Read Angami Naga Thesaloniako Kerieu 4 Bible Online

Thesaloniako Kerieu 4 - Angami Naga bible

Thesaloniako Kerieu 4

¹Cüsie hie üpfüko mu kezeko[4], hie Niepuu nunu nie ki cha mu nie hüshüya, süusü, nie hie ki nu sikelie mhiei kimhie di Ukepenuopfü nei kechü kelhou nu tuolietuo shicü (nie rei sicü nu lhouya), mu sü kezie rei chülienushüya.

²Hie Niepuu nunu nie pethakeshüko nie si ba zocü la.

³Siro hau Ukepenuopfü medo-u zo, nie mesa bakelie, süusü pieü chü molie;

⁴di nie mia puopuokecü bu u thuo u mo kekha kerepie[5] mesa mu se ketherhu sikelieu zo,

⁵sidi Judamia Ukepenuopfü si kemomia tuoi chüüphou menguu nunu lhouta hie;

⁶sidi haikecü nu mia puo bu rei puo kezeu morei kezepfü gei puotou kemo chü morei pese hie, kekreilamonyü hie pedzüperie nie ki pu mu tarho menuokeshü tuoi Niepuu thuo mha hako pete nu puo khepuyacü la.

⁷Ukepenuopfü u bu mesa mo tuonu monyü u chü kemesalieketuo la u kiekelie zo.

⁸Süla kehoupuorei hau meliekewamia themia monyü Kemesa Ruopfü khapie nie ketsüu Ukepenuopfü meliekewa zo.

⁹Siro siezedzürie huoniehuo khriekecü dze we hie bu thupie nie tsü mo rei vi; kekreilamonyü Ukepenuopfü thuo nie bu huoniehuo khrielieketuo pie nie pethashüwate.

¹⁰Ketho zo, nie Makedonia nu keba nie üpfüko mu kezemia[6] pete khrie baya ze. Derei hie khrieko, hie nie bu süu chükechü miemielienu nie hüshüya,

¹¹siro hie nie ki kepu tuoi nie kemekrie di lhoulie mu nie thuo nie mhatho-u chülie, tsiu nie dzie se mhachülie,

¹²sitse nie kekreimia mhodzünu zivi tuolietuo mu mia merü di lhouta lho.

¹³Derei hie üpfüko mu kezeko[7], nie bu siaketako dze si mo ba nyü mo, süusü nie bu kekreimia u siedze kejüko tuoi nie nousuo tuo molieketuo la.

¹⁴Siro we Jisu siaketa mu lasieketa peleya liro, süsütuoi Jisu kitsa tuo di siaketako rei Ukepenuopfüe Jisu sa ze votatuo.

¹⁵Hau la hie Niepuu dieu pie nie ki puya, süusü we rhei ba di Niepuu la vorkecü tsoketuoko we zeketako mhodzü rielie lho zo.

¹⁶Kekreilamonyü teigeidielie kezhau kuokelie pfhe chü di shieshü mu Ukepenuopfü ketsüu khoushü tse Niepuu teigei nu ker zotuo, sitse Khrista kitsa tuo di siaketako rhei sieta rietuo.

¹⁷Süsie we rhei mu baluocüko rei süko ze kimhou geinu chüse kho teikhrie nunu Niepuu ze kesetuo; sidi we Niepuu ze sei tuotatuo.

¹⁸Süla die hako pie huoniehuo nou thupeluo baliecie.