Read Angami Naga Joshua 18 Bible Online

Joshua 18 - Angami Naga bible

Joshua 18

¹Israel krodi pete vor Shilo nunu kengulie, sidi sünu kehou pfhekiu pethoulie. Kijüu penyüpie uko mhodzünu zhüwate.

²Siro Israelko donu seyie thenie kayie uko ya ngulie kemo ba luo.

³Süla Joshua sie Israelko ki, “Nieko kichiepuo ketheda di le Jihovae nieko puonuoko Kepenuopfü se nie ketsü kijüu lielie mo di pfheba zotuo ga?

⁴Seyie puo nu mia sese khashülie, siro a uko ketseshü di uko bu vo kijüu whishütuo, sitse ukoe kayie kayie le di puo dze thulietuo, süsie a ki la vortuo.

⁵Mu ukoe kijüu kezapie za thenie chülietuo, Judae pekhrotsa puo rüvie nu batuo, mu Josef kinukoe pesotsa puo rüvie nu batuo.

⁶Niekoe kijüu kezapie za thenie chükelie dze thulie di, se a ki vortuo; sitse a Jihova Ukepenuopfü mhodzünu dape di kezapie nieko tsütuo.

⁷Derei Levimiako we nieko donu kijü pie uko ya chülie lho, Jihova la zievo chükecü sü uko kayie zocü la; tsiu Gad mu Reuben yieko mu Manasseh seyie ketoupuo Jordan niathutsa uko kayie nguliete, Jihova kituo-u Mosae pie uko tsüshüwate.”

⁸Sidi themiako tuoshü, mu Joshuae kijüu dze thutuoü di tuokeshüko tarho di sie, “Vo di kijüu rieshülie, sidi puo dze thulie di a ki la vorcie, sitse ae hanu, Shilo nu Jihova mhodzü kinu nieko la dape tuo” sishü.

⁹Sidi themiakoe vo kijüu rieshü, sizomonyü ukoe kimhie di kijüu keza pie za thenie chülie shikecü mu rünako dze sa thupie leshüda nu shülie; sidi ukoe Shilo nu razhüchüu nu Joshua ki la vorlie,

¹⁰mu Joshuae Shilo nu Jihova mhodzü kinu uko la dape chü, sidi kijüu kezapie Israel seyie uya ngulie mo baluocüko tsü phreshü.

¹¹Tsiu Benjamin yiemia ya par kerietho chülie, pfutsanuo le di, mu Juda mu Josef yiemiako kijü donu nu pie uko ya chüshü.

¹²Pesotsa uko rie Jordan nunu sede di pesotsa Jeriko kijükhru gei kho, sidi kijüthou rünau ze kisietsa va zotsu Beth-aven kijü kesiau nunu thela chüta.

¹³Sidi therieu Luz (süu Bethel) pekhrotsa va vo, di Bet-horon Kerünuotsa kijüthou pekhro-u nu tsu.

¹⁴Therieu sünunu kekreitsa va vota, sidi kijüthou hau kisietsa nu pekhrotsa va tsu di Kiriat-Baal (süu Kiriat-Jearim), ücü Juda yiemia nadi puo nunu thela chüta. Hau pie kisietsa rie chü.

¹⁵Pekhrotsa ro therieu Kiriat-Jearim khie thela nunu sede di tsu Efron,[20] mu tsu Neftoah Dzüluo-u tso;

¹⁶sidi therieu Hinnom razhau mhodzü tou nu keba kijüthou kela nu ker tso, süusü Refaim razhau pesotsa kela nu; sidi pekhrotsa va se Hinnom razhau nu tsu, sidi pekhrotsa Jebusko naditsa nu En-rogel nu tsu.

¹⁷Sidi pesotsa va se En-shemesh nu vo di Adumin chakhra-u kepetsouu Geliloth nu kho, siro sünunu Reuben nuo-u Bohan Tsieu nu tsutso;

¹⁸sidi pesotsa Beth-araba kijükhru gei kho di Araba nu tsuta,

¹⁹di therieu Bet-hogla kijü pesotsa kho di Kesia Dzükezha[21] pesotsa puotie kemeyau tso, sidi Jordan rüu tietshü nunu thela chü, hau pekhrotsa therieu.

²⁰Mu Jordan pie niathu tsatieu chü. Hako Benjaminnuoko, uko pfutsanuo le di therie chüpie uko tsüshü.

²¹Siro Benjaminnuoko uko pfutsanuo le di peviekelie nadiko hako: Jeriko, Beth-Hogla, Emek-keziz.

²²Beth-Araba, Zemaraim, Bethel,

²³Avim, Para, Ofra,

²⁴Kefar-amoni, Ofni, mu Geba, nadi kerekenie üse uko natseko sa;

²⁵sizomonyü Gibeon, Rama, Birot,

²⁶Mizpe, Kefira, Moza,

²⁷Rekem, Irpil, Tarala,

²⁸Zela, Haelef, Jebus,[22] (süu Jerusalem), Gibia[23] mu Kiriat-Jearim;[24] nadi keredia üse uko natseko rei sa. Kijü haue Benjamin yiemiako yau, uko pfutsanuo le di chükeshüu.