Read Angami Naga Joshua 13 Bible Online

Joshua 13 - Angami Naga bible

Joshua 13

¹Siro Joshuae tsata, mu puo kelhou zha phichüta; sitse Jihova puo ki, “No sütsa sete mu n kelhouzha phichüte mu tsie rei kijü kekra pevie saketuo baluo.

²Kijü lie saketuo hako: Filistin kijü rüvie pete mu Geshur kijü rüvie pete,

³(Ijiptmia rie nu keba Shihor rücüu nunu kho pesotsa Ekron rie ketso pie Kanan üsiya. Mu Filistinko kedi pengouko ro: Gaza, Ashdod, Ashkelon, Gath mu Ekron nadi hako nu lhouya), siro pekhrotsa keva Avim rüvie pete;

⁴süsie rei Kanan rüvie pete, mu Sidonmia vie Mira nunu vo Amorko rie Afek ketso;

⁵mu Gebalko kijü pete; mu niathu tsatie Lebanon pete, Hermon kijüthou pekhrotsa keba Bal-gad nunu Lebo-hamath kharu ketso.

⁶Lebanon kijüthouko nunu Misrefoth-main ketso, kijüthou rüna Sidonmia peteko. A a thuo Israelko mhodzünu nu themia hako pete whuowatuo; siro a n ki diekhakeshü tuoi, no kijüu kezapie Israel seyieko phruoshüwa morosuo.

⁷Süla tsie kijü hau kezapie seyie thepfüko mu Manasseh seyie tietsako phruowalie” sishü.

⁸Manasseh seyie tietsa puo,[15] siro Reuben mu Gad yiemiako, Jihova kituou Mosae kezapie uko phruokeshü tuoi uko kayie la Jordan niathutsa kijü ngulie:

⁹uko rüvie, Arnon Razhau khiekikeba Aroer nunu vo Medeba mu Dibon nie donu kijü kethekhra pete.

¹⁰Süsierei zotsu Ammonko rie ketso mu Amorko kediu Sihon, Heshbon nu dikecüu nadiko pete.

¹¹Mu Gilid mu Geshurmiako mu Makamia kijü pete, Hermon kijüthou pete, mu Bashan pete nu vo Saleka ketso,

¹²sünu Refaimko donu gei peshakeshü kediu Og, puo Ashtarot nu Edrei nu dikecü rüvie pete rei sa; Mosae themia hako penyüwa mu uko whuowa.

¹³Sirei Israelkoe Geshurko morei Makatko whuowa mo, sidi süko thie ketso rei Israelko donu lhou baya zo.

¹⁴Levi seyieko rübei Mosae uko kayie pie tsü kemo zo; ukoe Jihovae Israel Kepenuopfü ki kethe ruosuo khakeshü ruosuoba geinu uko ya ngulielietuo, puoe uko ki keputuoi.

¹⁵Mosae Reuben nuonuoko pfutsanuo le di, uko kayie kijü huo rhuopie uko tsüshü.

¹⁶Uko rüvieko, Arnon Razhau khie keba Aroer nunu mu razhau metsuo nu keba nadiu, siro Medeba houpfükeba kijü kethekhrau pete;

¹⁷Heshbon mu kijü kethekhrau gei rünako pete: Dibon, Bamot-Baal, Beth-Baal-meon,

¹⁸Jahaz mu Kedemot, tsiu Mefat,

¹⁹Kiriathaim, Sibma, mu razhau khie kijüthou gei keba Zareth-shahar,

²⁰Beth-peor, Pisga kijü tseiko, mu Beth-jeshimot.

²¹Siro kijürazhau nu nadiko pete mu Heshbon nu dikecü Amorko kediu Sihon rüvie pete sa, Mosae hako rübei monyü Median, Evi, Rekem, Zur, Hur mu Reba krütako, hako Sihon nu bayakezha kediko rei penyüwa.

²²Israelko bu dukhrikewako donu themouyakezha Beor nuou Balam rei sa.

²³Jordan mu sükhiesümhouko pie Reuben yiemiako rüvie therie chü. Nadi hako mu natseko pie Reuben yiemiako pfutsanuo le di pie uko phruowa.

²⁴Mosae Gad yiemia pfutsanuo le di kayie kijü pie uko rei tsüshü.

²⁵Uko rüvie ro Jazer, mu Gilid rüna pete, mu Ammonmia kijü ketou puo, Raba niathutsa Aroer ketso,

²⁶mu Heshbon nunu Ramath-mizpe mu Betonim ketso, siro Mahanaim nunu Debir rie nu ketso,

²⁷mu Jordan razhau nu ro, Beth-Haram, Beth-nimra, Sukot mu Zafon, Heshbon nu kediu Sihon kedi rüvie kepeshako, siro niakratsa ro Jordan mu sükhiesümhouko pie therie chü di kho peso tsa Keneret Dzükezhau ketso pie uko rüvie chü.

²⁸Gadnuomiako pie uko kayie chüketuo la nadi hako mu natseko sa pie uko phruoshü.

²⁹Mosae Manasseh yiemia tietsapuo, uko pfutsanuo le di pie uko phruoshü.

³⁰Uko kijüe Mahanaim nunu Bashan pete, mu Bashan nu kediu Og kedi rüvie peteko, sizomonyü Bashan nu keba Jair rüna hiesorouko pete sa.

³¹Mu Gilid ketou puo, siro Ashtarot mu Edrei, Bashan nu Og kedi rüvie nadiko; hako pie Manasseh geinu lhoukevor Makir nuomiako ketou puo tsüshü.

³²Mosae Moab razhau nu bacü ki hakemhie di, Jeriko niathutsa, mu Jordan kijü keza phrewa.

³³Derei Mosae kijü puo rei pie Levi yieko ya chüshü mo. Puo uko ki pukeshü tuoi Jihova Israelko Kepenuopfü sü uko kayie zo.