Read Angami Naga Joshua 20 Bible Online

Joshua 20 - Angami Naga bible

Joshua 20

¹Jihovae Joshua ki,

²“Israelko ki, ‘A Mosa bu nieko ki pukeshü mhiei themoukechü rüna kro puo keda kreilie,

³sidi miapuonie puo kenyüchü mo di kekrü kedikelie nu mia biekhrikewamia bu ta süko nu volie di thezie khepu kepfhüu therhielieketuo la.

⁴Siro mia dukhrikewamia puoe rüna hako puo nu ta vo di kharu kinu puo dze pie rünau nu phichüko ki pushütuo; sitse uko puo ze rünau nu lelie di puo bu balieketuo thechü puo pie puo tsütuo.

⁵Mhanuü thezie khepu kepfhüu puo whuo vor ro, uko mia biekhrikewau khapie puo dzie nushülie lho, puoe hamhodzütsa puo zanuou ngumecü tuo mo zo di puo kenyüchü mia biekhri kemo la.

⁶Sidi puoe mechü mhodzünu puo dienyau kecüwa kemochie, mu süteiu nu phichükezha chükebau siata kemochie rüna süu nu ba zotuo. Süze mia biekhrikewau puo thuo puo nadiu nu, puo ki nu la votatuo’ silie” ishü.

⁷Süla ukoe Naftali kijü Galil nu Kedesh, mu Efraim kijü nu Shekem, mu Juda kijüthou rüna nu Kiriat-arba, (süu Hebron) hako kha kreipie balie.

⁸Siro Jordan tsekepra Jeriko niathutsa Reuben yieko rüvie rayha kethekhra gei keba Bezer, mu Gad yiemia rüvie Gilid nu Ramoth mu Manasseh yiemia rüvie Bashan nu Golan kedapie balie.

⁹Nadi hako Israelmia pete la mu u donu kelhou solhimia la rei themoukechü rünako zo, kehoupuorei puo chünyüchü mo di mia biekhrikewamia bu ta süko nu volie, mu mechü mhodzünu puo nyie kecüwa kemochie, sünu balie di thezie khepu kepfhüu bu puo dukhriwa molieketuo la.