Read Angami Naga Thesaloniako Kerieu 2 Bible Online

Thesaloniako Kerieu 2 - Angami Naga bible

Thesaloniako Kerieu 2

¹Siro hie üpfüko mu siezedzürieko[1], hie nie ki kevor thedo chüta mocü nie thuo si ba,

²sirei hadzü hie Filipi nu kemezhiekelie mu hie pese phicü nie si zo, hie úko Kepenuopfü la kethepfu ngulie di keziekere nu rei nie ki Ukepenuopfü dieliekeviu pie pushü.

³Hie nie hükezha ha nie setuoü morei mesa kemo kele nu morei nie kedotuoü di mo,

⁴derei Ukepenuopfü thuo hie dieliekeviu pie hie peleshüketuo puo medoketa la, hie themia nei chütuo üdi monyü Ukepenuopfü nei chütuo üdi puya, puo u melouko dojüyie ru.

⁵Nie rei si ba, mu Ukepenuopfü thuo hie zhapuu chü di, hie mhakipuorei mia kese die pu vor mo, morei puo mevi chü di mha rei mehou tuo mo;

⁶morei hie themia kinu thetshe pfhü mo, nie kinu rei morei kekreimia kinu shierei,

⁷süu hie rei Khrista apostelko tuoi nie ki mha chalie vi zoü rei. Derei hie nie donu keba ki menenuoi[2] di mia zuonuoe u nuonuoko thekeyakezha tuoishü zo.

⁸Sidi nie khrie phicü la Ukepenuopfü dieliekeviu pie nie ze kezaketuo rübei zomonyü nie la hie kelhou rei sa khashütuo üsie zo, kekreilamonyü nie-e hie khriekepfüthomia chüte.

⁹Kezeko, nie rei hie mhatho mu hie mezhie rükra batuo, hie Ukepenuopfü dieliekeviu pie nie ki zhapu chükecü ki nie perewa molieketuo la thevakhinhie mhachü rükhrerüyi zo.

¹⁰Nie kepeleko mhodzünu hie zho mesa mu miatho tsiu pejolie kelho chü zokeshü nie rei mu Ukepenuopfü rei zhapuko zo.

¹¹Siro mia puonuoe u nuonuo gei chükeshü tuoi hie nie gei chüshü zo,

¹²süu hie nie ki cha beiya, nie bu lieliekesü kelhou puo lhoutuoü di Ukepenuopfüe nie kiepie puo kedi mu zayieu nu shülieketa la, hie nie tarho mu nie chü kethepfushüya.

¹³Siro nie hie ki nu Ukepenuopfü dieu rünyülie di liekelie ki süu üse themia die ü monyü Ukepenuopfü die üdi liekelie la hie Ukepenuopfü thezie sei baya, süue nie kepeleko nou nu mhachüya

¹⁴Süla hie kezeko, nie rei Judia nu Khrista Jisu la Ukepenuopfü kehou chüketako dorielielie, süko Judako kinu kemezhiekelie tuoi, nieko rei nie thuo nie ramia dzie nu kemezhielie,

¹⁵sükoe Niepuu Jisu mu siedzekesiko[3] rei dukhriwa, mu hie rei whuowa, uko Ukepenuopfü nei kemo chü mu mia pete petsou tuote,

¹⁶sidi Judakemoko bu kelakelie ngulie lhoü hie bu uko ki die pukecü kha. Hamhie di uko kephoumako chü tsei tuote; mu Ukepenuopfü noupfhü rei vo uko tsote.

¹⁷Kezeko, zopuoki hie mo-u nu nie therhieketa la hie bu merünuomia chüte, derei thenoutsa zowe si mo, haha la hie nie zie ngushü nyükuo tuote.

¹⁸Hie nie ki vor nyü tuo zo, a Paul, va puo monyü va kenie rei zotuo üsie, derei Satan thuo hie cha khawate.

¹⁹Kekreilamonyü u Niepuu kevor ki puo mhodzünu hie kemerü morei kenei morei kemelhalie kevi tsüre sü nieko ha moü me?

²⁰Ketho, nie sü hie zayie mu hie keneiko zo!