla a zeko, a khrieyakezhako mu mengu tuoyakezhako, a keneiko mu a keditsüreko, nieko Niepuu nunu metei tha zoliecie, a khrieko.

²A Iwodia mu Suntuke unie bu Niepuu nunu nou puo chü zolienu di hüshüya.

³U, mu harie, a khrietho ketho-u Siziga, a n bu thenu hanie khruohi sashünu pushüya, unie-e Klement mu a ze mhachüyakezha kerhei leshüda nu u za thulieketako rei ze dieliekevi lietho-u nu u rhiechü di a khruohi phi zocü la.

⁴Nieko Niepuu nunu nie nei sei tuolie; a kepusie pu rei, nie nei tuo zolie.

⁵Nie nou kemeneu themia kehoupuo bu rei siliecie. Niepuu penuo bate.

⁶Mhapuorei le nie nou kemezhie hie, derei mha kehoupuonurei Ukepenuopfü thezie di nie tsopfhüko pu cha mu melo ba zolie.

⁷Silie ro Ukepenuopfü noune kesikele pete ki rükrükecüu thuo Khrista Jisu nunu nieko nou nieko medoko rüguose balietuo.

⁸Thela nu, a khrieko, mha kehoupuorei ketho ücüko, mhakehoupuorei therhu ücüko, mha kehoupuorei mezhü ücüko, mha kehoupuorei mesa ücüko, mha kehoupuorei zivi ücüko, mha kehoupuorei pu pevilie keviko, mu vi rükrü zocüko mu tshelie kevi huo nyi üro, süko le ba zoliecie.[5]

⁹Nieko a ki nu silieketa, mu lielieketako, tsiu a geinu rünyülie mu nguwaketau, nieko mha süko chü zolie, siro Ukepenuopfü nouneu nie ze tuolietuo.

¹⁰Nieko a rüli rükra di nie nounyü kesa lakelie la a Niepuu nunu a nei phi bate; nieko a la nie nounyü tou ba zo, derei süu chüshüketuo tei ngulie mo vorte.

¹¹A tsopfhüu la hau pu mo, kekreilamonyü kebakoyo rei se a nei balieketuo do siliete.

¹²A ketsakemere do rei si, mu ketshukelhuo kechü rei si. A mha neiüko nu, puotei kehoupuo nu, pevü rei merü rei, ketshukelhuo shierei, jü shierei, kehoupuorei ze keselie kevi do siliete.

¹³A chü pekuoshüyakezhau la a mha kehoupuorei chülie vi.

¹⁴Puoü ba rei, nieko a mezhieu kezapfükelie la nieko pezie ho.

¹⁵Nieko Filipiko, a dieliekevi mhatho sede therieki, Makedonia nunu tuoketa ki, nieko rübei sie kehou kekrei puorei mha khakeshü mu ngukelie nu rei a ze kekhruo chie mo, nieko rübei zo.

¹⁶A Thesalonika nu keba kirei nieko a tsopfhü vaphikeshü vapuo rübei mo.

¹⁷A mha methuo ngukelie pfhü mo, derei nieko za nu kengupie kezhüu bu mevipie süu salieketuo kepfhü zo.

¹⁸A ngulie kezhü de pie a tsüshüte mu sü kezie rei nguliete; a nei tseite, nieko mha methuo khakeshüko Epafrodita ki nu nguliete, mha cüko kethengu ruosuo, lielie kesü ruosuo mu Ukepenuopfü nei chükelie viewe.

¹⁹Ukepenuopfü puo thuo Khrista Jisu nu zapuzayie kechü kinyi nunu nieko tsopfhü kheko nu nieko khruohishütuo.

²⁰Siro Ukepenuopfü mu u Puou bu telhekechachie zapuzayie chüliecie. Amen.

²¹Khrista Jisu nu ketuo kemesamia pete kelushücie. U zemia haki a ze kebako rei nieko kelushü ho.

²²Kemesamia pete rei nieko kelushüya, ba hurei Kaisar kiu kro nu ketuoko nieko kelushü ho.

²³U Niepuu Jisu Khrista u ngukemezhieu bu nieko pete ruopfü ze bakelieu chücie.[6]