Read Angami Naga Kolosiko 2 Bible Online

Kolosiko 2 - Angami Naga bible

Kolosiko 2

¹Siro a kiderei nieko la, mu Laodikia nu kebako la tsiu a zie ngu chie kemo peteko la a meyhumezhie di mhachü tuoya shikecü nie bu si nyü.

²A nieko bu thepfu mu kekhrie nu keze puo chü nyüya, sitse uko puocapuola si toukelie kinyiko mu Ukepenuopfü keviepie ketuo mhasi ngulietuo, süu Khrista zo,

³puoe mhasi pete mu kesikele pete keviepfü ketuou zo.

⁴A hau pukecü miapuorei bu mha luuhau pupie nie sewa molieketuo la zo.

⁵Kekreilamonyü a chü a mo thuo nieko ze ba mo shierei ruopfü nunu nieko ze ba zo, mu nieko Khrista nu metemezhü keba mu kepele nu metei keba ngu a nei ba zo.

⁶Nieko Khrista Jisu liepie nie Niepuu chükelie mhie, puo ze puo chü lhou tuoliecie,

⁷seimie kre kijü khro kele tuoi nie mie bu kre puo nou lelie di puo geinu rüchüsielie mu nie pethashüwaketa tuoi kepele nunu metei memie sielie, mu Ukepenuopfü thezie sei zolie.

⁸Mia puo bu rei themia mhasi themia do, pfutsanuo zho mu kijü nu diketuo ruopfüko se nie tepie u die chüwa molieketuo la nie kirei tuolie, sükosü Khrista kinu vor mo.

⁹Kekreilamonyü puo geinu Ukepenuopfü rhi chü tseipfü di themia mhie lhoushü,

¹⁰nie puo geinu ketshukelhuo kelhou nguliete, puo kekuo kese mu mha kekhayakezha pete tsüu zo.

¹¹Puo geinu nieko rei ruopfü kitsa zhükere[3] puo se nie zhürelie, Khrista nunu nie zhürekelie geinu chüüphou kelhouu lhewate,

¹²nieko dzülukepfü nu, puo ze khruwate, mu kesiako donu nu Ukepenuopfü puo chü perhei lakelie kekuou nieko rei pelekelie la puo sa rheiliete.

¹³Siro nieko thiedzü kejokemou la mu chüüphou zhüre kemo la siatuo, derei Ukepenuopfü u kejokemou pete vashükewa ki, puo nie chü perheipie Khrista saliete,

¹⁴sidi thezho nu u kepejo dze thupiekezhü pete vawate, mu süko pete pie krus geinu zhie pejüwate.

¹⁵Puo kezhako mu kekuoko te phrelie di uko mho kuolie di mechü mhodzünu nu uko pie thakie chüshü.

¹⁶Süla miapuorei bu kecükekrie, morei thenyiko, morei khrülhou nyi, morei sabat dze puo la nie pejowa hiecie.

¹⁷Hako mha vortuo üketuo khrü puo zo, derei ketho-u sü Khrista zo.

¹⁸Nieko miapuorei u thuo u pechüpenyü, teigeidieliemia rüsuo, ziemhoko medzi, puoca kejü nu themia noule[4] se u thuo u le pevi,

¹⁹puo tsüu, themo peteu bu puo geinu kerhei ngulie di u kereko mu u nyhieroko kekhepfü di Ukepenuopfü ki nu kevor memieu nunu memie sielieyakezha ze kekhe tuo moketa kehoupuo bu rei nieko shüta pie mouta hie.

²⁰Niekoe Khrista ze di kijü nu diketuo ruopfüko kitsatie siate, siliro kiüdi nieko kijüu vie kemhie di lhou ba zo ga? Nieko kiüdi nie khapie thezho-u khrükhro shü la di,

²¹“Hau bie hie, cü hie, nyü hie” iya ga?

²²Hako pete rei kaüjütaketuo zho kro puo zo; sükoe themia thuo chükelie mu pie pethayakezha zho kro puo zo.

²³Hako nanyü nu vikecü rhiva, u zho kemene rhiva, tsiu u chü u mo pechükecü zhoko mhasi geinu kechü merieva, derei süko u chüüphou menguko kekhalie kenjü.