Read Angami Naga Kolosiko 1 Bible Online

Kolosiko 1 - Angami Naga bible

Kolosiko 1

¹Ukepenuopfü medo la Jisu Khrista apostel chükelie Paul mu u siezeu Timothi ki nu,

²Khapie Kolosi nu kemesako mu Khrista nu dietho di keze siezedzürie chükebako ki keshü: Ukepenuopfü u puou kinu kevor ngukemezhie mu nouneu bu nie ze baliecie.

³Hie nieko la kechakechü metsei kethezie pie Ukepenuopfü, u Niepuu Jisu Khristanuo Puou tsü seiya,

⁴nie Jisu Khrista gei nie kepele keba mu kemesako pete khrieyakezha hie sikelie la,

⁵kekreilamonyü nieko la kemerü puo teigei bate. Kethodie, dieliekeviu nie ki kevor therie nu nieko kemerü süu dze sishü,

⁶süu nie ki vorte. Süu puo si vülie mu kra memie se kijü pete nu vote, sütuoi nieko donu rei süu dze silie therie nunu puo si vü sedelie mu Ukepenuopfü ngukemezhie si touliete.

⁷Nie dze hau u khrieu Epafra, keze lietho[1] chükezha u khrieu kinu siliete. Puoe Khrista lietho nu kediethomia puo, nie sou nu mhachüya,

⁸mu puo Ruopfü nunu nie kekhrie thapie hie kieshüte.

⁹Sidi mhaca hau la, hie süu sikelie yawinu, nie la cha petewaya mo, nieko bu ruopfü mu mhacamhala sikelie mhasi neiüko se di Ukepenuopfü medo si toupie nie ketshu chülieketuo la,

¹⁰sitse nie Niepuu nei chü di lhoulie, puo nei puo medoko chü tuolietuo, mu nie bu mhatho kevi neiüko nu nie si rüchülie mu Ukepenuopfü mhasi dzetsa vi kehielietuo.

¹¹Puo zapuzayie kekuou bu nie chü pekuolie di mhakehoupuo nu rei shügeshühie thaliecie, nie neisiei di

¹²kethezie pie u Puou tsüliecie, nie chüpie nie bu kezie nu ketuo kemesamiako ze kayie kerhete.

¹³Puoe kezei kekuou nunu u shüphralie di u pekrupie puo Nuo puo khrieu kedi nu shüliete,

¹⁴puo geinu u rhakelie mu, u kephoumako vakelie nguliete.[2]

¹⁵Puoe umhi pie ngulie kelho Ukepenuopfü rhiu zo, mhachükelieko pete donu nuorietho-u zo;

¹⁶kekreilamonyü puo geinu teigei rei kijü rei, mha nguyakezhako mu ngu kemoko, ruopfü kekuoko, niepuko, kediko mu kekuoko pete chükeshü la.

¹⁷Puoe mha pete mhodzü rei tuo zo, mu puo geinu mha pete teshü kesase ba.

¹⁸Puoe themo-u tsüu zo, süusü kehou zo; puoe therieu, kesia nunu penuolie kerieu, puo bu mha peteko nu kerietho-u chüketuo la.

¹⁹Kekreilamonyü puo geinu Ukepenuopfü rhi chüpfü tseikecüu baketuo puo neite,

²⁰mu krus geinu kru kepar puo zieu pie vitho chüwa di teigei rei kijü rei mha ketuo pete se puo ki la vorlie kevi chüshü.

²¹Siro nieko thiedzü mha kesuoko le, mha kesuo chü tuoyakezha la chazoumia chütuo,

²²derei puo se la chüüphou nunu nie zeviliete, sidi nie chü kemesapie cie reilie kelho mu pejo reilie kelho chüpie puo mhodzünu shülieketuo la,

²³sidi nie bu nie kepeleu nu metei mu khrukhrekecü mvüdzeu gei tha zolie, mu nie dieliekeviu sikelie la nie kemerü puo baketau nunu tsiesie la molietuo, mu süu pie teikhro kelhou kheko ki pu votazhü zo. A Paul rei dieliekevi süu diemia chüte.

²⁴A nieko la kemezhiekelie a nei ba zo, mu chüüphou kemezhiekeshü geinu Khrista mezhieu kitsa tso mo kebako a rei puo mo-u, süu puo kehouu la kemezhiekeshü geinu süu chü tseishüzhü zocü la.

²⁵Mu Ukepenuopfü thuo a bu nieko la mhachünu di ketsekeshü lietho süu chüya, Ukepenuopfü dieu petha tseishütuo ücü la,

²⁶süu thiedzü keriekiko nu mu thephou kekra kinu keviepie tuo, derei tsiewe süu pie kemesamia pesipengushüte.

²⁷Ukepenuopfüe keviepie ketuo hau kinyi puoca nie nou ketuo Khristau zapuzayie kemerüu se Judakemoko donu pesipengushütuoü rhüliete.

²⁸Hie puo dze pu pethaya, mu hie kehoupuo bu rei Khrista nunu phichülieketamia puo chülieketuo la tahitarho mu mhasi pete se kehoupuorei petha tuoya.

²⁹Sidi puo thuo a nou chüshükezha kekuou se a rhie chü di süu la a rhie a hie chü mhachü tuoya zo.