Read Angami Naga Joshua 17 Bible Online

Joshua 17 - Angami Naga bible

Joshua 17

¹Manasseh sü Josef nuo nuorieu zo, süla puo yiemiako ya rhuo pie uko tsü. Siro Makir-e Manasseh nuo nuorieu mu Gilidnuo puou, puoe terhü themia puo zocü la Jordan niathutsa keba Gilid mu Bashan pie puo tsü.

²Sidi Jordan niakratsa pie Manasseh nuomia kekreiko, pfütsanuo le di uko ya chüshü, Abiezernuomia, Haleknuomia, Asrielnuomia, Shekemnuomia, Hefernuomia mu Shemidanuomia hako pete la; süko u pfutsanuo lekecü, thepfumia kitsa Josef nuou Manasseh yiemia phre.

³Tsiu Manasseh nuou Makir, süu nuou Gilid, süu nuou Hefer, süu nuou Zelofehad puo nuo thepfu jü, thenumia rübei; uko Mahla, Noah, Hogla, Milka mu Tirza.

⁴Ukoe zievo-u Eliazar mu Nun nuou Joshua mu krütako ki vor di, “Jihova hieko bu hieko seyiemia mhie hie kayie ngulienu di Mosa ki die khashü zo” silie. Süla Jihova die khakeshü tuoi, puoe uko prünuoko kayie se kesa di uko khapie uko tsüshü.

⁵Sidi Jordan niathutsa keba Gilid mu Bashan kijü sa kemo Manasseh yatsa za ker ngulieta,

⁶kekreilamonyü Manasseh nuo thenuko rei upfünuoko ze kayie we kesaketa la. Gilid kijüu zowe khapie Manasseh nuomia thinuo kekrei tsatieko tsüwa.

⁷Manasseh rüvie Asher nunu Shekem niathutsa Mikmethath tso; sidi therieu pekhro tsa zotsu En-tapua nu kelhouko tso.

⁸Tapua khieümhou kijüko we Manasseh rüvie zo, derei Tapua rüna Manasseh rie nu kebau we Efraimnuomia vie,

⁹Sidi therieu tsu Kana Rücüu tso. Rücüu pekhrotsa keba rünako Manasseh rüvie nu ba zorei süko pete Efraimnuomia vie phre. Sidi Manasseh rieu rücüu pesotsa ze kho di dzükezhau pie puo thelachü.

¹⁰Pekhrotsa Efraim rüvie mu pesotsa Manasseh rüvie idi dzükezhau pie unie donu niakratsa therieu chü; peso-niakratsa ro Asher mu peso-niathutsa ro Isakar ketso.

¹¹Manasseh-e Isakar nu Asher rüvie nu keba hako pie puo vie chü; Beth-shean mu Ibliam mu sükhieümhou natseko, siro Dor mu puo natseko, mu En-dor, Tanak, Magido mu hako khieümhou natseko (seu ro Nafat).

¹²Sizoürei Manasseh themiakoe rüna süko nu keba themiako whuolie kenjüta; süla Kananmiako bu kijü sünu lhou seituota.

¹³Derei Israelkoe kuo sierlie tse, Kananmiako whuo tsei zowa mo di uko kemvüchü di uko bu mhachüta.

¹⁴Josef seyiekoe Joshua ki, “No kidi kijü za yopuo rübei pie hieko ya chüshü ga? Niepuu japie hieko ketsü la hieko themia kekra bate,” sita.

¹⁵Joshua la sie, “Nieko themia kekra bata mu Efraim kijüthou rünau nieko la mereta ro, nieko ketsa gei kholie, sidi Perizko mu Refaimko kijüko nu nieko thuo nieko la kijü chükemesalie,” sishü.

¹⁶Josef seyiekoe la sie, “Kijütseiko hieko la mere zo; siro razha nu keba Kananmia pete, Beth-shean mu puo natse nu kebako rei, mu Jezril Razhau nu kebako rei thegi guragari nyi phre,” sita.

¹⁷Sitse Joshua Josef thinuo, Efraimko mu niakratsa Manassehko ki, “Nieko seyie kekra kro puo mu nieko kekuo rei nyi phicü kro puo. Nieko kijü zapuo rübei pie nieko vie chülie lho.

¹⁸Derei kijütseiko nie vie chütuo; süu ketsa zo ürei, nie süu da kemesalie di puo rie thela nunu vo kekreitsa kela ketso pevielietuo; siro Kananko sü uko thuo thegi guragari nyi mu kuo ba zorei, niekoe uko whuowatuo” sishü.