Read Angami Naga Joshua 1 Bible Online

Joshua 1 - Angami Naga bible

Joshua 1

¹Jihova kituou Mosa se sie, Nun nuou Joshua, Mosa kekhruohiu, ki Jihovae mhapushü cü,

²“A kituou Mosa sü siate. Süla tsie sie di dojülie, no mu Israelmia pete, sidi Jordan rüu ciese a kha uko tsüpie keba kijüu nu leliecie.

³A Mosa ki phrakeshü tuoi, kha nie tsüshüwate mu themiako u phizhü pie zhokelie kijü pete kha nie tsüwate.

⁴Nie kijürieko liro pekhrotsa rayhachüu nunu vo pesotsa Lebanon kijüthouu tsotuo; niathutsa kerü kezhau Eufrat nu mu Hitko kijü pete nunu tsu niakratsa Mediteranian Dzükezhau ketso nie rüvie chütuo.

⁵No rheiketuo chie miapuorei n penyülie lho. Ae Mosa zeketuo tuoi n zerei tuotuo. A n zesei-i tuo zotuo morei n khawalie lho zo.

⁶Meteilie, kekreilamonyü noe themia hako krüta chü di ae khapie tsütuo üdi uko puonuoko ki phrakeshü kijüu we lietuocü la.

⁷Meteilie, thepfulie, mu a kituou Mosae thezho kha n ketsü pete dieze chülieketuo le tou zolie. Süu nunu rürei thezatsa morei thevitsa vata hie, n kevo cha petenu vikehielieketuo la.

⁸Thezho leshüdau bu n tie tseta hie. Süu theva khinhie phrü mu le medo ba zolie mu sünu thupie ketuo pete chüüze tsei zolie. Silie liro no vikehielietuo mu n mhatho chükhrielietuo.

⁹A n bu meteilie mu thepfulienu die khakeshü rükra zolie! Michie morei thedzükouta hie, kekreilamonyü Jihova n Kepenuopfü, no kehoura vo rei n zetuo zotuokecü la.”

¹⁰Siro Joshuae krütako ki die khashü di,

¹¹“Razhüchüko nu whi voshülie di themiako ki pushülie, kecüca huo dojüliecie, kekreilamonyü nie-e zha se donu Jordan ciepra di Jihova nie Kepenuopfü kha nie tsüpie kezhü kijüu pevieketuo la” isi.

¹²Joshuae Reuben mu Gad yiemiako siro Manasseh yiemia ketou puo ki mhapu di,

¹³“Jihova kituou Mosae pucü, ‘Jihova nie Kepenuopfü Jordan niathutsa kijüu nie tsü di pie nie kebachü chütuoü keshüu rükraliecie.’

¹⁴Nie nupfünuoko, nie nuonuoko mu nie kicükiriko khapie haki balie, derei nie rüpfhünuoko, terhü la rünyie keseko, nie siedzürie Israelko mhodzü tuo pratuo, uko khruohilieketuo la,

¹⁵nie-e Jihova nie Kepenuopfü khapie uko ketsü Jordan niakratsa pevielie kemochie tuo zo votuo. Sidi Puoe khrukhrekecü tei khapie Israel seyieko tsüshüta ro, süze nie-e Jihova kituou, Mosae kha nie ketsü Jordan niathutsa nie kijü haki la vor lhoulietuo,” sishü.

¹⁶Ukoe Joshua die kela di sie, “No mhakehoupuorei hie ki kepuko chütuo mu no kehourapuo vonu hie ketse shierei hieko votuowe.

¹⁷Hieko Mosa die keze tuoi, n dieze zotuo, mu Jihova n Kepenuopfü Mosa zeketuo tuoi puo bu n zetuokelieu chüliecie!

¹⁸Kehoupuorei n petsou morei no die khakeshüko yopuo rei ze mvü ro puo bu siatuo. Meteilie mu thepfu tha zolie!” sishü.