Read Angami Naga Kolosiko 4 Bible Online

Kolosiko 4 - Angami Naga bible

Kolosiko 4

¹Niepumiako, nie kituokishümia gei dietho mu ketou nunu mhachülie, kekreilamonyü nieko rei teigei nie Niepu puo bakecü la.

²Kecha nu nie kha pesou shülie, mu kecha nu nie terü chü kethezie pie Ukepenuopfü tsü ba zolie.

³Hie la cha balie, sidi Ukepenuopfü bu kikha puo khrüshü hie tsü di hie bu Khrista dze kesouu puo dieu pethashülieketuo la, süu la a tsie kedie chü ba.

⁴Sitse a pu kezhüu pu kemecietsuoi shülietuo.

⁵Pelekemoko ze tuokecü ki nie thuo mecie se tuolie, thewe ki[8] u rhie chülie.

⁶Nie pfhe nie die bu u neisieilie, mu metsie kelhe mhie zolie, sitse nie mia die kelakecü nu pu kezhüu silietuo.

⁷Tukika thuo a dzeko pie nieko ki pu phreshütuo; puo u sieze u khrieu zo, Niepuu nunu hie ze chalie[9] chüya mu kedietho liethomia.

⁸Nieko bu hienie dze silie di nie nou rei chü kethepfulieketuo la, a hau la pekuoi di puo ketsepie nieko ki shü ho.

⁹Puo Onesima ze vorzhie ho, süu u siezeu, u khrieu zo, mu nieko ramia puo zo. Unie hie dze pete se nieko ki pushütuo.

¹⁰A ze kedie chü keba Aristarka rei nieko kelushü ho, mu Mark, Barnaba üpfü nuou rei sa nieko kelushü ho, nieko hadzü puo dze siliete, puo vor ro puo zeliecie.

¹¹Tsiu Justa üyakezha Jisu rei nieko kelushü ho. Zhükere kro nunu kepar hako rübei tsie a ze Ukepenuopfü kedi la lietho chüyakezha zo; mu uko a nou thupeluo phi vor tso zo.

¹²Nieko ramia puo mu Jisu Khrista kituou[10] Epafra rei nieko kelushü ho. Puo nieko bu Ukepenuopfü medo-u si tou di metei thalieketuo la puo rhie chü nieko la cha baya zo.

¹³Puo nieko la mu Laodikia mu Hierapolis nu kebako la puo rhie chü mu puo nounyü baya zo ükecü a puo zhapu chüya.

¹⁴Hie kekhrie darukesiu Luk mu Dema rei nieko kelushü ho.

¹⁵Laodikia nu keba u kezeko mu Nimfapfü mu puo kinu kehouyakezhako ki rei a uko kelushü ücü pushücie.

¹⁶Nieko leshü hau phrükelie sie Laodikia nu kehouu bu rei phrüshüketuo le beiliecie. Siro Laodikia nu u kezeko leshü puo ketsepie nieko ki shüketuou rei phrüshücie.

¹⁷Siro Arkipa ki hau pushücie: “Niepuu lietho la mhatho pie n peleshüwaketau chü tseiliecie.”

¹⁸A, Paul, a thuo a dzie üse nieko kelukeshü die hau thushü ho. A phapfüketuo thegiroko rükra baliecie. Ngukemezhieu bu nieko ze bakelieu chücie.[11]