Read Angami Naga Joshua 2 Bible Online

Joshua 2 - Angami Naga bible

Joshua 2

¹Siro Nun nuou Joshua pekhre di mia rücieketuo la Shitim nunu mia kenie ketseshü di sie, “Vo di Kanan kijüu bahurei Jeriko rieshüliecie” sishü. Süla unie rünau nu vorlie di süzhü teizeizhau la Rahab ükecü thethenumiapfü puo kinu balie.

²Mu mia Jeriko kediu ki pu di, “Israelmia kro puo tsiezhü kijüu rie ketuo la vorte” sita.

³Süla puoe dielie khapie Rahab kishü di sie, “U kijü peteu rieketuo la n kinu mia huo lete, süko zeparcie!” sita.

⁴Derei thenupfü unie zelie di unie keviewa. Sidi hapfü sie, “Mia huo we a kinu vor zowe, derei uko kirapuo nu vor shiü a si mo.

⁵Ukoe niaki kele tieki nadiu care khacü mhodzü tuote. Uko kitsatie vote shiü a ngu sa mote. Derei nieko rükri uko siewhuo vo ro, uko telie vi ho” ishü.

⁶Derei hapfüe umianie ze kikhru gei kholie di, gakhrobo kengupie keba khronu unie keviepie bawa.

⁷Siro kediu themiako nadiu nunu prata tse, kharuu khawa. Ukoe Israel themianie whuo zo Jordan pfüthekecü chau ketso vo.

⁸Unie zhüketa mhodzü, hapfüe unie ki kho di pukecü,

⁹“Jihovae kijü hau pie nie tsüwaketa a si bata zo. Mu nie keprei-e hie gei bate, mu kijü hau nu kelhou pete nnie la michie kemerie chü bate.

¹⁰Kekreilamonyü nie-e Ijipt nu takepar ki kimhie di Jihova nie la Kemerie Dzükezhau[1] chüpesoshü shikecü, mu nie kimhie di Jordan niathu tsa keba Amorko kedi, Sihon mu Og unie peka lotsowa shikecü rei hie sishüte.

¹¹Hieko süu dze sishü tse michie phrebate; nieko la hie pete hie kethepfu tuo mote. Jihova nie Kepenuopfüu sü tei pesogei mu kijü nu rei Ukepenuopfüu zo.

¹²Mu süla tsie, ae nnie gei vikeshü mhiei a kinuko gei rei vishüketuo Jihova za se a ki rüseshücie, mu a bu nie peleketuo zasi huo khashücie,

¹³sidi a puo mu a zuo, a prünuoko mu siezedzürieko, siro uko kinuko pete rei sa kelashücie, sidi kesia nunu hie kelashü zocie!” sita.

¹⁴Sitse unie-e puo ki, “Hie nie sounu hie kerheiro khashü zotuo! Siro mhanuü noe hienie mhathoko se miapuo ki rei pu molie ro, hie rei Jihovae kijü hau kha hie ketsü nhie, n gei tseiüvi mu diethoshü zotuo” sishü.

¹⁵Siro puoe dahou kukecü ki puo nu lhouba, süla puoe unie bu khirki nunu kero puo teshü di kelie.

¹⁶Sidi puoe sie unie ki, “Kijüthoutsa khotalie, sitse nnie whuoketuoko nnie ngulie motatuo. Uko la vota kemochie zha se sükinu rüshü batalie. Süsie we nnie thuo nnie cha nu volie vitatuo” siwa.

¹⁷Themia nie-e puo ki, “No hienie bu n ki rüsekeshüu nu we, hienie jowalie lho,

¹⁸hieko nie kijü penyü kevor ki, kero kemerie hau pie no hienie bu kekelie khirki nu kheshülie. Siro n puo mu n zuo, n prünuoko mu n puo kinumia pete kengupie n kinu shülie.

¹⁹Mhanuü miapuoe kiu ciepra di siata ro puo thuo puo tsügei zotuo, mu kejo-u hie pfülie kenjü; derei mhanuü kinu kebako miapuo gei rei thedzie khashüwa ro hie kejo-u pfü zotuo.

²⁰Sirei noe hienie mhatho hau puwa ro, hienie rei no hienie bu n ki rüsekeshü dieu gei jo motatuo” sita.

²¹Ru puoe, “Nnie die kemhiei chüliecie,” sishü. Sidi puo unie ketsewa. Siro unie tuota tse, puoe khirki geinu kero kemerieu khepie zhawa.

²²Themianie-e kijüthou gei kho di zha se rüshübata. Siro unie kewhuoko nadiu mu sükhieümhou pete nu unie pfhü derei ngulie mota di la vorta.

²³Sitse unie-e kijüthou geinu kerlie, di kerüu cieparlie di Nun nuou Joshua ki vorta. Mu unie dze pete se puo ki pushü.

²⁴Siro unie puo ki pu sakecü, “Jihovae kijüu pete pie úko tsüwaketa hie sitouta zo, mu harie, sünu kelhouko pete uko prei di michie kemeriechü bate” sishü.