Read Angami Naga Thesaloniako Kerieu 5 Bible Online

Thesaloniako Kerieu 5 - Angami Naga bible

Thesaloniako Kerieu 5

¹Siro hie üpfüko mu siezedzürieko[8], puoteiko mu puo teisozhako thupie nie tsü morei vi zo.

²Kekreilamonyü kerügumia theva zenu voryakezha tuoi Niepuu kevor teiso rei sümhieketuo nie rei si pevi se bate.

³Siro mia sie, “Kezekevi mu khrukhrekecü ba” ikesie ki thenumia nuonuovachü tuoi le mo keba nu mhai di vorkezha tuoi keka uko gei vortuo, mu uko talie kenjütatuo.

⁴Derei hie khrieko[9], nieko we kezei nu ba di teisozha süu bu kerügumia mhie nie ki vortuo üba mo zo;

⁵nieko pete rei kezieu nuonuo mu teiso-u nuonuoko zocü la, we theva morei kezeiu vie mo zo.

⁶Süla úko we kekreimia mhie zezhüta monyü co balie mu mecie phrüpfü balie khe;

⁷kekreilamonyü zeyakezhako we theva ze zeya mu mezekezhako we theva ze meze baya.

⁸Derei we teiso-u viekecü la kepele mu kekhrie thacü kelielie mu kelakelie siedzeu pie u tsüre chülie di tseiphrei balie khe.

⁹Kekreilamonyü Ukepenuopfü u bu noupfhüu kitsa votuo üdi monyü u bu Niepuu Jisu Khrista geinu kelakelie ngulieketuou zo,

¹⁰puo u la siashü, süla we co ba rei morei zeta shierei puo ze rheilietuo.

¹¹Süla nieko tsierei chüyakezha tuoi huoniehuo nou thupeluo mu huoniehuo chü pevi tuo zoliecie.

¹²Derei hie kezeko, hie nie bu nie donu liethomiako mu Niepuu kitsa nie mho ba di nie tahitarhoyakezhako rhulienu chaya;

¹³uko mhatho la kekhrie nu uko le pezha philiecie. Siro nieko huoniehuo ze kezevi balie.

¹⁴Siro hie kekhrieko[10], hie nieko bu mezhü tuo moketako tarhoshünu, mu u melou kesuoko chü kethepfushünu mu mezie tuoketako khruohishünu, siro mia pete gei nie nou chalienu nie tarhoshüya.

¹⁵Mia puo bu rei kekreimia puo gei kejo kechü zhada vü hiecie; sikecüumonyü nieko huoniehuo rei mu mia pete gei mha kevi chütuoü whuo sei zoliecie.

¹⁶Nie nei sei tuolie,

¹⁷cha petewa hie,

¹⁸mhakehoupuonurei Ukepenuopfü thezie zolie; Khrista Jisu la nie bu sikecü Ukepenuopfü medotacü la.

¹⁹Ruopfüu biemhewa hie.

²⁰siedze dieko rütseta hie,

²¹derei mhakehoupuorei rie menuolie; sidi mha keviu thezetsa zolie;

²²kesuo shüüko therhieliecie.

²³Noune khashüyakezha Ukepenuopfü bu nieko chü kemesa mpouwalie, sidi nie ruopfü, nie kerheiro mu nie mo bu kru[11] [12] phrezhü di u Niepu Jisu Khrista kevor nhie jotalie kelho-u chüliecie.

²⁴Nie kieyakezhau sü dietho zo, mu puo thuo süu chüshü zotuo.

²⁵Hie khrieko,[13] hie la cha baliecie.

²⁶Kemesako kemeboyakezhau se u siezedzürieko pete kelushücie.

²⁷A nieko bu leshü hau phrüpie u üpfüko mu siezedzürieko[14] pete kieshünu di Niepuu za se nieko ki pu beishüzhü ho.

²⁸Niepuu Jisu Khrista ngukemezhieu bu nieko ze baliecie.[15]