Read Angami Naga Joshua 10 Bible Online

Joshua 10 - Angami Naga bible

Joshua 10

¹Jerusalem kediu Adonizedek sü Joshua Ai lielie di peka tseikewa, siro Ai mu puo kediu gei rei, Jeriko mu puo kediu gei chükeshü mhie chüshü ükecü, tsiu Gibeon nu kebako Israel ze vitho chüwa di uko donu lhou bataücü sikeshü ki,

²puoe michie phita, kekreilamonyü Gibeon-e nadi kezha puo kedi kenyi tuoikecü puo, mu süu Ai ki rei zha, siro puo themiakoe pete terhümiavimia phre.

³Süla Jerusalem kediu Adonizedek-e dielie ketsepie Hebron kediu Hoham, Jarmuth kediu Piram, Lakish kediu Jafia, mu Eglon kediu Debir kishü di,

⁴“A ki khor a khruohishü di úko keze Gibeon biewa khe; kekreilamonyü puo Joshua mu Israelko ze vitho chüwate ru” sishü.

⁵Sitse Amormia kedi pengouko, Jerusalem, Hebron, Jarmuth, Lakish mu Eglon kediko icü uko rüpfhünuo pfhü kengulie di kho Gibeon houlie, di puo ze keperhie.

⁶Sitse Gibeonmiakoe dielie ketsepie Gilgal razhüchüu nu Joshua ki shü di, “Hieko khawa hiecie, mhai khor di hieko khruohishücie, di hie kelaliecie! kijüthou rüna nu keba Amormia kediko pete kezelie di hie perhie thate” sishü.

⁷Süla Joshuae terhü themia pete mu puo terhümiavi kevithoko sa di Gilgal nunu tuoshü.

⁸Mu Jihovae Joshua ki, “Uko preipie hie, a uko khapie n dzienu shüwaketa la; uko miapuorei n mhodzünu thalie lho” sishü.

⁹Sidi Joshua teizeizha pete Gilgal nunu tuo khor di va puo chü Amorko bieta.

¹⁰Mu Jihovae Amorko chüpie uko bu Israel rüpfhünuo mhodzü michie kehoukeruo chüta, Israelkoe Gibeon nunu uko dukhri kemerie chüwa, sidi uko whuo tsur Beth-horon kekho chau tso, siro Azeka mu Makeda ketso uko gei vo tso.

¹¹Ukoe Israel mhodzü ta di Beth-Horon nu kekezhü ki, Jihovae teigeinu prü kezhazha pekrüshü di Azeka ketso uko vakhri vota. Israelko bu zhiechapie uko dukhrikecü kirei prü bu tsur pekhrikewako krakuo.

¹²Sünhie Jihovae kuokelie pie Israelko tsüshü di uko bu Amorko mho kuokelie nhie, Joshuae Jihova rüchü; sidi puoe Israelko mhingu kinu hai di pu: “Niaki-o, no mele mo di Gibeon nu thatacie; mu Khrüo no rei Aijalon razhau nu thatacie” sishü.

¹³Mu niaki-e tsesei-i thata, mu khrü rei puotha nu zhata, sidi, seyieu bu uko ngumvümia penyü tseilie kemochie. Süu dze Jashar leshüdau nu thupie zhü mo me? Sidi khunhie zhate niaki leta mo di teimeluo nu zhata.

¹⁴Mhakipuorei sünhie kemhie Jihovae themia puo pfhe rünyükeshü jü zo; sümhodzü rei, mu süsie rei; Jihovae Israel la kegei zocü la.

¹⁵Süsie Joshuae Israel rüpfhünuo pete ze di Gilgal razhüchüu nu la vorta.

¹⁶Süki kedi pengouko zowe tata, di uko vo Makeda tsiepfüu nu rüshü bata.

¹⁷Ru, mia Joshua ki, “Kedi pengouko vo Makeda tsiepfüu nu rüshü ba di ngu” ishü.

¹⁸Sitse Joshua sie, “Ketsie kezhazha ketoupie tsiepfüu tie mekawalie, siro kepfhe themia khapie bawalie.

¹⁹Derei nieko zowe bata hie di nie ngumvümia whuo zo volie, sidi uko sietsanu uko relie. Uko bu uko rünako nu le hie! Jihova nie Kepenuopfüe kuokelie kha nie dzienu shüwate ho,” sishü.

²⁰Joshua mu Israelkoe uko dukhri phiwata, mu mia huoyo rübei ta nadi dahou kenyiko nu lelie di lhiekelie zo,

²¹mu themiako gei mhapuoreiwa mo di pete Makeda nu razhüchüu nu Joshua ki la vorta, mu kijü süki miapuorei Israelko kepetsou die puorei pu[12] rita.

²²Sitse Joshuae sie, “Tsiepfüu hieshülie, sidi kedi pengouko ze a ki vorlie,” sishü.

²³Ru ukoe tsiepfüu hieshü, di sünunu kedi pengouko Jerusalem, Hebron, Jarmuth, Lakish mu Eglon kediko ze parlie.

²⁴Sidi uko ze Joshua ki vorshü tse, Joshuae Israelmia pete kieshü, sidi puoe puo zekepar terhü themiako mhokezhako bu uko phi pie kediko vo kedelienu di puo die khashü. Sitse uko vor di uko phipie uko vo kedelie.

²⁵Sitse Joshuae uko ki, “Michiepie hie, morei nie nou thachüta hie; meteilie mu thepfu zolie, Jihovae nie ngumvümia nie-e perhieyacüko gei hakemhie chüshü zotuocü la,” sishü.

²⁶Süsie Joshua uko dukhriwa, sidi uko mo pie seibo pengou gei gouwa. Sidi thevatie ketso uko goupie zha.

²⁷Niaki kele mese ki Joshuae die khashü di seiboko geinu kesiamoko pie kerlie, sidi süko kelhoupie uko vo rüshükeba tsiepfüu nushü lawa, sidi ketsie kezhazha pie tsiepfüu mekawakecü thie ketso rei ba zo.

²⁸Sünhie teiso nu Joshuae zhiecha pie Makeda mu puo kediu pekawa; puoe sünu themia pete dukhriwa, mu mia yopuorei perheishü mo. Sidi Jeriko kediu gei chükeshü tuoi Makeda kediu gei rei chüshü.

²⁹Süsie Joshua mu Israelko pete sa Makeda nu ke di Libna whuo.

³⁰Mu Jihovae süu mu puo kediu pie Israelko dzienu shüwa; mu puoe zhiecha pie süu biewa, mu sünu kelhou pete biewa, tsiu miapuorei peshashü mo, ukoe Jeriko kediu gei chükeshü tuoi sünu kediu gei rei chüshü.

³¹Sidi Joshuae Israelko pete ze di Libna nunu Lakish nu vor süu houlie di süu re, di süu bie.

³²Mu Jihovae Israel bu Lakish mho kuokelie chüshü, mu Joshuae zha kenie nhie süu lielie. Puoe Libna gei chükeshü tuoi miapuorei peshashü mo, derei nadiu nu keba themia pete dukhriwa.

³³Siro Gezer kediu Horam rei Lakish khruohituoü khor, derei Joshua puo mu puo themiako geiwa mu miapuorei peshashü mo.

³⁴Süsie Joshua puo rüpfhünuo ze di Lakish nunu Eglon nu vo, di süu houlie di re, di süu bie,

³⁵mu sünhie süu lielie, mu sünu keba pete dukhriwa, puoe Lakish gei chükeshü mhiei tou di chüshü.

³⁶Sitse hau va sie, Joshua Israel pete ze di Eglon nunu Hebron nu kho; di ukoe süu re;

³⁷mu süu lielie, mu zhiecha pie sünu kediu mu themia pete dukhriwa, sürübeimonyü sükhieümhou rünako rei pete biewa. Joshuae nadiko peka lotsowa, Eglon gei chükeshü mhie tou chüwa. Miayopuorei perheishü mo.

³⁸Siro Joshua Israel pete ze di Debir nu la vor, di süu re, mu uko süu bie,

³⁹mu puoe süu lielie, puo kediu mu puo rünako sa lielie, sidi ukoe zhiecha pie uko bie di sünu keba pete peka tseiwa; puoe puorei lhieshü mo, puoe Hebron gei mu Libna mu puo kediu gei chükeshü tuoi, Debir mu puo kediu gei rei chüshü.

⁴⁰Sidi Joshuae süki rünako pete penyülie. Puoe kijüthou rünako mu Negeb, siro kijü tsei niathu kevatsatieko, sizomonyü pekhrotsa kijü keso rünako mu uko kediko pete penyüwa. Puoe miapuorei peshashü mo, derei mia pete dukhriwa. Hauha Jihova Israel Kepenuopfüe diekhakeshü mhatho.

⁴¹Joshuae Kadesh-Darna pekhrotsa nu Gaza ketso, mu Goshen kijü pete üse peso tsatie kho Gibeon ketso penyüwa.

⁴²Jihova Israel Kepenuopfü Israel la kegeikeshü la, Joshuae vapuo rüwhuo nu kedi hako pete mu uko kijü lielie.

⁴³Sidi Joshuae Israel pete ze di Gilgal razhüchü nu la vorlie.