Read Angami Naga Thesaloniako Kerieu 3 Bible Online

Thesaloniako Kerieu 3 - Angami Naga bible

Thesaloniako Kerieu 3

¹Süla hie ge salie kenjüta tse, hie rübei Athen nu bataketuo medolie;

²sidi hie siezeu mu Khrista dieliekeviu la Ukepenuopfü lietho-u Timothi ketseshüzhie, puo bu nie kepele nu nie chü kemetei mu chü kethepfushütuoü,

³di nie pechüpenyü keba hako nunu mia puo bu rei tsiesieta molieketuo la. Siro u bu situo ükecü la rhüpietuoketa nieko thuo rei si tou ba ze.

⁴Siro hie nie ze keba ki, we kepechü ze keseketuo nie ki pushü ze; mu sükemhieketa nie rei si batuo.

⁵Mhaca hau la a ge sa balie lho di nieko kepele dze si nyücü la mia ketseshü; mha huo nu kedokecüu bu nie kedowa di hie mezhieu bu thedo chüketa keprei la.

⁶Derei tsie Timothi nieko ki nunu hie ki la vorliete, sidi nie kepele mu kekhrie dze keviko se vor hie petsoshü. Puo hie ki pu sacü nieko hie rüli rükra sei di hie nie ngushü nyü keba tuoi nie rei hie ngu nyü bakecü die keviko se vor pushü.

⁷Hie siezedzürieko, nie kepele la hie nou kemezhie mu kepechü ze kesekecü teiu nu zorei hie chü kethepfuliewe.

⁸Siro nie Niepuu kitsa metei thata üro hie sü rhei bata zo.

⁹Hie bu nie la Ukepenuopfü mhodzünu hie neikelie pete la kedipuomhie di Ukepenuopfü tshe kekralie ta?

¹⁰Hie nie zie ngushü mu nie kepele nu tso mo kebako rei chü pevishü nyü di teisoteizei cha hie rhiechü baya zo.

¹¹Siro Ukepenuopfü u Puou mu u Niepuu Jisu bu nie ki volieketuo hie cha keseshü üthienyü

¹²Sizomonyü, hie nie gei chüyakezha tuoi Niepuu bu nie nou chüpie huoniehuo khrie mu mia pete rei khrie kechü miemiekelieu chücie.

¹³Mu puo bu nie nou chü kemeteipie Ukepenuopfü u Puou mhodzünu nie bu mesa di pejolie kelho chü zo tha, u Niepuu Jisu puo kemesako ze ketsur tsocie.