Read Angami Naga Kolosiko 3 Bible Online

Kolosiko 3 - Angami Naga bible

Kolosiko 3

¹Süla nieko Khrista ze di rhei lasielieta liro, nie nou pie pesogei Ukepenuopfü zatsa baketa Khrista keba nu vieko pfhü zolie.

²Nie nou pie kijü nu ketuo vieko le monyü pesogei vieko le zoliecie,

³kekreilamonyü nieko siawa di nie kelhou-u pie Khrista ze Ukepenuopfü kinu keviepie tuote.

⁴Khrista, puo nie kelhou-u zo, mia mhingu chü kevor nhie, nie rei puo ze mia mhingu chü zayie chütuo.

⁵Süla nieko kijü nu chüüphou menguko pieü, mesakemo, kerüyo, mha kesuo kemengu mu kemehou (süusü miarhi rüsuokecü puo zo) hako pesiawaliecie.

⁶Mha kesuo hakoha la mia diezeyakemoko gei Ukepenuopfü noupfhüu vorya.

⁷Nieko rei thiedzü va puo we mha süko medzi vor zo, nie kelhou süu lhou ketuo ki.

⁸Derei tsiewe nieko mha hako pete khawalie, thenou kemeyie, noupfhünouyie, kelhiekecü, mia tha mia melekecü mu nie tie nunu mia pesekecü die khawalie.

⁹Nieko huoniehuo gei tijü hie, nieko themia keweu rhuowa mu süu mhathoko khawatacü la,

¹⁰sidi nieko themia kesau chü dzieliete, sidi themia süu chü kesa lapie mhasi nunu puo chükeshüu mhie miemielieya.

¹¹Mu chü kesakelie süu la nie üse Judamia mu Grikmia ü, zhükeremia mu zhürekemomia ü, u zho kesuomia ü, mhasi kemomia ü, mia die kechümia ü mu mia die chü kemomia üdi kho kekrei salie lhote, derei Khristae mha peteu zo, mu mha pete nu tuoya.

¹²Süla nieko Ukepenuopfü kedakelieko chü di mesa mu puo khrieko chüketa la noushünouzhie, tseiüvikecü, thenou kerünuo, menekecü mu shügeshühiekecü chü dzieliecie.

¹³Nieko huoniehuo gei thenou shükhre ketsülie, mu huomianie huomia gei panyata ro, kejo vapie ketsücie; Niepu-ue nie kejo vakeshü tuoi, nieko rei huoniehuo kejo valie morosuo bei zo.

¹⁴Mha pete kirei kekhrie chü dzieliecie, süu mha pete pha kesapie kezepuo chü balieya.

¹⁵Mu Khrista khakeshü nouneu bu nie nou dilie, nie bu mo puo chü balieketuo la nie kiepie sünu shükelie zo. Mu Ukepenuopfü thezie ba zolie.

¹⁶Khrista dieu bu nie nou ketshu chülie; mhasi pete se nie huoniehuo tarho mu petha ba zolie. Ketshe tsali ketho tsali mu kemesa tsaliko chü mu nie nou nu Ukepenuopfü tshe di chieli tuo zolie.

¹⁷Sizomonyü nie die nu rei, nie mhathoko nu rei, nie mhakehou chü rei Niepuu Jisu za nu chü di Ukepenuopfü u Puou thezie tuo zolie.

¹⁸Mia nupfünuoko, nie nupfunuo khrükhro tuolie, Niepuu nu ketuomia sikecü mese.

¹⁹Mia nupfunuoko, nieko rei nie nupfünuoko khrielie mu uko pese hie.

²⁰Mia nuonuoko, nieko rei mha kehoupuonurei nie krünuoko dieze balie, kekreilamonyü Niepuu nu ketuomia haikecü chü zhü zo.

²¹Mia puonuoko, nie nuonuo nou va kerüda hie, moro uko u dzükezie jütatuo mu.

²²Mia kituoko, nie mhakehoupuo nu rei kijü nu nie niepumia[5] die zeliecie, uko mhingu ki nu uko nei chüketuo rübei le hie, derei Niepuu khrükeprei[6] nunu thenou thetho se lietho chücie.

²³Nie mhathomhachü kehoupuo nu rei, themia la monyü Niepuu la chü ba zo ücü le di thenou pete se mhachücie,

²⁴nieko rei si batuo, nie Niepuu ki nu nie zhakhra tuoi nie puo kayieu ngulietuo; nie Niepuu Khrista lie chü[7] tuo zo.

²⁵Kekreilamonyü kekrükecü chüyakezhamia kekrükecü zhakhra chüpie tsütuo, mu miapuorei ngumezhie pekreilie lho.