Read Angami Naga Joshua 23 Bible Online

Joshua 23 - Angami Naga bible

Joshua 23

¹Puotei kecha vota mu Jihovae uko houpfükeba ngumvümia peteko kinu kerülei pie Israel tsüwata, mu Joshua rei tsata, tsiu phichüta.

²Süla puoe Israel pete üse uko phichüko, krütako, capiko, mu kezhamiako kieshü di uko ki, “A tsiewe tsate mu a kelhouzha rei kho phite;

³mu niekoe Jihova nie Kepenuopfü nie la seyie hako gei chükeshü pete nie thuo nguwate, Kekreilamonyü nie la kegeikecüu sü Jihova nie Kepenuopfü zo.

⁴Mha hako rükraliecie, seyie keshako pie nie kayie vie chütuoü di a thuo kezapie nie tsüwate, siro ae penyükelie seyieko sa di niathutsa Jordan nunu niakratsa Dzükezha Kezhau ketso khashüwate.

⁵Siro Jihova nie Kepenuopfü thuo nie mhodzünu uko whuowatuo, sidi nie mhingu kinu uko whuowatuo; mu Jihova nie Kepenuopfü nie ki phrakeshü mhiei nie uko kijüu pevielietuo.

⁶Süla meteilie mu Mosa leshüda nu thezho thupieketuo pete dieze chü menuolie, di rürei thevitsa morei thezatsa vata moliecie,

⁷mu nie-e nie donu baluokecü seyieko ze puochü di lhouta mo mu uko rhuoko za pu, se rüse, uko lie chü morei nerhutsu rüsuota suo,

⁸Derei thie ketso nie Jihova nie Kepenuopfü kutuokelie tuoi tuolie morosuo.

⁹Jihovae nie mhodzünu seyie kezha kekuoko whuowate, mu seyieko puorei nieko mhodzünu thalie mo.

¹⁰Nieko mia puo zorei mia nyie puo whuo petakewa chüshü, kekreilamonyü puo nie ki phrakeshü tuoi, nie la terhü chükeshüu sü Jihova nie Kepenuopfü zocü la.

¹¹Süla Jihova nie Kepenuopfü khriekecü nu pecü seliecie.

¹²Mhanuü nieko rürei vo di nie donu keba seyie kekreiko nuopfüko lie mu uko ze kesekeri ita ro,

¹³si touliecie, Jihova nie Kepenuopfüe nie mhodzünu seyie hako whuo sashü motatuo, sikecüumonyü se nie ketsü kijü kevi hau nunu nie kaüjüta kemochie, sükoe nie la ciephrie mu kebie mu nie kevü seiro, mu nie mhi la zohu chütuotatuo.

¹⁴“Mu harie, tsie a se tei tsobate; siro Jihova nieko Kepenuopfü nie la phrakeshü mha kevi pete puorei tsei moketa jü zo, mu hau nie melou pete se mu nie ruopfü pete se si bate, mha pete nie la tsei vorte, mhapuorei tsei moketa jü.

¹⁵Derei Jihova nie Kepenuopfü nie ki mha kevi phrakeshüko pete nie gei vorketa tuoi, Jihova nie Kepenuopfü kijü kevi khapie nie tsükeshü hau nunu nie kaüjüta kemochie, puoe mha kesuo khe chüpie nie gei shütuo.

¹⁶Mhanuü nie Jihova nie Kepenuopfü nie bu zenu di diekhakeshü dietseidiekho-u varhuo di terhuo kekrei liechü mu zeretsu süko rüsuota ro, Jihova nouyie nie gei tusiertatuo, sidi Puoe pie nie tsükeshü kijü keviu nunu nie-e kaüjü mhatatuo” sishü.