Read Angami Naga Joshua 14 Bible Online

Joshua 14 - Angami Naga bible

Joshua 14

¹Eliazar zievo-u mu Nun nuou Joshua, siro Israel seyie donu pfutsanuo puotse nu krütau sasa di Jordan niakratsa Kanan kijü pie theka kezakeshü hamhiei.

²Jihovae Mosa ki pukeshü tuoi, seyie thepfü di puotieko la we dape di kayie kezashü.

³Mu seyie kenie di puotieko lawe Mosae Jordan niathu tsa kezapie uko tsüwata, derei uko donu Leviko yawe chü mo.

⁴Josef nuonuoko seyie kenie, Manasseh mu Efraim, mu uko bu nadiko nu lhoubalieketuo ngulie mu uko kiri tuo rei ngulielie zo.

⁵Jihovae Mosa ki diekhakeshü tuoi Israelkoe kijüu kezalie.

⁶Siro khunhie puo Juda themiakoe Gilgal nu Joshua ki vor, sidi uko donu mia puo Kenizmia Jefune nuou Kaleb-e puo ki, “Kadesh-barnia nunu Jihovae Kepenuopfü themiau Mosa ki n la mu a la kedipuo pushü shikecü no site.

⁷A a kelhouzha teicie hiedia ketaki Jihova kituou Mosae Kadesh-barnia nunu a ketseshü di a bu vo kijü rie; mu a dietho di a kengu touu se vor puo ki pushü.

⁸A ze kekho themiako we vor u themiako nou chükethachüwa, derei a we Jihova a Kepenuopfü siedzi chü tseishü zo.

⁹Mu Mosae sünhie rüse di pukecü, ‘N phi se zhowaketa kijüu pie kechachie la n vie mu n nuonuoko vie chütuo. Kekreilamonyü no Jihova n Kepenuopfü siedzi chü tseishü zokecü la’ si.

¹⁰Derei harie, Jihovae süu Mosa ki pukeshü yawinu tsie ketso cie hiediaepengoute, süu Israelkoe rayha nu rühouketuo teikite, mu Jihovae phrakeshü mhiei thie ketso a perhei se vorshüte; mu harie, a tsie cie hiethethaepengoute.

¹¹Derei a thie rei Mosae a ketsekeshü nhie tuoi mecamekhro ba zo; mu terhü chüketuo la morei kehoupuo chütuoü rei a kekuo ba tsei zoluo.

¹²Süla Jihovae pukeshü mhiei, tsie kijüthou rünau a tsüwaliecie; sünhie no rei Anakimia dahou visekecü nadiko nu bayaücü sishüte. Jihova a ze tuolieü ro, Jihova pukeshü mhiei, a uko whuo phrewatuo” sishü.

¹³Sitse Joshua japie Jafune nuou Kaleb tsüshü di Hebron nadiu pie puo phruowa.

¹⁴Sidi thie ketso rei Hebron pie Kenizmia Jefune nuou Kaleb seyieko kayie chüwa. Puoe Jihova, Israel Kepenuopfü siedzi chü tseikelie la.

¹⁵Thiedzü we Hebron za pie Kiriat-Arba[16] üya, mu Arba sü Anakimmia nadiko donu kezhatho-u. Sidi kijüu nu terhüchü sa mo bata.