Read Angami Naga Joshua 16 Bible Online

Joshua 16 - Angami Naga bible

Joshua 16

¹Josef kayieko tsükeshü kijüu therie pekhro tsa ro, Jeriko khie Jordan nu sede di niathu tsa Jeriko dzüluo nu vo rayha tso, sidi Jeriko nunu kijüthou pfüthe zokho Bethel tso;

²mu Bethel nunu Luz nu vo, mu Arkiko lhoukeba Atarot pfüthe vo;

³mu niakra tsa keva Jefletko kijü Beth-horon pekhro-u tso, sidi Gezer nu ke di Mediteranian dzükezhau pie puo thelachü.

⁴Sidi Josef mu Efraim seyieko mu Manasseh niakratsako kayie kijü uko ya ngulie.

⁵Efraimnuomia rieu uko pfutsanuoko le di rhuokeshü hamhie: Uko rie niathutsa ro Atarot-Adar nunu vo Beth-Horon Peso-u ketso,

⁶mu sünu nu Mediteranian dzükezhau tso; pesotsa ro Mikmethath; süsie rüzie niathutsa va Tanat-shilo pfüthe se Janoa niathutsa tso;

⁷sidi Janoa nunu Atarot nu tsu, sidi Nara nunu vo Jeriko tso, di Jordan pie puo thelachü.

⁸Therieu Tapua nunu niakratsa ze di Kana Rücüu tso di dzükezhau pie puo thelachü. Efraimnuomia rüvie, uko pfutsanuo le di uko phruokeshü kijü hako,

⁹siro Manasseh kijü rie haunu rünako mu natse huo kha kreipie kebako pie Efraimnuomia tsüwa.

¹⁰Derei ukoe Gezer nu keba Kananmiako whuo phralie mota, süla Kananmiako thie ketso rei Efraim ze lhou tuota, derei uko bu miadiechü di mia bu uko kemvü chü ze mhachütuota.