Read Angami Naga Joshua 11 Bible Online

Joshua 11 - Angami Naga bible

Joshua 11

¹Hazor kediu Jabin-e hau dze sishü tse, puoe dielie ketsepie Madon kediu Jobab, Shimron kediu, Akshaf kediu,

²mu kedi pesotsa kijüthou rünako nu kebako, Kinerot khrotsa Araba nu kebako, kijü kerünuo nu kebako, mu kisietsa Nafot-dor nu niakratsa kebako,

³mu dieliemia ketsepie Jordan khie lutsahatsa keba Kananmiako, mu kijüthou gei keba rüna Amorko, Hitko, Perizko, Jebusko mu Mizpa kijü nu Hermon kijüthou phiki keba Hivko rei tsüshü.

⁴Mu ukoe rüpfhünuo krodi kezhazha ze di par, uko rüpfhünuo sü krapie dzükezha khie theshünyo mhiei mu uko gura mu guragari kekra rei sa ze di par.

⁵Kedi hako pete keze puochü di kengulie, sidi Israel ze kegeituoü Merom dzükhie razhüchü chülie di sünu balie.

⁶Mu Jihovae Joshua ki, “Uko prei pie hie, kekreilamonyü sodu ha mese ki a Israelmia la uko pete dukhrishü zotuo; noe uko gurako phika zawatuo, mu mi pie uko guragariko thewatuo,” sishü.

⁷Süla Joshuae puo terhü themiako pete ze di Merom dzükhie uko re di uko bievü.

⁸Mu Jihovae Israel bu uko mho kuokelie khashü, sidi Israelkoe uko whuo, gei izo petsotsa Misrefot-maim mu Sidon Kezhau ketso vo, mu niathu tsatie Mizpa razhau ketso zo vo. Ukoe ngumvüko miapuorei perheishü mo zo di pete geiwa kemochie terhü chü.

⁹Mu Jihovae Joshua ki diekhakeshü kemhiei puo uko gei chüshü; puo uko gurako phika zawa, mu mi pie uko guragariko thewa.

¹⁰Mu süki Joshuae rürei lavor di Hazor lielie di zhiecha pie kediu biewa; süteiki Hazor-e kedi rüvie süko pete donu kekuotho-u zo.

¹¹Ukoe zhiecha pie sünu keba themia pete biewa, miapuorei perheishü mo, mu mi pie Hazor thewa.

¹²Mu Joshuae nadiko pete mu süko kediko pete lielie, di dukhri phrewa, mu süko pekaperuowa, Jihova kituou Mosae diekhakeshü tuoi.

¹³Sizoürei Israelko kijü sethougei keba nadiko we puorei thewa mo, Joshuae thekewa Hazor rübei zokemosie.

¹⁴Mu nadi hako nunu piekelie terhü mhavako mu kicükiriko Israelkoe liepie uko vie chülie. Derei zhiecha pie themiako pete geiwa, mu mia yopuorei perheishü mo.

¹⁵Jihovae puo kituou Mosa ki diekhakeshü tuoi, Mosa rei Joshua ki diekhashü, mu Joshuae süu dieze chü tseilie. Jihovae Mosa ki diekhakeshüko puoe puorei chü moketa jü zo.

¹⁶Sidi Joshuae kijü süu pete, kijüthou rünako mu kerünuo nu keba peso pekhro pete, Goshen kijü pete, mu pekhrotsa kijü keso rünako, siro Jordan razhau icü lie phrelie.

¹⁷Sidi Halak kijüthou, rükrie se Seirtsa sieketa kinu Lebanon razha nu Balgad ketso, Hermon kijüthou khro nu puoe uko kediko te phrelie di uko dukhriwa.

¹⁸Joshuae kijü süki kediko ze terhüchü cha phi.

¹⁹Gibeon nu kelhou Hivko rübei sie nadi puorei Israelko ze vitho chü mo; derei ukoe terhüchü di kekreiko pete lielie.

²⁰Jihovae uko nouchü perepie uko bu sie Israel ze kegeiketuo chüshü, siliro uko pekaperuo tseiwa, tsiu ngumezhie mo zo di pete dukhri tseiwaketuo la. Hauha Jihovae Mosa bu chünu di diekhakeshüu zo.

²¹Süki Joshuae vor di kijüthou rüna, Hebron, Debir, Anab mu Juda mu Israel kijüthou rüna pete nu Anakimko pete biewa; Joshuae uko rünako sa di uko pete pekaperuowa.

²²Anakimmia miapuorei Israelko kijü nu ba sa mota; mia huoyo rübei Gaza, Gath mu Ashdod nu keba zota.

²³Jihovae Mosa ki pukeshü mhietou di Joshuae kijüu pete lielie; sidi Joshuae Israel bu puo kayie chünu di kezapie seyie puopuo ya chüshü. Sidi kijüu terhü kechü nu rüleilie.