Read Angami Naga Joshua 22 Bible Online

Joshua 22 - Angami Naga bible

Joshua 22

¹Sitse Joshuae Reubennuomia mu Gadnuomia mu Manasseh yiemia tietsa puo kiekengushü,

²di uko ki, “Niekoe Jihova kituou Mosae nieko ki diekhakeshü peteko chü tseiliete, mu a nieko ki diekhakeshüko pete nu rei a diezelie.

³Niekoe zha hatsuohade vor thie ketso rei nieko siezedzürie vawa mo, derei pecü menuo di Jihova nie Kepenuopfü nie bu chünukeshüko chü tseiliete.

⁴Siro Puo die phrakeshü mhie, Jihova nie Kepenuopfü kerülei pie nie siezedzürie kekreiko tsüwate, süla tsie Jihova kituou Mosae se nie ketsü kijü, Jordan niathutsa, nie ra, nie kinu la volie.

⁵Derei diekhakeshü mu thezho-u chüüzelieketuo la pecülie, süusü Jihova kituou Mosae nie bu Jihova nie Kepenuopfü khrielieketuo, puo cha pete nu tuolieketuo, puo die khakeshüko zelie mu puo kutoi tuolie, tsiu nie nou pete, nie ruopfü pete se puo lie chütuolienu di nieki pukeshüu zo” sishü.

⁶Sidi Joshuae japie uko tsüshü di uko ketsewa; sitse ukoe uko pfheki nu vota.

⁷Siro Manasseh yie tietsa puo la Mosae Bashan khashü uko bu uko vie chü, derei Joshua kekreitsa la Jordan kisietsa uko siezedzürieko donu uko ya khashü. Mu Joshuae uko ketsepie uko kinukeshü ki japie uko tsü

⁸di sie uko ki, “Kinyi kekra kicükiri, rakachü, suna, merenyi, thegi mu pfhemenei kekra se nie kinu volie. Ngumvümia vie vakelieko se vo nie siezedzürieko ze kezalie” sishü.

⁹Süsie Reubennuoko, Gadnuoko, mu Manasseh yie tietsa puo kinu la vorta, Kanan kijü. Shilo nunu Israelmia kekreiko ze kekhota di Gilid, süu Jihovae Mosa ki die khashü di pie uko ketsü kijüu nu voketuo la tuota.

¹⁰Mu ukoe Kanan kijü Jordantsatie[26] vorlie tse; Reubennuoko, Gadnuoko mu Manasseh yie tietsako Jordan khie nu ruosuoba kezhaphi puo chüshü.

¹¹Mu Israelkoe Reubennuoko mu Gadnuokoe tsiu Manasseh yie tietsae Kanan kijü rie nu Jordan khie Geliloth nu ruosuoba chükeshüu sishü, süu Israelko vietsa ba.

¹²Mu Israelkoe süu sishü tse, Israelmia mechüe sie uko ze terhü chüketuo la Shilo nu vor kengulie.

¹³Sidi Israelkoe Eliazar zievo-u nuou Finehas ketsepie Reubennuomiako, Gadnuomiako mu Manasseh yiemia tietsa Gilid kijünu kebako kishü,

¹⁴mu puo sa peyumia ker, Israel seyieko donunu thinuo puo nu puopuoi, mu süko pete Israel chienuo donu krütamia phre.

¹⁵Ukoe Gilid nu vorlie di Reubennuomia, Gadnuomia mu Manasseh yie tietsako ki,

¹⁶“Jihovae mechü kehou pete hamhie di puya, ‘Kiüdi niekoe Israelmia Kepenuopfü gei mha kesuo chü mu Jihova siekemedzi nunu rüreitatuoü, siro Jihova perhiepetsoutuoü di ruosuoba hamhiecü chüya ga?

¹⁷Peor nu zorei phouma pesuo sewata moü me? Süula thepe kere Jihova themia mechüu gei vor, mu kephouma süu la thie ketso rei we mesalie mo ba zoluo,

¹⁸mu tsierei nie Jihova kinu rürei latatuoüya le? Nieko thie we Jihova perhiepetsou ba, sodu Puo Israel mechüu gei puo nei mo siertuo.

¹⁹Mhanuü tsie nieko kijüu mesa motaü ro, tuo se Jihova pruu keba hie kijü nu vortalie; di hie ze kijü keza di lhou batalie, derei Ukepenuopfü Jihova ruosuobau kemo ruosuoba kekrei puo chü la di Jihova petsou morei hie petsou hie.

²⁰Zera nuo-u Akan kenyü vie pielie di phoumakewa la noupfhüu bu Israel mechüu gei vor mo me? Mu puo kejo la puo rübei sia mo’ ” sishü.

²¹Sitse Reubennuomia, Gadnuomia mu Manasseh yie tietsakoe Israel krütako ki, hakemhie pu;

²²“Jihova, terhuoko mho Kepenuopfü, Jihova terhuoko mho Kepenuopfü! Puoe siba; mu Israel bu rei siliecie! Hauha Jihova perhiepetsoukecü mhatho puo chütaü ro, thie hieko perheishü hiecie;

²³hie-e ruosuoba puo chükelie geinu Jihova kinu rüreitatuoü ro, morei hie-e Kethe ruosuo mu telha ruosuo, morei vitho ruosuo khakeshü le di chü üro, Jihova thuo hiegei khepu lieliecie.

²⁴Süu la mo zo! Derei thiesie nie nuosenuoyie-e hie nuosenuoyie ki, ‘Nieko we Jihova Israel Kepenuopfü ze kedipuo chüketuo ba ga?

²⁵Jihovae Jordan pie nieko Reubennuomiako, Gadnuomiako mu hieko donu therie chüshüwate mu Jihova kitsa nie ya puorei jü’ idi puketa keprei la, sita ro nie nuonuokoe hie nuonuo chüpie uko bu Jihova prei motalie vi.

²⁶Süla hiekoe sie, ‘Úko keze ruosuoba puo chükecü lelie khe, süu kethe ruosuo morei ruotho la mo;

²⁷derei hieko mu nieko donu mu uko sie kelhoumia donu zhapu puo chüketuo la, sidi Jihova mhodzünu ketheruosuo ruothoruori mu vitho ruosuoko khashü di puo lietho chükevor thashüketuo la; mu silie liro tsiesie nie nuonuoe hie nuonuo ki, “Jihova kitsa nieya jü,” ikecü pu molietuo’ sishü.

²⁸Süla hie lekecü, die sikecü pie hie ki rei morei hasie hie nuosenuoyie ki rei pusie ro hie-e, ‘Harie meholiecie, Jihova ruosuoba rhiu hie puonuokoe chükecüu, kethe ruosuo morei ruotho la mo; derei hieko mu nieko donu zhapu puo la’ situo.

²⁹Jihova perhiepetsou mu puo kinu rüreitatuo üdi Jihova ruosuoba puo pruu mhodzünu kebau rüduo ruosuoba puo chülie di kethe ruosuo, telha ruosuo mu ruothoruori khakeshü kele we hie gei vorkenyüwe” sishü.

³⁰Finehas zievo-u mu kehou krüta mu puo zeketuo Israel pfütsanuo mu peyukoe Reubennuoko, Gadnuoko mu Manassehnuoko diepu sipie uko neilie.

³¹Sidi Eliazar zievo-u nuou Finehas-e Reubennuoko, Gadnuoko mu Manassehnuoko ki, “Jihova u zetuo zokecü hie siliete, niekoe Jihova gei jo, cürüwa kemo la, niekoe Jihova dzie nunu Israelko kelalashüta zo” sishü.

³²Sidi Eliazar nuo Finehas mu krütakoe Gilid kijü nunu, Reubennuoko mu Gadnuomia ze kekhota di Kanan kijü nu Israelko ki la vorta, sidi dieu se vor uko ki pushü.

³³Ukoe dieu sipie uko neilie, di Ukepenuopfü tsheta. Süsie Reubennuoko mu Gadnuoko ze terhüchü di uko kijüu biepesuoketuo rhükecü die pu sa mota.

³⁴Sidi Reubennuoko mu Gadnuokoe ruosuobau za üse Zhapu idi kielie, “Kekreilamonyü” ukoe sie, “Úko donu zhapuu sü Jihova Ukepenuopfü zo” sidi pu.